Kushangumuka 42 - Livulu lya Shukulu Kalunga

Vandolome va Yosefa vaya ku Ingito nakulanda tiliku

¹ Omo Yakomba wazivile ngeci ku Ingito kuli tiliku, co wendekele kuli vana vendi ngwendi, “Vikajo mwalikengelela ngoco ngacije?

² Njazivi ngwavo ku Ingito kuli tiliku. Yeniko mukalandeko vyakulya ngeci kesi tulanduke ku njala.”

³ Ngecivene, vandolome va Yosefa likumi vaile ku Ingito nakulanda tiliku.

⁴ Oloni Yakomba katumine Mbenjemani shongo ya Yosefa amo na vandolome vendi, omwo wakele na lyova ngwendi amo kukakala cuma cimo cikalingiwa ali ikeye.

⁵ Vana va Yakomba vaile amo na vakwavo nakulanda tiliku, omwo kwakele njala ya lyangengela mu lifuti lya Kanana.

⁶ Yosefa wapwile mwata wakama mu lifuti lya Ingito, ikeye wakele nakulandesa tiliku kuli vanu voshe va mu kaye. Co vandolome va Yosefa vezile nakutsikama a mavuli nakulemesa ku mesho endi.

⁷ Omo Yosefa wamwene vandolome vendi, wavazivukile, oloni walingile ngwe kavazivuka, wavehwile na vukalu ngwendi, “Yeni mutunda kulijo?” Co vamukumbulwile ngwavo, “Tulinakutunda ku Kanana tunaija nakulanda vyakulya.”

⁸ Nameme Yosefa wazivukile vandolome vendi, oloni vakevo ni kuvamuzivukile.

⁹ Yosefa wanukile vije vinjozi vyalotele ali vakevo, co wendekele ngwendi, “Yeni munapu vaka-kunenga lifuti, ngeci muwane akukovelela.”

¹⁰ Vamukumbulwile ngwavo, “Embwe shukulu. Yetu vindungo vove tunaija kuno nakulanda vyakulya.

¹¹ Yetu voshe tunapu vana va munu umo. Kesi yetu vaka-kunenga lifuti, embwe shukulu. Twapwa vanu va vushunga.”

¹² Yosefa wendekele kuli vakevo ngwendi, “Embwe! Yeni munaija mukuwana vukovelelo mu lifuti lyetu.”

¹³ Vakevo vendekele ngwavo, “Yetu vangamba vove twapwile mu vundolome vwetu likumi na vavali. Tuvavoshe tu vana va munu umo mu lifuti lya Kanana. Ndolome yetu umo watsa, co mutinikila wetu nasala na tate.”

¹⁴ Oloni Yosefa wavakumbulwile ngwendi, “Ngwe omo vene njinendeka, yeni munapu tunenga va lifuti.

¹⁵ Eyi ikeyo ngila njikamyeseka nayo. Njilisinga mu lizina lya mwene ngeci yeni kumwiluka kuvanga shongo yeni naija kuno.

¹⁶ Tumeni umo weni ngeci aye akamushake. Co yeni munasalao vakaminyungila mu kamenga noo kunasholoka vushunga ngwe omwo mulinakwendeka. Nga ngoconi, mwa vushunga ngwe mwayoya mwene, mwa vushunga vene yeni munapu tunenga va lifuti.”

¹⁷ Asinoni Yosefa wavaakele mu kamenga matangwa atatu.

¹⁸ Co a litangwa lyamucitatu Yosefa wendekele kuli vandolome vendi ngwendi, “Yange nji munu wakuzivila Njambi lyova, njikamena myonyo yeni a cuma cimo.

¹⁹ Nga munapu mu vanu va vushunga, umo weni asale mu kamenga muje mumunakele, co yeni munasalao ilukeni mutwale tiliku eyi munalanda ku naanga yeni, vaje valinakutsa ku njala.

²⁰ Munapande kwija na shongo yeni kuno kuli yange, ngeci vukaleo vweni vwakusholoke ngeci mwanjileke vushunga, cooni kunjikamitsii.” Vakevo vatavele a cuma eci,

²¹ co valyendekesele akati kavo ngwavo, “Eyo, ololo tulinakuyanda ali vije vitwalingile kuli ndolome yetu. Twamumwene ali mu tuyando twakama manene omo watulombele ngeci tumukwase, oloni kutwamutolililile. Ngecivene, tuli mu tuyando otu ololo.”

²² Co Luvena wavakumbulwile ngwendi, “Kunjamilekele ngwange, kesi muvulumune ou mukwenje ndi? Oloni yeni mwavyanene kunjitolilila. Co ololo tulinakutambula fweto omwo a kutsa kwendi.”

²³ Yosefa wazivile vije vakele nakwendeka, oloni vakevo kuvacizivukile omwo vakele nakwendeka kuli ikeye mukuvanungulwila.

²⁴ Yosefa wavasezele, co waile nakulila. Co welukile kuli vakevo nakwendeka navo lalo, ngeci waangwileo Simyoni, co wamukutile oku vakevo vanakengeko.

Vandolome va Yosefa veluka ku Kanana

²⁵ Asinoni Yosefa washikile vangamba vendi ngeci vashulise vinjeke vya vandolome vendi na tiliku, co vavelwisilile vimbongo vyavo munu na munu ku njeke yendi, nakuvana vyakulya vya mu vungenzi vwavo. Co mukemwo vene muvalingile.

²⁶ Vandolome vendi valongekeyeye tiliku ije ivalandele a vimulu vyavo, ngeci vaile.

²⁷ Omo vetele ku mwela uje uvakalalelele, umo wavo wazitwile ku njeke yendi ngeci aane cimulu cendi vyakulya, co wawaneneko vimbongo ku kanwa ka njeke yendi.

²⁸ Wasanene vandolome vendi ngwendi, “Kengeni yange vananjiilwisila vimbongo vyange. Evi, vili muno mu njeke yange!” Co vimbunge vyavo vyavupukile, valihozwele na lyova ngwavo, “Vikajo evi vyanalingi Njambi kuli yetu?”

²⁹ Omo vetele kuli ishavo Yakomba mu Kanana, vamulekele vyoshe vije vyalingiwile kuli vakevo ngwavo,

³⁰ “Mwata wakama wa lifuti lya Ingito nendekele netu na vukalu nakututumbula ngwendi tunapu vaka-kunenga lifuti lyendi.

³¹ Co twamukumbulwile ngwetu, ‘Kesi yetu vaka-kunenga lifuti embwe. Yetu tu vanu va vushunga.

³² Twapwile likumi na vavali mu vundolome vwetu tuvavoshe. Tatetu umolika. Ndolome yetu umo watsa, co mutinikila kwacili ku Kanana amo na tatetu.’

³³ Co uje munu watukumbulwile ngwendi, ‘Njikamikulaela a ngila eyi, nga cili yeni mwapwa vanu va vushunga, umo weni asale nange kuno, co yeni mwasalao twaleleni tiliku vavushoko vweni valinakutsa ku njala, katukeni muye.

³⁴ Yeni mukashake mutinikila weni mumunene kuli yange. Asinoni njakuzivuke ngwange kuma kesi yeni vaka-kunenga lifuti, oloni munapu vanu va vushunga. Co njikamiilwisila ndolome yeni, ngeci mukapwe vaka-kulandulula mu lifuti lino.’ ”

³⁵ Omo vazitwile ku vinjeke vyavo, kengeni munu na munu wawanene ngeci vanamwilwisila vimbongo vyendi. Co omo vamwene vimbongo, vakevo na ishavo Yakomba vazivile lyova.

³⁶ Ngecivene, ishavo Yakomba wendekele kuli vakevo ngwendi, “Yeni mushaka kunjinyeka vana vange voshe ndi? Yosefa wai, Simyoni wai, co yeni mushaka muye lalo na Mbenjemani! Mwa vushunga vene njili mu vukalu!”

³⁷ Luvena wendekele kuli ishe ngwendi, “Nga yange kunjikelwisa Mbenjemani kuli yove, co yove ukatsiya vana vange va vanalume vavali. Njaneye lika njimunyunge, co njikamwilwisa.”

³⁸ Oloni Yakomba wavakumbulwile ngwendi, “Munange kasa kuya neni. Mukulunu wendi watsa, endi lika nasala. Amo cuma cimo lalo cikalingiwa kuli ikeye a ngila, co mukanjikokela vusiwa vwakunjilya omwo yange njinakuluvala laja.”