Kutuuka 16 - Livulu lya Shukulu Kalunga

Maana na makokwa

¹ Mbunga yoshe ya vaIsalele vakatukile vatundile ku Elime, co a matangwa likumi na atanu ku ngonde yamucivali omo vanatundu laja mu Ingito, vetele ku mambo ya Sine, ije yakele mukati ka Elime na Munkinda wa Sinai.

² Muje mu mambo voshe valinyengelele kuli Mosesa na Alone,

³ co vendekele kuli vakevo ngwavo, “Nga Shukulu Kalunga watutsiilile mu Ingito na livoko lyendi! Kuje twatumbamene ku vindeo vya situ nakulya vyakulya vyakukuta ngwe mutunashakela. Oloni yeni munatunene muno mu mambo mukututsisa ku njala, yetu voshe.”

⁴ Asinoni Shukulu Kalunga wendekele kuli Mosesa ngwendi, “Ololo yeni voshe njikamyana vyakulya vyakutunda mwilu vije vikanyoka ngwe nyonzi. Co vanu vakatuukila anja a litangwa na litangwa nakunona vyakulya vyakupwa a litangwa lije vene. Mu ngila eyi vene njilinakuveseka njimone nga vasa kukava mashiko ange nambe embwe.

⁵ A litangwa lyamucitanu na limo, vakanona vyakulya vyakupwa mu matangwa avali, nakuvivwaesa.”

⁶ Co Mosesa na Alone vendekele kuli vaIsalele voshe ngwavo, “Cingwezi cino mukazivuka ngeci Shukulu Kalunga ikeye wamitundisile mu lifuti lya Ingito.

⁷ Ku mutondo mukamona vumpau vwakuvyazima vwa ku mesho a Shukulu Kalunga. Ikeye nazivi kutatoka kweni kumulinakumutatwesa. Omwo vikajo mulinyengela kuli yetu! Yetu veyajo? Yetu tunapu vaka-kunyunga kushika kwendi lika.”

⁸ Asinoni Mosesa wendekele ngwendi, “Ikeye Shukulu Kalunga akamyana situ imukalya ku cingwezi na makende amangi ku simbu ya mutondo, omwo ikeye nazivi kutatoka kweni mulinakumutatwesa. Omo yeni mulinyenga nakututatwesa, kumutatwesa yetu embwe, oloni mulinakulinyenga nakutatwesa Shukulu Kalunga.”

⁹ Mosesa wendekele kuli Alone ngwendi, “Leka mbunga yoshe vaije nakwimana ku mesho a Shukulu Kalunga, omwo ikeye nazivi kulinyenga kwavo.”

¹⁰ Co omo Alone walekele mbunga yoshe ya Isalele, cooni, omo vakengele mu mambo, vamwene vumpau vwakuvyazima kwa Shukulu Kalunga vwasholokele mu lishelwa.

¹¹ Co Shukulu Kalunga wendekele kuli Mosesa ngwendi,

¹² “Njinazivi kulinyenga kwa vaIsalele. Valeke ngwove ku cingwezi vakalya situ, co ku mutondo vakalya makende ngwe muvanashakela. Asinoni vakazivuka ngeci yange Kalunga njapwa Njambi yavo.”

¹³ Co ku cingwezi vutanga vwakama vwa makokwa vwapulwile vwawililile mu cilombo cavo, co ku mutondo kwakele mbundu yazengelekele cilombo cavo coshe.

¹⁴ Omo mbundu yakakumukile, co kwakele tuma twatundondo twafwile ngwe mavanda akamwa ya livu muje mu mambo. Co tuketwo twapwile ngwe lime lyakukonda.

¹⁵ Omo vaIsalele vavimwene, co kuvavizivukile ngwavo vinapu vika, ngeci valihozwele umo na mukwavo ngwavo, “Vikevi?” Co Mosesa wavalekele ngwendi, “Evi vikevyo vyakulya vyanamyana Shukulu Kalunga ngeci mulye.

¹⁶ Shukulu Kalunga nashikile ngwendi munu na munu akungulule ngwe mwanashakela, malita avali ku munu na munu kupwisa ngwe ku vanu vali mu njuvo yendi.”

¹⁷ Co vaIsalele valingile ngacije, vamo vakungile vyavingi, vamo vyavindondo.

¹⁸ Omo vavyesekele, vaje vakungulwile vyavingi kuvakele navyavingi manene, co vaje vakungulwile vyavindondo kuvalyesekelele lalo manene, co munu na munu wakungulwile ngwe mwanapwisila njala yendi.

¹⁹ Co Mosesa wavalekele ngwendi, “Naumo wai akasezako vya imene.”

²⁰ Oloni vamo kuvatolililile kuli Mosesa, valitulikilileko mulale, co alikaki mutondo vyoshe vyashulile mainyo vyavolele nakunika. Co Mosesa waluvalele navo.

²¹ A mutondo a mutondo munu na munu wakungulwile ngwe mwanapwisila njala yendi, oloni omo litangwa lyalondele njamba, vije vyasalele asi vyasosonyokele.

²² Co a litangwa lyamucitanu na limo vakungulwile vyakulya vya matangwa avali, malita awana ku munu na munu. Co omo mbunga yoshe ya vantwama vezile kuli Mosesa vamulekele vyuma evi,

²³ Mosesa wendekele kuli vakevo ngwendi, “Shukulu Kalunga nashiki ngwendi imene likapwa litangwa lyakujela lyakuhwima, lyakukundika kuli ikeye. Co oceni vimushaka kwoca ku litangwa lya lelo, co telekeni vimushaka kuteleka. Vyoshe evi vikasalao vyakeleni kumukulo ngeci vikapwe vya imene.”

²⁴ Co vatulikile vije vyasaleleo noo alikaki, co kuvyaviile nameme kuvola, ngwe mwavashikile Mosesa.

²⁵ Co Mosesa wendekele ngwendi, “Lyeni evi lelo, omwo lelo linapu Litangwa Lyakuhwima livanakundika kuli Shukulu Kalunga, co kumukawana lalo vyakulya anja ya cilombo embwe.

²⁶ Munapande kukungulula vyakulya vya matangwa atanu na limo, oloni a litangwa lyamucitanu na avali, likelyo Litangwa Lyakuhwima, co vyakulya kuvikakalako.”

²⁷ A litangwa lyamucitanu na avali vanu vamo vatuukile ngeci vakakungulule vyakulya, oloni kuvaviwanene.

²⁸ Asinoni Shukulu Kalunga wendekele kuli Mosesa ngwendi, “Visimbu vingai yeni vanu mukavyana kwononoka kushika kwange?

²⁹ Anukeni ngweni yange Kalunga njamyana Litangwa Lyakuhwima, ngeci a litangwa lyamucitanu na limo njikamyana vyakulya vyakupwisa a matangwa avali. Co a litangwa lyamucitanu na avali munu na munu akale kuje vene ali, kapandele kutundako.”

³⁰ Co vanu vahwimine a litangwa lyamucitanu na avali, kuvapangele vipangi.

³¹ Co vanu va Isalele vatumbwile vyakulya evi ngwavo maana. Vikevyo vyalifwile ngwe vimbuto vyavindondo vyakutoka, vutovalesi vwavyo vwalifwile ngwe makende amapuzuzu akulinga na vuki.

³² Mosesa wendekele ngwendi, “Shukulu Kalunga watushikile kutulikilako maana amo vatekulwila vetu, co vakevo vakamone vyakulya evi vyatwanene kuvilya mu mambo omo watutundisile mu Ingito.”

³³ Co Mosesa walekele Alone ngwendi, “Ambata njava, wakemo malita avali a maana, co yake ku mesho a Shukulu Kalunga mukuyinyungila vatekulwila vetu.”

³⁴ Ngwe omo Shukulu Kalunga washikile Mosesa, co Alone waakele njava kulutwe lwa Cikasa ca Cikumiiyo, ngeci vase kuyinyungilako.

³⁵ VaIsalele valile maana a myaka makumi awana, noo vetele mu lifuti lya Kanana, muje vatungile.

³⁶ (Seteko ya vije vyakuma a simbu ije yapwile malita makumi avali.)