Kushangumuka 8 - Livulu lya Shukulu Kalunga

Kuhwa kwa livazi

¹ Oloni Njambi wanukile Nowa na tusitu voshe na vimuna voshe vaje vakele amo nendi mu vwato, co Njambi wauwisile lihunzi asi, mema ashangumukile kuuvuluka.

² Co tuvwelu-vwelu twa mema a mwisi ya asi na vimbengwa vya mwilu vyashokele, na nyonzi yalikelele kunyoka,

³ co mema ashangumukile kuuvuluka. Omo kwetile matangwa 150 mema ovulukile.

⁴ A litangwa lyamulikumi na atanu na avali ku ngonde yamucitanu na vivali, vwato vwafungamene a munkinda umo wa minkinda ya ku Alalate.

⁵ Co mema akele nakuuvuluka, a litangwa lyakulivanga ku ngonde yamulikumi, vishongo vya minkinda vyasholokele.

⁶ Omo kwetile matangwa makumi awana, Nowa washokolwele njanena ya vwato,

⁷ co watumine likololo, oloni kelukile, wakele nakupulula lika noku-noku noo mema omine oshe cau.

⁸ A simbu ije vene, Nowa watumine katela ngeci akamone nga mema anomu cau.

⁹ Oloni uje katela kasele kuwana akutongama omwo mema kuwomine asi oshe, ngeci uje katela welukile ku vwato, co Nowa wamukwatele nakumukovelesa mu vwato.

¹⁰ Nowa wetisilemo lalo matangwa atanu na avali, asinoni watumine lalo katela asi.

¹¹ Co ku cingwezi katela welukile kuli Nowa na liputa lyakutonola lya olive ku kanwa kendi. Ngecivene, Nowa wazivukile ngwendi mema ololo anomu asi.

¹² Co Nowa wetisilemo matangwa atanu na avali, co watumineo lalo uje katela. A simbu ije katela kelukile lalo kuli Nowa.

¹³ A litangwa lyakulivanga ku ngonde yakulivanga, omo Nowa wakele na myaka 601, wafukwile ciluli cije cafwikile a vwato, co wakengele noku-noku, wamwene ngeci livu linomu.

¹⁴ A litangwa lyamumakumi avali na matangwa atanu na avali ku ngonde yamucivali asi omine oshe cau.

¹⁵ Njambi wendekele kuli Nowa ngwendi,

¹⁶ “Tuuka mu vwato na munakazi wove, na vana vove, na vanakazi vavo.

¹⁷ Tuwisa tuzila voshe na tusitu voshe na vimuna voshe na vyoshe vyakulikoka asi, ngeci vakaseme nakutuma, nakushulisa ano asi oshe.”

¹⁸ Co Nowa watuukile mu vwato amo na munakazi wendi, na vana vendi, na vanakazi vavo.

¹⁹ Tusitu voshe na tuzila vatuukile mu vwato mu muyati wa vutanga vwavo.

Nowa akombelela n̄ombelo kuli Shukulu Kalunga

²⁰ Ngecivene, Nowa watungilile Shukulu Kalunga mutula, co wakwatele ku muyati umo na umo wa vimuna na tuzila vakulya, wavakombelelele kupwa n̄ombelo ya kwenyeka kuli Shukulu Kalunga.

²¹ Co omo Shukulu Kalunga wazivile vweko vwavuvwa vwa n̄ombelo eyi, wazivile kuvwaa, walyendekesele ikeye vavenya ngwendi, “Kunjikelukilamo lalo kusinga asi a vilinga vya vanu, omo njazivuka ngwange kutunda ku vwanike vwavo viyongola vya vimbunge vyavo vyapwa vyavivi. Kunjikelukilamo lalo kunyongesa vyakuyoya vyoshe ngwe omu njinalingi a simbu eyi.

²² Omo kaye kaciliko, kukakala simbu ya kukuna na simbu ya kuteja. Co simbu yoshe kukakala kutonola na ntwima, ndombo na cisika, mutanya na vutsiki.”