Kutuuka 12 - Livulu lya Shukulu Kalunga

Ciwano ca Pasovala

¹ Shukulu Kalunga wendekele kuli Mosesa na Alone mu Ingito ngwendi,

² “Ngonde eyi ikapwa ngonde yakulivanga a mwaka kuli yeni.

³ Lekeni mbunga yoshe ya Isalele ngeci a litangwa lyamulikumi ku ngonde eyi, munu na munu akaangule muna manga nambe muna membe ngwe ku naanga yendi.

⁴ Co nga mu naanga yendi vapwa vavandondo kumanesa kulya uje cimuna woshe wamutunu, co vakalipangelaye na vandambo vendi vaje vanalyata navo, ngwe ku vungi vwa vanu nakumona ngeci munu na munu alya vungai.

⁵ Munapande kwangula manga nambe membe, oloni napande kupwa nkomba wa mwaka umo wakujeneka kapenga.

⁶ Ngecivene, mukavanyunga noo a litangwa lyamulikumi na awana ku ngonde, co ku cingwezi mbunga yoshe ya Isalele vakatsiye vaje vimuna.

⁷ Asinoni vanu vakanoneko amo maninga nakuwakwita a vivuliko vya vikolo na akamwa ya vipamba ku vinjuvo kuje kuvakalila vaje vimuna.

⁸ Co a vutsiki vuje vene vakalya ije situ yakwoca, vakailye amo na visapa-sapa vyakulula amo na makende akujeneka musima.

⁹ Kesi muyilye yaivishu nambe yakuteleka, oloni yoshe ipwe yakwoca, amo na mutwe, na mendi, na vya mwimo.

¹⁰ Kumwapandele kusezako imo noo mutondo, nga kunasala imo, co mwapande kuyenyeka.

¹¹ Mukailya vwasi-vwasi oku munazala vuzalo vwakwenda navwo, na vin̄aku ku mendi eni, na milamu yeni ku mavoko. Cikeco Ciwano ca Pasovala cakunjilemesa yange Kalunga.

¹² “A vutsiki vuje njikaita mu lifuti lya Ingito, njikatsiya vana va vanalume voshe va va ntwatwa va vanu, na ava va tusitu vakulivanga kusemuka. Co njikahisa vinjambi voshe va mu Ingito, yange njapwa Kalunga.

¹³ Maninga aa vipamba anapu cizivukiso ca cimweso mu vinjuvo evi mulinakukala. Omo njikamonao maninga, co njikamijomboka, kunjikamivulumuna omo njikahisa vaka-Ingito.

¹⁴ Munapande kulisamba a litangwa eli omwo likapwa lya ciwano ca Kalunga mukumyanukisa a vyuma evi vinjalingile yange Kalunga. Eci cikapwa canukiso mu visemwa vyeni vyoshe vya kulutwe.”

Ciwano ca Makende Akujeneka Musima

¹⁵ Shukulu Kalunga wendekele ngwendi, “A matangwa atanu na avali kumwapandele kulya makende akwaka musima. Lyeni lika makende akujeneka musima. A litangwa lyakulivanga munapande kutundisa musima woshe mu vinjuvo vyeni, nga umo a simbu ya matangwa aje atanu na avali alya makende akwaka musima, co ikeye kakapu lalo umo wa vanu vange.

¹⁶ A litangwa lyakulivanga, co lalo a litangwa lyamucitanu na avali, mukakunguluka nakunjilemesa. Co kesi mukapange a matangwa aje, oloni kuvwaesa lika vyakulya.

¹⁷ Nyungeni Ciwano ca Makende Akujeneka Musima omwo a litangwa eli likelyo njatundisile miyati yeni mu Ingito. Eci cikapwa canukiso mu visemwa vyeni vyoshe vya kulutwe.

¹⁸ Kumwapandele kulya makende akwaka musima, kutunda ku cingwezi ca litangwa lyamulikumi na awana ku ngonde yakulivanga, kutwala ku cingwezi ca litangwa lyamumakumi avali na limo.

¹⁹ Kesi mukakale musima mu vinjuvo vyeni a matangwa aje atanu na avali, co nga umo weni alya cuma coshe-icoshe cakwaka musima kakapu lalo umo wa vanu vange, nambe kavushoko keni nambe muka-kwija.

²⁰ Kesi mulye cuma coshe cakwaka musima, lyeni lika makende akujeneka musima yeni voshe.”

Ciwano cakulivanga ca Pasovala

²¹ Asinoni Mosesa wasanene vakulunu voshe va Isalele, wendekele kuli vakevo ngwendi, “Munu na munu aangule muna manga nambe muna membe, co mutsiyeni, ngeci naanga yeni valisambe a Ciwano ca Pasovala.

²² Co noneni kacishamo ka hisope, kambwitikeni mu lilonga muje muli maninga a cimuna, kwiteni aje maninga a vivuliko vya cikolo na akamwa ya cipamba ca njuvo, naumo wai akatuuka anja ya njuvo noo mutondo.

²³ Omo Shukulu Kalunga akaita mu Ingito nakutsiya vaka-Ingito, co ikeye akamona maninga a cipamba ca cikolo ca njuvo, co kakatavesa uje Kangelo Muka-kutsiya kukovela mu vinjuvo vyeni nakumitsiya.

²⁴ Yeni, na vatekulwila veni, munapande kwononoka lishiko eli lya canukiso ku myaka yoshe ya kulutwe.

²⁵ Co omo mukakovela mu lifuti lije Shukulu Kalunga walikulaesele kumyanalyo, munapande kunyunga cilika eci.

²⁶ Omo vana veni vakamihula ngwavo, ‘Cilika eci cinemanena vikajo?’

²⁷ Co mukavakumbulula ngweni, ‘Eci cinemanena kukombelela cimuna wa Ciwano ca Pasovala mukusingimika Shukulu Kalunga, omwo ikeye wajombokele a vinjuvo vya vaIsalele mu Ingito. Watsiile vaka-Ingito, oloni yetu watusezeleo.’ ” Co vaIsalele vatsikamene a mavuli nakulemesa.

²⁸ Asinoni vanu va Isalele valingile vije vyashikile Shukulu Kalunga kuli Mosesa na Alone.

Kutsa kwa va ntwatwa va vaka-Ingito

²⁹ Mukati ka vutsiki Shukulu Kalunga watsiile va ntwatwa voshe va vana va vanalume mu Ingito, kushangumukila kuli muna mwene uje akashwana a litanda kweta, na kuli muna cinzinda mu kamenga, co watsiile lalo vana va vimuna va nkomba vakulivanga kusemuka.

³⁰ Co ku vutsiki vuje, mwene na vamyata vendi, na voshe vakwavo vaka-Ingito vakasumukile. Co kwakele kulila kwakama manene mu Ingito, omwo kukwakele njuvo imo yasaleleo yakujeneka kutsa mwana wa ntwatwa wa munalume.

³¹ Vutsiki vuje vene, mwene wasanene Mosesa na Alone wendekele ngwendi, “Tundeni, yeni na vaIsalele! Sezeni lifuti lyange! Yeni mukalemese Shukulu Kalunga, ngwe mumwalombele.

³² Yeni amo na vimanga veni, na vimembe, na vingombe ngwe mumunendeka. Co lalo njilombeleleniko civezikiso.”

³³ Vaka-Ingito vasindiiye vanu ngeci vazambule kutunda mu lifuti, co vendekele ngwavo, “Yetu voshe tukatsa nga kumutundumo muno.”

³⁴ Ngecivene, vanu vashulisile vitikilo vyavo na mikasha ya musima, co vavizengelele a vinanga, vavyambatele a vitsili vyavo.

³⁵ Co vaIsalele valingile ngwe mwavalekele Mosesa, valombele vaka-Ingito vyakuzala vya senga vya ngolinde na siliva na vuzalo lalo.

³⁶ Shukulu Kalunga walingisile vaka-Ingito kusingimika vanu va Isalele kuvana vije vivavalombele. Mu ngila eyi mukemwo vaIsalele vambatele vufuko vwa vaka-Ingito.

VaIsalele vatunda mu Ingito

³⁷ VaIsalele vatundile mu Lamesese a mendi vaile ku Sukote. Vanalume vapwile 600,000, kwakako vanakazi na vanike.

³⁸ Co mbunga yakama ya vanu veka vaile amo navo na matanga a vimanga, na vimembe, na vingombe.

³⁹ Vatikile makende akujeneka musima a mikasha ije vatundile nayo ku Ingito, omwo vavashekele cishitumukila mu Ingito, co kuvakele na simbu yakuvwaesela cimweja vyakulya vya vungenzi.

⁴⁰ VaIsalele vakele mu Ingito myaka 430.

⁴¹ Co a litangwa lije vene vamanesele myaka 430, miyati yoshe ya vanu va Shukulu Kalunga vatundile mu Ingito.

⁴² Vukevwo vutsiki vuje vwavanyungile Shukulu Kalunga omo wavatuwisile mu Ingito. Ovu vukevwo vutsiki vumo vwakulikundika kuli Shukulu Kalunga ku visemwa vyoshe vya kulutwe, vutsiki vuje vaIsalele vanapande kuvunyunga.

Mashiko aa Ciwano ca Pasovala

⁴³ Co Shukulu Kalunga wendekele kuli Mosesa na Alone ngwendi, “Awa akewo mashiko aa Ciwano ca Pasovala. Kukwesi muka-kwija akalya ku vyakulya vya Ciwano ca Pasovala,

⁴⁴ oloni ndungo asa kulyako nga akulivanga munamutuula.

⁴⁵ Oloni munu uje naija nakukala neni kasimbu lika, nambe uje naija lika mukupanga, kesi alyeko.

⁴⁶ Vyakulya evi vakavilile lika mu njuvo muje muvanavivwaeselele, kesi vakavituwise anja embwe. Co kesi mukapokole lalo citsiya ca uje cimuna.

⁴⁷ Mbunga yoshe ya Isalele vanapande kunyunga ciwano eci,

⁴⁸ oloni kukwesi munu wakujeneka kutuuka akalyako. Nga muka-kwija natungu akati keni ashaka kulisamba a Ciwano ca Pasovala mukulemesa Shukulu Kalunga, co munapande akulivanga kumutuula na vanalume voshe va ku njuvo yendi. Asinoni mukamupangesa ngwe umo wa vaIsalele, co akakala amo neni mu ciwano.

⁴⁹ Kukakala lishiko limo kuli vanu va Isalele na kuli vaka-kwija ava vanatungu akati keni.”

⁵⁰ Co vaIsalele voshe vononokele nakulinga vije vyashikile Shukulu Kalunga kuli Mosesa na Alone.

⁵¹ A litangwa lije Shukulu Kalunga watuwisile miyati ya vaIsalele kuvatundisa mu Ingito.