Kutuuka 13 - Livulu lya Shukulu Kalunga

Kukundika va ntwatwa

¹ Shukulu Kalunga wendekele kuli Mosesa ngwendi,

² “Kundika va ntwatwa voshe va vanalume kuli yange, omwo ntwatwa na ntwatwa wa munalume wa vaIsalele na ava va tusitu vakulivanga kusemuka vakundama kuli yange.”

Ciwano ca Makende Akujeneka Musima

³ Asinoni Mosesa wendekele kuli vanu ngwendi, “Anukeni litangwa eli, omwo a litangwa eli likelyo mwatundile mu Ingito kuje mwakele mu vunzinda. Eli likelyo litangwa lije Shukulu Kalunga wamituwisile na livoko lyendi lya nzili. Co kesi mulye makende akwaka musima.

⁴ A litangwa lya lelo, likelyo limunatundu mu Ingito, ku ngonde yakulivanga ya Avive.

⁵ Omwo Shukulu Kalunga akamitwala mu lifuti lya vaKanana, na vaHiti, na vaAmoli, na vaHivi, na vaNjevushi, lifuti lije lyalisingile na vakukulwila veni kumyanalyo, lifuti lije lyalivwa, nevi vyakujenekamo vyai, co mukanyunga ciwano eci a mwaka na mwaka ku ngonde yakulivanga.

⁶ Ngecivene, munapande kulya makende akujeneka musima a matangwa atanu na avali, co a litangwa lyamucitanu na avali lingileni Shukulu Kalunga ciwano cakumulemesa.

⁷ Omwo a matangwa atanu na avali kumwapandele kulya makende akwaka musima, kesi kukakale musima nameme makende a musima mu lifuti lyeni lyoshe.

⁸ Omo ciwano cishangumuka, lekeni vana veni va vanalume ngweni mukalinga eci omwo a vyuma vije vyalingile Shukulu Kalunga kuli yeni akumitundisa mu Ingito.

⁹ Ngecivene, kunyunga eci ciwano cikapwa canukiso, ngwe cuma cakukutiiya ku livoko lyeni nambe a luholo lweni. Cikamyanukisa ngeci mukatwaleo mukwambulula Lishiko lya Shukulu Kalunga na vilongesa vyendi, omwo Shukulu Kalunga wamitundisile mu Ingito na livoko lyendi lya nzili.

¹⁰ Co nyungeni vilongesa vya ciwano eci a mwaka na mwaka a simbu ije ivanacimika.

Va ntwatwa

¹¹ “Shukulu Kalunga akamitwala mu lifuti lya vaKanana, lije lyalisingile nakumikulaesalyo, yeni na vakukulwila veni. Omo akamyanalyo,

¹² co munapande kulambula mwana woshe wa munalume wa ntwatwa kuli Shukulu Kalunga. Vimuna veni va nkomba vakulivanga kusemuka vanakundama kuli Shukulu Kalunga,

¹³ oloni munapande kukula cimulu woshe wa nkomba wakulivanga kusemuka nakulambula muna manga mu mwela wendi. Nga kuushaka kukula uje cimulu, co mupokole mukoshi. Co lalo munapande kukula vana veni voshe va vanalume va va ntwatwa.

¹⁴ Kulutwe, omo munove wa munalume akakwihula a lishiko eli ngwendi linanunguluka vatijo, co ukamukumbulula ngwove, ‘Shukulu Kalunga watutundisile mu Ingito na livoko lyendi lya nzili, muje twakele mu lifuti lya vunzinda.

¹⁵ Omo mwene wa Ingito wakaluwisile mbunge yendi wavyanene kutwecela ngeci tuye, co Shukulu Kalunga watsiile va ntwatwa voshe va vanalume mu lifuti lya Ingito, amo na vimuna va nkomba vakulivanga kusemuka. Omu mukemwo mutukakombelelela Shukulu Kalunga cimuna woshe wa nkomba wakulivanga kusemuka, oloni tukakula vana vetu va ntwatwa va vanalume.

¹⁶ Lishiko eli likapwa canukiso, ngwe cuma cakukutiiya a mavoko eni nambe ku maholo lweni, likatwanukisa ngeci Shukulu Kalunga watutundisile mu Ingito na livoko lyendi lya nzili.’ ”

Manda ya lishelwa na manda ya tuhya

¹⁷ Omo mwene wa Ingito wecelele vanu va Isalele vaye, Njambi kavetisile mu tapalo yakuya ku cikuma ca ku Filisitiya, nameme ikeyo yapwile ngila yaihi. Njambi wayongwele ngwendi, “Kunjishaka ngwange vanu vatengulule viyongola vyavo veluke ku Ingito omo vakamona ngeci valinakuya nakulwa.”

¹⁸ Ngecivene, Njambi wavendesele mu ngila yakulizenga yakwita mu mambo ku Lishali lyakuvenga. Co vaIsalele voshe vambatele vitwa vya nzita.

¹⁹ Mosesa wambatele muvila wa Yosefa, ngwe Yosefa wavasingisile cisingo ca cikulaeso ngeci vakacilinge, omwo ikeye wendekele ngwendi, “Omo Njambi akamipatula, mwapande kwambata muvila wange nakuutundisa ku mutambela uno.”

²⁰ Co vaIsalele vatundile ku Sukote, vakatungile cilombo cavo ku Etame kumukulo wa mambo.

²¹ A simbu ya mutanya Shukulu Kalunga watwamene kulutwe lwavo mu manda ya lishelwa nakuvamwesa ngila, co a simbu ya vutsiki watwamene mu manda ya tuhya nakuvatwila ceke, ngeci vase kwenda vutsiki na mutanya.

²² Co manda ya lishelwa yavatwamenene ku mutanya, na manda ya tuhya yavatwamenene ku vutsiki, simbu yoshe kuvyavasezele.