Kushangumuka 49 - Livulu lya Shukulu Kalunga

Yakomba avezikisa vana vendi va vanalume

¹ Asinoni Yakomba wasanene vana vendi va vanalume wendekele kuli vakevo ngwendi, “Ijeni njimileke evi vikalingiwa ali yeni kulutwe.

² “Ijeni mutolilile yeni vana va Yakomba, tolilileni kuli ishweni Isalele.

³ “Luvena, yove ntwatwa yange, yove wapwa nzili yange munange wakulivanga wa mu vukwenje vwange, munange wakulyakako na nzili yoshe kutuvakana vana vange voshe.

⁴ Yove wafwa ngwe mankimba a livazi, oloni yove kuukapu uwavulemu vwakama, omwo yove walalele na lishano lyange lya mbanja, co wazivisile shwamwa vulili vwa isho.

⁵ “Simyoni na Levi vakevo mu vundolome vwavo, mikwale yavo yapwa vitwa mukuvulumuna.

⁶ Kunjikalipandakana navo muvisimutwiya vyavo vya mu vushweke, nambe kunjikakala navo mu vikungulukilo vyavo, omwo vakevo vatsiile vanu mu vukalu, co na mu vuuka vwavo vatetangele makana a vin̄unzi.

⁷ Cisingo cikale a vukalu vwavo, omwo vunapu vwakukomokesa manene, cisingo cikale a vukalu vwavo, omwo vunapu vwa muuka. Njikavaangunwina mu lifuti lyoshe lya Yakomba, nakuvashandwela akati ka vanu vaIsalele.

⁸ “Yunda, vandolome vove vakakushangazala, yove ukakwata vitozi vove a singo, vamunyanyoko vakakutsikamena nakukulemesa.

⁹ Yunda napu ngwe ndumba, atsiya evi akwata, elukila lalo ku mbulu yendi. Alyolola nakulala naumo wai asimpa ngeci amukasumune.

¹⁰ Mulamu wa vumwene kuukatundu kuli Yunda, nambe mulamu wa muka-kushwana kuukatundu ku vatekulwila vendi, noo vavenyawo naija, miyati ya vanu vakamwononoka.

¹¹ Ikeye akakuta muna cimulu cendi ku mukolovozi wa vushuka vwa vinyu, ukewo wapwa wauvwa manene ku mikolovozi ya vushuka vwa vinyu. Ikeye akakushu vuzalo vwendi mu vinyu vyakuvenga ngwe maninga.

¹² Mesho endi akavenga ngengu omwo kunwa vinyu, na mayo endi akatoka too omwo kunwa mavele.

¹³ “Zembuloni ikeye akakala ku ngenge ya mema a kalunga. Cikuma cendi cikapwa cakututikila mato akama. Lifuti lyendi liketa na ku Sindone.

¹⁴ “Isakale ikeye napu ngwe cimulu wa nzili alala nakuvutama mukati ka visileyi,

¹⁵ wamwene kuje kwakuhwimina kunapu kwakuvwa na lifuti linapu lyalivwa. Ngeci akulama nakwambata citele nakumusindiya kupanga ngwe ndungo.

¹⁶ “Ndani ikeye akapwa muka-kushwana vanu vendi, ngwe miyati ikwavo ya Isalele.

¹⁷ Ndani akapwa ngwe linyoka kumukulo wa tapalo, limbwambwa wa vushungu vwa vukalu kumukulo wa ngila, uje ashuma ku mbemba ya kavalu, ngeci uje alondao andumukile kunima.

¹⁸ “Njavandamena kwamena kwove, yove Shukulu Kalunga.

¹⁹ “Ngande vakamulwisa ku mbunga ya vaka-kwiva, oloni ikeye akatenguluka nakuvasheka.

²⁰ “Lifuti lya Ashele likatumisa manene vyakulya vyavivwa, ikeye akakala na vyakulya vinapande kuli mwene.

²¹ “Nafetali napu ngwe shonge wakulyendela ngoco, ou asema vinzova vavavwa.

²² “Yosefa napu ngwe ngolo wakukundama ku lisima lya kavwelu-vwelu, muna ngolo wa ku mutambela wa ku lilundu.

²³ Vitozi vendi vakamulwisa na vukalu nakumusheka na mata avo a lusipa na mikili.

²⁴ Oloni vuta vwendi vwa lusipa vukapwa vwakukola ngo, mavoko endi akapwa a nzili, omwo a nzili ya Njambi Muka-nzili yoshe, ikeye Njambi ya Yakomba, nomwo a nzili ya Kanyungi, ikeye Cimpaka ca Isalele.

²⁵ Ikeye Njambi ya vaishweni, ou alinakumikwasa, Njambi Muka-nzili yoshe, ou alinakumivezikisa na vivezikiso vya nyonzi ilinakutunda kwilu na mema akulova alinakutunda mwisi ya livu, na vivezikiso vya vimuna vavangi na vanike.

²⁶ Vivezikiso vya vimbuto na vishani, vivezikiso vya minkinda yalaja vyuma vyakuvwaelelesa, vyakutunda ku malundu a ku myaka yoshe. Ngeci vivezikiso evi vikale ali Yosefa, uje waangukile kuli vandolome vendi.

²⁷ “Mbenjemani wapwa ngwe kangunga muka-kutsiya. Mutondo na cingwezi ikeye alinakutsiya nakulya.”

²⁸ Eyi ikeyo miyati ya Isalele likumi na ivali, omu mukemwo mwendekele ishavo omo wavezikisile vana vendi umo na umo civezikiso cije cinamupande.

Yakomba atsila mu Ingito, kumutsinda mu Kanana

²⁹ Asinoni Yakomba washikile vana vendi ngwendi, “Ololo njilinakutsa, co mukanjitsinda amo na vatate mu linzenzengoma lije lyakala mu lihya lya Efelone kaHiti,

³⁰ ku Makepela mu ngangela mu lifuti lya Kanana. Avilahama walandele linzenzengoma lije na lihya kuli Efelone kupwa livu lya vimbumbo.

³¹ Kuje kukekwo vatsindile Avilahama na munakazi wendi Sala, kukekwo lalo vatsindile Isake na munakazi wendi Lembeka, co kuje kukekwo lalo njatsindile Leya.

³² Lihya na linzenzengoma lije lilimo vavilandele kuli vaHiti, ngeci mukanjitsindemo.”

³³ Omo Yakomba wamanesele kushika vana vendi, welwisile mendi endi a vulili, co watsile.