Kutuuka 14 - Livulu lya Shukulu Kalunga

VaIsalele vajavuka Lishali Lyakuvenga

¹ Asinoni Shukulu Kalunga wendekele kuli Mosesa ngwendi,

² “Leka vaIsalele veluke kunima, vakatunge cilombo kulutwe lwa Pi Hahilote, mukati ka Mingendole na Mema a Kalunga Akuvenga, kuyehi na Mbale Zefone.

³ Co mwene wa Ingito akayongola ngwendi vaIsalele valinakwendangana nakulizenga mu lifuti, vanazimbala mu mambo.

⁴ Ngecivene, njikakaluwisa mbunge ya mwene, akamikava oloni njikamuhyana na nzita yendi, co eci cikanjinenela kasingimiko. Asinoni vaka-Ingito vakanjizivuka ngwavo kuma yange njapwa Kalunga.” Co vaIsalele valingile ngwe muvavalekele.

⁵ Omo mwene wa Ingito vamulekele ngwavo vanu va Isalele vanavomboloka, co ikeye na vamyata vendi vatengulwile viyongola vyavo vendekele ngwavo, “Vika tunatavela vaIsalele ngeci vavomboloke? Ololo tunajeneka vinzinda vetu!”

⁶ Asinoni mwene wavwaesele likalu lyendi lya nzita amo na mashwalale vendi.

⁷ Co wavwaesele makalu endi oshe, amo na aje amavwa manene akupwa 600, na vamyata vawo vaka-kuwendesa.

⁸ Co Shukulu Kalunga wakaluwisile mbunge ya mwene, co ikeye wakavele vaIsalele, vaje vatuukile nakulisamba.

⁹ Mashwalale voshe va Ingito, na tuvalu voshe, na makalu, na vaka-kuwendesa vakavele vaIsalele, vavawanene kuje kuvatungilile cilombo cavo ku Lishali Lyakuvenga kuyehi na Pi Hahilote na Mbale Zefone.

¹⁰ Omo vaIsalele vamwene mwene na mashwalale vendi vakina likuluta valinakwija mukuvalwisa, co vazivile manene lyova, co vatambekele kuli Shukulu Kalunga ngeci avakwase.

¹¹ Co vendekele kuli Mosesa ngwavo, “Kuma kumwesi vimbumbo mu Ingito! Kuma watunene muno mu mambo ngeci twakutsilemo ndi? Kenga oni eci ciwunalingi cakututundisa mu Ingito!

¹² Kuma kutwakulekele omo te kanda twije ngwetu eci cikalingiwa? Twakulekele ngwetu twecele tupwe vinzinda va vaka-Ingito. Mwamuvwa kupwa vinzinda kutuvakana kutsila muno mu mambo.”

¹³ Mosesa wavakumbulwile ngwendi, “Kesi muzive lyova! Simpeni lika, mukamona evi vyakalinga Shukulu Kalunga mukumyamena ku litangwa lya lelo, ava vaka-Ingito kumukasa kuvamona lalo.

¹⁴ Shukulu Kalunga ikeye akamilwilako, yeni nacimo cai cimukalinga.”

¹⁵ Shukulu Kalunga wendekele kuli Mosesa ngwendi, “Omwo vikajo mulinakutambeka ngeci vamikwase? Leka vanu vaye kulutwe.

¹⁶ Jundula mulamu wove, co wolwele akamwa ya mema a kalunga, co mema akalyangunuka, vaIsalele vakasa kwenda a livu lyakuma.

¹⁷ Njikakaluwisa vimbunge vya vaka-Ingito ngeci vakavakave munima, co njikawana kasingimiko akuhyana kwange ali mwene, na mashwalale vendi, na makalu endi, na vaka-kuwendesa vendi.

¹⁸ Omo yange njikavafungulula, co vaka-Ingito vakazivuka ngeci yange njapwa Kalunga.”

¹⁹ Cooni kangelo ka Njambi, uje wakele kulutwe lwa mbunga ya vaIsalele, welukile munima yavo, co ije manda ya lishelwa lalo yelukile kunima yavo noo yakele

²⁰ mukati ka vaka-Ingito na vaIsalele. Co lishelwa lyalingisile lisusulungu kuli vaka-Ingito, oloni lyatwile ceke kuli vanu vaIsalele, co vaje mashwalale va Ingito na mbunga ya Isalele kuvasele kuliwana vutsiki vwoshe.

²¹ Mosesa wolwele livoko lyendi akamwa ya mema a kalunga, co Shukulu Kalunga wahuwisile lihunzi lyakama lyatundile mu ngangela. Lihunzi lyahuhwile vutsiki vwoshe, co mema a kalunga omine cau. Co mema alyangunukile,

²² ngecivene, vaIsalele vajavukile a mema a kalunga nakwenda a livu lyakuma. Mema emanene noku-noku ngwe vivumbe, ngeci vanu vendele mukati ka vivumbe vya mema.

²³ Co vaka-Ingito vakavele vaIsalele munima cwi na mu mema a kalunga na tuvalu twavo twoshe, na makalu, na vaka-kuwendesa.

²⁴ A mungulungengu, simbu kanda kukye, Shukulu Kalunga wakele mu manda ya tuhya na mu manda ya lishelwa, wakengele asi ku mbunga ya vaka-Ingito, co wavauya-wuyisile.

²⁵ Mavalo a makalu avo atomenene, ngeci vakevo vakele mu vukalu. Co vaka-Ingito vendekele ngwavo, “Tusezeni ava vanu Shukulu Kalunga alinakuvalwilako, co alinakulwisa yetu.”

²⁶ Co Shukulu Kalunga wendekele kuli Mosesa ngwendi, “Olola livoko lyove akamwa ya mema a kalunga ngeci mema akupule vaka-Ingito na makalu avo amo na vaka-kuwendesa.”

²⁷ Ngecivene, Mosesa wolwele livoko lyendi akamwa ya mema a kalunga, co omo litangwa lyatuukile mema alifwikile nakwiluka mu mwela wao. Co vaka-Ingito vesekele kutewa kutunda mu mema, oloni Shukulu Kalunga wavombilile mu mema.

²⁸ Mema elukile afwikile makalu, na vaka-kuwendesa, co mbunga yoshe ya vaka-Ingito vaje vakavele vaIsalele vanyongele mu mema a kalunga, naumo wai wasaleleo.

²⁹ Oloni vaIsalele vendele a livu lyakuma cau, co vendele mukati ka vivumbe vya mema noku-noku.

³⁰ Likelyo litangwa lije Shukulu Kalunga wamenene vanu vaIsalele kuli vaka-Ingito, co vaIsalele vamwene mitunu ya vaka-Ingito vanalala vanatsi ku ngenge ya mema a kalunga.

³¹ Omo vaIsalele vamwene nzili yakama ya Shukulu Kalunga yahyanene nayo vaka-Ingito, vakomokele Shukulu Kalunga nakukulaela kuli ikeye nakukulaela lalo muli ngamba yendi Mosesa.