Kushangumuka 4 - Livulu lya Shukulu Kalunga

Kaini na Avele

¹ Andama na Eva vakele na mwana wa munalume, co Eva wendekele ngwendi, “Akukwasa kwa Shukulu Kalunga njinawana mwana wa munalume.” Ngecivene, wamulukile lizina lyendi Kaini.

² Co wakele lalo na mwana wa munalume, wamulukile lizina lyendi Avele. Omo Avele wakolele wapwile kanyungi ka vimanga, oloni Kaini wapwile ndimi.

³ Litangwa limo, Kaini watwalele vimbuto vimo vije vyatejele kupwa mulambu kuli Shukulu Kalunga.

⁴ Avele watwalele muna manga wa ntwatwa wa ku vimanga vendi, wamutsiile, waangwileo vilyo vyavivwa, co wavikombelelele kupwa mulambu kuli Shukulu Kalunga. Co Shukulu Kalunga wavwaelelele na Avele na mulambu wendi,

⁵ oloni wavyanene Kaini na mulambu wendi. Co Kaini waluvalele manene na minkanya.

⁶ Shukulu Kalunga wendekele kuli Kaini ngwendi, “Omwo vikajo unaluvalela ngacije na minkanya mu luholo lwove?

⁷ Nga walingile mwamuvwa ngwe njinatambula mulambu wove, oloni omwo walingi vuvi, vuvi vwakuvandamena ku cikolo ngwe ndumba. Vushaka kukunyongesa, oloni unapande kuvuhyana.”

⁸ Kaini wendekele kuli ndolome yendi Avele ngwendi, “Tuye nakwimazala mu lihya.” Oloni omo vakele mu lihya, co Kaini watengulukilile ndolome yendi nakumutsiya.

⁹ Co Shukulu Kalunga wehwile Kaini ngwendi, “Ndolome yove Avele ali kuli?” Kaini wamukumbulwile ngwendi, “Yange kunjizivuka. Kuma yange njapwa kanyungi ka ndolome yange ndi?”

¹⁰ Shukulu Kalunga wendekele ngwendi, “Omwo vikajo walingi cuma cakukomokesa ngacije? Maninga a ndolome yove alinakuteta kuli yange mu livu, alinakutambeka ngwe lijwi lya shambandinga.

¹¹ Yove unasingiwa ku livu, kuukasa lalo kulima livu eli. Omwo unatsii ndolome yove, co maninga endi anetikila asi.

¹² Nga ukeseka kukuna vimbuto, co livu kulikamenesa cuma cimo. Kutunda lelo na kulutwe kuukakala na limbo, ukapwa muka-kwendangana lika ano asi.”

¹³ Co Kaini wendekele kuli Shukulu Kalunga ngwendi, “Cihiso eci wanjana cacikalu manene kuli yange. Kunjicasa!

¹⁴ Kenga ku litangwa lya lelo unanjisheke mu lifuti lino na ku mesho ove lalo. Yange kunjikakala na limbo, njikapwa muka-kwendangana lika ano asi, co munu woshe akanjiwana akanjitsiya.”

¹⁵ Oloni Shukulu Kalunga wamukumbulwile ngwendi, “Embwe. Woshe akatsiya Kaini, akahya lutanu na luvali kutuvakana cihiso ca Kaini akutsiya ndolome yendi.” Ngecivene, Shukulu Kalunga waakele cizivukiso ali Kaini cakunangula munu woshe uje aliwana nendi ngeci kesi amutsiye.

¹⁶ Kaini waile, watundile ku mesho a Shukulu Kalunga, wakakele mu lifuti lije vatumbwile ngwavo “Kwendangana” lyakele mu ngangela ya Endeni.

Vatekulwila va Kaini

¹⁷ Kaini wakele amo na munakazi wendi, co vakitile mwana wa munalume, vamulukile lizina lyendi Inoke. Co Kaini watungile limbo nakuliluka lizina lya munendi Inoke.

¹⁸ Inoke wakitile munendi wa munalume wamulukile lizina lyendi Ilande, wapwile ishe ya Mehunjaele, co Mehunjaele wakitile munendi wa munalume wamulukile lizina lyendi Metusaele, uje wapwile ishe ya Lameki.

¹⁹ Lameki wambatele vanakazi vavali, Anda na Zila.

²⁰ Anda wakitile Njavale, ikeye kukulwila ya vaje vakele mu vimbalaka nakunyunga vimuna.

²¹ Ndolome ya Njavale wapwile Njuvale, kukulwila ya voshe vaka-kwimba tulyalya na vimbendo.

²² Zila wakitile Tumbale Kaini, ikeye wapwile n̄ulungu wa vinoma wa vikuvo vyoshe vya vunengu na vutale, co ndokazi ya Tumbale Kaini wapwile Naama.

²³ Lameki wendekele kuli vanakazi vendi ngwendi, “Vanakazi vange Anda na Zila njitolilileni. Njinatsii munu omwo ikeye nanjivulumuna. Njinatsii mukwenje omwo nanjipupu.

²⁴ Nga vanu vatanu na vavali vakalingila Kaini shambandinga, co vanu makumi atanu na vavali na vatanu na vavali vakanjilingila shambandinga, nga munu anjitsiya.”

Seta na Inoshe

²⁵ Andama na munakazi wendi, vakitile mwana lalo mukwavo wa munalume. Eva wendekele ngwendi, “Njambi nanjiingisilamo mwana wa munalume muli Avele, uje yatsiile Kaini.” Ngeci wamulukile lizina lyendi Seta.

²⁶ Co Seta wakitile mwana wa munalume wamulukile lizina lyendi Inoshe. Ikeyo simbu ije vanu vashangumukile kulemesa lizina lya Shukulu Kalunga.