Kutuuka 10 - Livulu lya Shukulu Kalunga

Cikomokeso camucitanu na vitatu ca vimbimba mikumbi

¹ Asinoni Shukulu Kalunga wendekele kuli Mosesa ngwendi, “Ya ukaliwane na mwene, omwo njinakaluwisa mbunge yendi na vimbunge vya vamyata vendi, ngeci njilinge vikomokeso evi mukati kavo,

² ngeci mukase kukalekako vana veni na vatekulyeni omu munjinapwisa vaka-Ingito vikolokomba omo akulinga vikomokeso akati kavo. Co yeni voshe mukazivuka ngweni kuma yange njapwa Kalunga.”

³ Ngecivene, Mosesa na Alone vaile kuli mwene vendekele kuli ikeye ngwavo, “Shukulu Kalunga Njambi ya vaHevelu nendeka ngwendi, ‘Visimbu vingaijo ukavyana kulikeesa ku mesho ange? Ecela vanu vange vaye ngeci vakanjilemese.

⁴ Nga ucili nakutwalao kuvyana kuvecela ngeci vaye, imene njikanena vimbimba mikumbi mu lifuti lyove.

⁵ Co vakevo vakapwa vavangi manene vakashula asi oshe. Vakalya vyoshe vije vyasaleleo kukuziluka ku nyonzi ya mamanya, nameme ku miti ije yasalele mu mahya eni.

⁶ Co vakashula mu lipela lyove na mu vinjuvo vya vamyata vove na mu vinjuvo vya vaka-Ingito mwoshe nambe vakukuyeni nameme vakukulwila veni kuvavamwene kutunda a litangwa lije vashangumukile kukala ano asi.’ ” Asinoni Mosesa wakatukile nakuya.

⁷ Co vamyata va mwene vendekele kuli mwene ngwavo, “Visimbu vingaijo munu ou akatuyandesa? Ecela vanalume va vaIsalele vaye vakalemese Shukulu Kalunga Njambi yavo. Kuma yove kuwanangukile ngwove Ingito yanyongo ndi?”

⁸ Asinoni Mosesa na Alone vavelwisilile lalo kuli mwene, co mwene wendekele kuli vakevo ngwendi, “Yeni mukaye nakulemesa Shukulu Kalunga Njambi yeni. Olojo veya vamo vakaya?”

⁹ Mosesa wamukumbulwile ngwendi, “Yetu voshe tukaya, amo na vana vetu na tukulukazi vetu. Tukaya na vana vetu va vanalume, na ava va vanakazi, na vimanga vetu, na vimembe vetu, na vingombe vetu, omwo tunapande kulinga ciwano cakulemesa Shukulu Kalunga.”

¹⁰ Mwene wendekele ngwendi, “Njilisinga ali Shukulu Kalunga ngeci kumukai na vanakazi veni na vana veni! Mwa vushunga casholoka ngeci yeni muli na munga yakutulwisa.

¹¹ Embwe! Kukaya lika vanalume mukulemesa Shukulu Kalunga amo eci cikeco munakala nakulomba.” A cuma eci, Mosesa na Alone vavashekele ku mesho a mwene.

¹² Asinoni Shukulu Kalunga wendekele kuli Mosesa ngwendi, “Olola livoko lyove akamwa ya lifuti lya Ingito ngeci kusholoke vimbimba mikumbi. Co vakevo vakaija nakulya vyuma vyoshe vije vilinakumena, mu mahya, na vyuma vyoshe vije vyasaleleo ku nyonzi ya mamanya.”

¹³ Ngecivene, Mosesa wajundwile mulamu wendi, co Shukulu Kalunga wahuwisile lihunzi lyakutunda mu ngangela lyahuhwile mu lifuti litangwa lyoshe na vutsiki vwoshe. Co ku mutondo lyanenele vimbimba mikumbi.

¹⁴ Co vezile mu vinjame valundamene mu lifuti lyoshe. Vyapwile vinjame vyakama manene vya vimbimba mikumbi ngeci naumo wai wavimwene ku simbu ya kunima nambe kuvikasholoka lalo ku simbu ya kulutwe.

¹⁵ Co vimbimba vashulile asi oshe noo azivalele na vakevo, co valile vyuma vyoshe vije vyasalele ku nyonzi ya mamanya, na vyoshe vije vyamenene mu mahya kuwezelelako na vushuka vwa ku miti. Kukwakele cuma cimo cakuzivuluka casalele ku muti nambe vyakumena mu lifuti lyoshe lya Ingito.

¹⁶ Asinoni mwene wasanene vwasi-vwasi Mosesa na Alone wendekele ngwendi, “Njinalingi vuvi ku mesho a Shukulu Kalunga Njambi yeni na ku mesho eni.

¹⁷ Co ololo njisambeseni ku vuvi vwange lalo, co lombeleni kuli Shukulu Kalunga Njambi yeni ngeci atundise cihiso ca kutsa eci kuli yange.”

¹⁸ Asinoni Mosesa watundile kuli mwene, co walombelele kuli Shukulu Kalunga.

¹⁹ Co Shukulu Kalunga watengulwile lihunzi lya mu ngangela kupwa lihunzi lyakama manene lya mu kangombe ka yambi, co lyakupekumwine vimbimba mikumbi nakuvalundumwina mu Linema lya Suwezi. Co kukwasalele lalo mbimba mukumbi umo mu Ingito mwoshe.

²⁰ Oloni Shukulu Kalunga wacikaluwisile lalo mbunge ya mwene, kavatavele ngeci vaIsalele vaye.

Cikomokeso camucitanu na viwana ca lisusulungu

²¹ Asinoni Shukulu Kalunga wendekele lalo kuli Mosesa ngwendi, “Jundula livoko lyove ulikengese mwilu, ngeci kwije lisusulungu lyakuzivala manene vwii mu lifuti lyoshe lya Ingito.”

²² Ngecivene, Mosesa wajundwile livoko lyendi mwilu, co kwezile lisusulungu lyakuzivala vwii mu lifuti lya Ingito matangwa atatu.

²³ Co vaka-Ingito kuvasele kulimona umo na mukwavo, co naumo wai lalo watundile mu njuvo yendi a matangwa atatu. Oloni vaIsalele vakele mu ceke kuje kuvakele.

²⁴ Asinoni mwene wasanene Mosesa wendekele kuli ikeye ngwendi, “Mwasa kuya nakulemesa Shukulu Kalunga, nameme vanakazi veni na vana veni vaye amo neni. Oloni vimanga veni, na vimembe veni, na vingombe veni vinapande kusala muno.”

²⁵ Oloni Mosesa wamukumbulwile ngwendi, “Ngangoconi, twane vimuna vatukakombelela kuli Shukulu Kalunga Njambi yetu na milambu ya kwenyeka.

²⁶ Embwe, tukaya amo na vimuna vetu, naumo wai akasala, nameme cimuna umo kakasalamo muno embwe. Yetu vavenya tunapande kwangula vimuna vaje tukalemesa navo Shukulu Kalunga Njambi yetu, omwo kutwasa kuzivuka vimuna vaje tukakombelela kuli ikeye kuvanga noo tunete kuje.”

²⁷ Co Shukulu Kalunga wakaluwisile mbunge ya mwene, kavatavele ngeci vaye.

²⁸ Co mwene wendekele kuli Mosesa ngwendi, “Tunda ku mesho ange! Kesi njikakumone lalo! A litangwa njikakumona, co ukatsa!”

²⁹ Mosesa wamukumbulwile ngwendi, “Unendeka mwamuvwa. Kuukanjimono lalo yange.”