Kushangumuka 6 - Livulu lya Shukulu Kalunga

Vuvi vwa vanu

¹ A simbu ije omo vanu vatumine manene ano asi oshe, co kwasemukile vana va vanakazi.

² Omo vamo vana va Njambi vamwene ngeci vana va vanakazi ava vapwile vavavwa manene, co vambateleo vamo akati kavo vaje vavashakeleo.

³ Co Shukulu Kalunga wendekele ngwendi, “Mwonyo wange kuukakala mu vanu ngeci vakayoye myaka yoshe embwe, omwo vanapu cisemwa ca vusitu lika. Kutunda ano kuvakayoyo kutuvakana myaka 120.”

⁴ A matangwa aje, omo vana va Njambi vambatele vana va vanakazi va vanu, vakitile navo vana, co vaje vatekulwila vapwile makisi-kisi. Vakevo vapwile vaka-nzili na lutsimo a simbu ije.

⁵ Omo Shukulu Kalunga wamwene ngeci vanu voshe ano asi vanaviya, na viyongola vya vimbunge vyavo simbu yoshe vyapwile vyavivi,

⁶ co walisimokele omwo watangele vanu nakuvaka ano asi. Co camuzeyesele manene ku mbunge

⁷ ngeci wendekele ngwendi, “Njikanyongesa vanu voshe ava njatangele, amolika na tusitu na tuzila, njalisimoka omwo njavatangele.”

⁸ Oloni Shukulu Kalunga wavwaelelele na Nowa.

Nowa

⁹ Eci cikeco cisemwa ca Nowa. Nowa wapwile munu wa vushunga, kawanene akumuvayesela akati ka vanu vaje vayoyele navo a simbu ije, co lalo mukuyoya kwendi wendele na kulitombola na Njambi.

¹⁰ Nowa wakitile vana vatatu va vanalume, mazina avo, Shemi, na Hama, na Njefeta.

¹¹ Oloni vanu voshe vapwile vavavi ku mesho a Njambi, co vuvi vwavo vwashulile ano asi oshe.

¹² Njambi wakengele a kaye wamwene ngeci ali vuvi omwo vanu voshe vayoyele mu vuvi.

¹³ Co Njambi wendekele kuli Nowa ngwendi, “Njayongola kuzilula vanu voshe. Njikavanyongesa voshe amolika na kaye, omwo kaye kanashulu na vilinga vyavo vyavivi.

¹⁴ Ngecivene, shonga vwato vwakama vwa mavaya amavwa, co vatozolamo milili. Vusalimbe na lipombosiwa anja na mukati.

¹⁵ Co mu vulaja vwavwo vupwe mamita 133, mu vwihi vwavwo vupwe mamita 22, mu kulova kwavwo vupwe mamita 13.

¹⁶ Co tungilao ciluli, oloni seza lyaana lyalindondo lya masentimita 44 mukati ka ciluli na luliva-liva lwa vwato. Vatulamo milili itatu, umo kwisi, na ukwavo akati, na ukwavo lalo kwilu. Co aka cikolo kumukulo.

¹⁷ Kenga, njikatuma livazi lyakama ano asi mukunyongesa vyoshe vije viyoyao. Vyuma vyoshe vili ano asi vikatsa,

¹⁸ oloni njikalikumiiya cikumiiyo nove. Co ukakovela mu vwato, yove na munakazi wove, na vana vove va vanalume, na vanakazi vavo.

¹⁹ Ku miyati yoshe ya tusitu angulako nkomba na lwavo, ngeci vakayoye.

²⁰ Co lalo ku miyati yoshe ya tuzila angulako ndemba na cali, ngeci vakakovele mu vwato vakayoye.

²¹ Co ambata ku miyati yoshe ya vyakulya, vyove nevi vyavo.”

²² Ngecivene, Nowa walingile vyoshe vije vyamushikile Njambi.