Kushangumuka 7 - Livulu lya Shukulu Kalunga

Livazi lyakama

¹ Shukulu Kalunga wendekele kuli Nowa ngwendi, “Kovela mu vwato, yove na naanga yove yoshe, omwo njawana ngwange yove lika muka-vushunga ku mesho ange mu cisemwa eci coshe.

² Ku tusitu voshe vakulya ambatako vatanu na vavali nkomba na lwavo. Co ku tusitu vaje vakujeneka kulya ambatako lalo nkomba na lwavo.

³ Co ku tuzila lalo ambatako vindemba vatanu na vavali na vyali vatanu na vavali. Linga eci ngeci muyati woshe wa kasitu na kazila ukayoye, ngeci vakasemunwine lalo ano asi.

⁴ Kunasala lika matangwa atanu na avali, co njikanyokesa nyonzi ije ikanyoka matangwa makumi awana mutanya na vutsiki, njikanyongesa vyakuyoya vyoshe vije vinjatangele.”

⁵ Co Nowa walingile vyuma vyoshe vije vyamushikile Shukulu Kalunga.

⁶ Nowa wakele na myaka 600 omo livazi lyezile ano asi.

⁷ Co Nowa na munakazi wendi, na vana vendi va vanalume, na vanakazi vavo, vakovelele mu vwato mukutewa livazi.

⁸ Tusitu va miyati yoshe vakulya, na ava kesi vakulya, nkomba na lwavo vakovelele mu vwato. Co lalo miyati yoshe ya tuzila vakulya na ava kesi vakulya, ndemba na cali,

⁹ voshe vakovelele mu vwato amo na Nowa, ngwe muje mwashikile Njambi.

¹⁰ Omo kwetile matangwa atanu na avali livazi lyezile.

¹¹ Nowa wakele na myaka 600, co a litangwa lyamulikumi na atanu na avali ku ngonde yamucivali, masima a tuvwelu-vwelu twakama twa mu mema a kalunga kwisi ya livu atuvikile na vimbengwa vyoshe vya mwilu vyashokolokele,

¹² co nyonzi yanyokele matangwa makumi awana mutanya na vutsiki.

¹³ A litangwa lije vene, Nowa na munakazi wendi na vana vendi vatatu, mazina avo, Shemi, na Hama, na Njafeta na vanakazi vavo, vakovelele mu vwato.

¹⁴ Co vakovelele amolika na miyati yoshe ya tusitu na vimuna vakama na vimuna vavandondo nkomba na lwavo, amo na tusitu vakulikoka, na tusitu vakulikoka asi. Na miyati yoshe ya tuzila ndemba na cali, vakovelele lalo mu vwato.

¹⁵ Ku miyati yoshe yakuyoya vambateleko vavali vavali, nkomba na lwavo, ndemba na cali, co voshe vakovelele mu vwato amo na Nowa,

¹⁶ voshe vaje vakovelele mu vwato vapwile nkomba na lwavo ngwe muje mwashikile Njambi. Asinoni Shukulu Kalunga washokele lipito lya vwato.

¹⁷ Ngecivene, livazi lyatwaleleo matangwa makumi awana mutanya na vutsiki, mema atumine na kulova, co vwato vwafumukile akamwa yawo.

¹⁸ Co mema atumine manene na kulova, ngeci vwato vwakele nakuungumuka akamwa ya mema.

¹⁹ Mema anga atumine manene, co minkinda yoshe yailaja yakupukile na mema,

²⁰ co mema atwaleleo noo apwile mamita atanu na avali mu vulaja vwa akamwa ya shongo ya minkinda.

²¹ Vyuma vyoshe vyakuyoya vije vyakele ano asi vyatsile, tuzila voshe, na tusitu voshe, na vimuna voshe na vanu voshe.

²² Na vyuma vyoshe vya mwonyo vije vyakele ano asi vyatsile.

²³ Co Shukulu Kalunga wanyongesele vyuma vyoshe vyakuyoya vije vyakele ano asi, vanu, na tusitu, na vimuna, na tuzila. Kuvanga Nowa, na voshe vaje vakovelele navo mu vwato vakevo lika vayoyele.

²⁴ Co mema akele lika, kuwovulukile noo matangwa 150.