Kushangumuka 40 - Livulu lya Shukulu Kalunga

Yosefa anungulula vinjozi vya vinzinda

¹ Munima yeni, mwata wakwana vinyu kuli mwene wa Ingito na mwata wa vaka-kwoca makende a mwene vakele na mulonga kuli mwene.

² Co mwene waluvalele na ava vamyata vavali

³ vaavakele mu kamenga mu njuvo ya uje mukulunu wakunyunga vinzinda, mu kamenga muje muvanyungilile Yosefa.

⁴ Vakele simbu yakama mu kamenga, co uje mukulunu wakunyunga vinzinda wavakundikile kuli Yosefa ngeci avapangele.

⁵ Co a vutsiki vumo muje mu kamenga uje mwata wakwana vinyu kuli mwene na uje mwata wa vaka-kwoca makende a mwene, valotele vinjozi, oloni vije vinjozi kuvyalifwile.

⁶ Omo Yosefa wezile kuli vakevo mutondo, wavawanene vanombwa.

⁷ Co wavehwile ngwendi, “Omwo vikajo munombwa ngacije lelo?”

⁸ Vamukumbulwile ngwavo, “Tunaloto oloni naumo wai asa kutunungulwila evi vinjozi.” Yosefa wavalekele ngwendi, “Njambi lika ikeye asa kunungulula vinjozi. Njilekeni vinjozi vyeni.”

⁹ Co mwata wakwana vinyu kuli mwene walekele Yosefa ngwendi, “Mu njozi yange, njamwene mukolovozi wa vushuka vwa vinyu

¹⁰ wakele na minango itatu. Co vwasi-vwasi omo watotomokele maputa, vishani vyatemene, co vushuka vwahile.

¹¹ Ngecivene, nganja ya mwene yakele mu livoko lyange, co njanonele vushuka nakuvukamwina mu nganja, asinoni njaanene nganja mu livoko lya mwene.”

¹² Ngecivene, Yosefa wamulekele ngwendi, “Eyi njozi yove inanunguluka ngeci minango itatu inapu matangwa atatu.

¹³ Kukaita matangwa atatu, mwene akakwecela nakukwana lisesa lyakukwilwisila mu mwela wove. Co ukamwana nganja yendi ngwe muwalingile laja omo wapwile u mwata wakwana vinyu vyendi.

¹⁴ Oloni ukanjanuke omo ukakala mwamuvwa, ukapwe muka-kunjitetela, co ukambulule vyange kuli mwene. Unjikwase ngeci nange njakutunde muno mu kamenga

¹⁵ omwo mwa vushunga vene, yange vanjivile mu lifuti lya vaHevelu, nameme muno mu Ingito yange kunjalingile cuma nacimo cai civananjakela muno mu kamenga.”

¹⁶ Co mwata wa vaka-kwoca makende a mwene omo wazivile vuvwa vwakununguluka kwa njozi ya uje mwata wakwana vinyu kuli mwene, nendi walekele Yosefa njozi yendi ngwendi, “Nange lalo njinaloto njozi, njinambatele vingalo vitatu vya makende a mutwe wange,

¹⁷ ngeci mu ngalo yaakamwa mwakele miyati yoshe ya makende amavwa aje vocelele mwene, co tuzila vakele nakuwalya.”

¹⁸ Yosefa wamukumbulwile ngwendi, “Kununguluka kwayo kunapu ngeci, vije vingalo vitatu vya makende vinapu matangwa atatu.

¹⁹ Kukaita matangwa atatu mwene akakutuwisa mu kamenga, co akatapa mutwe wove! Asinoni akashukika muvila wove a manda, co tuzila vakalya situ yove.”

²⁰ A litangwa lyamucitatu, lyapwile litangwa lyakwanuka kusemuka kwa mwene, mwene walingilile vangamba vendi ciwano cakulya. Co watuwisile mwata wakumwana vinyu na uje mwata wa vaka-kwoca makende, vavanenele ku mesho a vamyata vendi.

²¹ Co mwene welwisilile uje mwata wakumwana vinyu ku vipangi vyendi,

²² oloni uje mwata wa vaka-kwoca makende vamutapele mutwe. Co vyoshe vyalingiwile ngwe muje mwavinungulwile Yosefa.

²³ Oloni uje mwata wakwana vinyu kuli mwene kanukile Yosefa, wamwivalele ivya.