Kushangumuka 9 - Livulu lya Shukulu Kalunga

Cikumiiyo ca Njambi na Nowa

¹ Njambi wavezikisile Nowa na vana vendi, co wendekele ngwendi, “Kiteni nakutuma, ngeci vatekulwila veni vakashule ano asi oshe.

² Co tusitu voshe, na tuzila, na visi vakamizivila lyova nakumitewa, voshe njinavakundika mu mavoko eni.

³ Ololo mwasa kulya tusitu voshe, na tuzila voshe, na visi voshe, ngwe omo njamyanene visapa-sapa, mukemwo munjinamyana evi vyoshe kupwa vyakulya vyeni.

⁴ Oloni kumwapandele kulya situ na maninga ayo, omwo mwonyo wayo uli mu maninga.

⁵ Nga munu akatsiya mukwavo, co munu uje njikamusompela kutsa, nambe kasitu woshe-iwoshe akatsiya munu, njikamusompela kutsa.

⁶ Woshe uje akatsiya munu nendi lalo vakamutsiya kuli munu, omwo Njambi watangele munu mu cifwa cendi.

⁷ “Kiteni mutume, ngeci vatekulwila veni vakashule ano asi oshe.”

⁸ Njambi wendekele kuli Nowa na vana vendi ngwendi,

⁹ “Kengeni ololo njilikumiiya cikumiiyo amo nove na vatekulwila vove,

¹⁰ na vyoshe vyakuyoya, tuzila voshe na tusitu voshe, na vimuna voshe, na vyuma vyoshe vije vyatuukile mu vwato amo nove.

¹¹ Njilikumiiya cikumiiyo na majwi awa, ‘Njimikulaesa ngwange kukukakala lalo livazi lyakunyongesa vyoshe vyakuyoya. Co lalo kukukakala livazi lyakunyongesa asi oshe embwe.’ ”

¹² Njambi wendekele ngwendi, “Eci cikeco cizivukiso ca cikumiiyo ca myaka yoshe, eci njilikumiiya akati kange neni, na vyuma vyoshe vyakuyoya.

¹³ Njilinakwaka nkongolo yange mu mashelwa. Ikeyo ikapwa cizivukiso ca cikumiiyo cange akati kange na vaka-asi.

¹⁴ Cikapwa ngeci omo njikanena mashelwa, co na nkongolo ikasholoka,

¹⁵ co njikanuka cikumiiyo cange akati keni nange na ku tusitu voshe ngeci livazi kulikanyongesa lalo vyoshe vyakuyoya.

¹⁶ Omo nkongolo ikasholoka mu mashelwa njikaimona, co njikanuka cikumiiyo cange ca myaka yoshe akati kange na vyoshe vyakuyoya vije vili ano asi.”

¹⁷ Njambi wendekele kuli Nowa ngwendi, “Eci cikeco cizivukiso ca cikumiiyo cinjinalikumiiya akati kange na vyuma vyoshe vyakuyoya vije vili ano asi.”

Nowa na vana vendi va vanalume

¹⁸ Ava vakevo vana va Nowa vaje vatuukile mu vwato, mazina avo, Shemi, na Hama, na Njafeta. Hama ikeye wapwile ishe ya Kanana.

¹⁹ Co ava vana va Nowa vatatu, vakevo vakukulwila va vanu voshe va ano asi.

²⁰ Nowa wapwile ndimi, ikeye wapwile munu wakulivanga kukuna lihya lya mikolovozi ya vushuka vwa vinyu.

²¹ Co omo wanwile vinyu wapendele, ngeci washulwile vuzalo vwendi vwoshe, walalele mutotototo a vulili mu mbalaka yendi.

²² Omo Hama ishe ya Kanana, wamwene ngeci ishe nalala mutotototo, waile nakukalekako vandolome vendi vavali.

²³ Ngecivene, Shemi na Njafeta vambatele nanga a vitsili vyavo, co vendele vuseta-nima. Co vaifwikile ishavo, oloni vakengeseleko nima ngeci kesi vamone mushelengwa wa ishavo.

²⁴ Omo Nowa vinyu vyamuhwile, wamwene vije vyalingile munendi wa mutinikila,

²⁵ co wendekele ngwendi, “Cisingo cikale ali Kanana! Akapwe ndungo ya vandolome vendi.

²⁶ Vashangazale Shukulu Kalunga, Njambi ya Shemi! Oloni Kanana akapwa ndungo ya Shemi.

²⁷ Njambi aamese Njafeta! Na vatekulwila vendi vayoye na vanu va Shemi. Oloni Kanana akapwa ndungo ya Njafeta.”

²⁸ Omo livazi lineti, Nowa wayoyele myaka 350,

²⁹ co watsile omo wakele na myaka 950.