Kushangumuka 37 - Livulu lya Shukulu Kalunga

Yosefa na vandolome vendi

¹ Yakomba watungile mu lifuti lya Kanana, muje mwakele ishe laja.

² Co ou ukewo muzimbu wa naanga ya Yakomba. Yosefa wapwile mukwenje wa myaka likumi na itanu na ivali. Wakele nakunyunga vimanga na vimembe amo na vandolome vendi, vana va Mbileha na Zilipa mashano va ishe va mbanja. Yosefa wakele nakuleka ishe a vilinga vyavivi vya vandolome vendi vije vakele nakulinga.

³ Yakomba wazemene manene Yosefa kutuvakana vana vendi voshe va vanalume omwo wapwile munendi wa mu vukulukazi vwendi. Wamutongelele cikoveyo cacilaja mavoko.

⁴ Omo vandolome vendi vamwene ngeci ishavo wazemene manene Yosefa kutuvakana vakevo, co vazindile ndolome yavo manene, ngecivene, kuvakele nakwendeka nendi mwamuvwa.

⁵ A vutsiki vumo Yosefa walotele njozi, wailekele vandolome vendi, cooni vamuzindile manene kutuvakana.

⁶ Co ikeye wendekele kuli vakevo ngwendi, “Tolilileni njozi njalotele.

⁷ Kengeni yetu voshe tunakele mu lihya nakukuta mikuta ya tiliku, mukuta wange unemanene lwii, co mikuta yeni yazengelekele mukuta wange nakuulemesa.”

⁸ Vandolome vendi vamwihwile ngwavo, “Kuma yove wayongola ngwove ukapwa u mwene wakutushwana yetu ndi?” Co vamuzindile manene kutuvakana, omwo ya vinjozi vyendi na vyendeka vyendi.

⁹ Yosefa walotele lalo njozi ikwavo, wailekele lalo vandolome vendi ngwendi, “Kengeni njaloto njozi ikwavo lalo, njamwene litangwa, na ngonde, na vingongonosi likumi na imo vilinakunjitsikamena.”

¹⁰ Oloni omo wailekele ishe na vandolome vendi, co ishe wamuluvalesele ngwendi, “Njozi mukajo oyo ya cifwa cangoco? Kuma yove uyongola ngwove vanyoko na vandolome vove amo nange tukakutsikamena ndi?”

¹¹ Co vandolome vendi vamuzivilile cipululu, oloni ishe wanyungile vyuma evi mu mbunge yendi nakuviyongola.

Yosefa vamulandesa, co vamutwala ku Ingito

¹² Vandolome va Yosefa vakele ku Shekeme nakunyunga matanga a ishavo,

¹³ co Yakomba wendekele kuli Yosefa ngwendi, “Njishaka uye ku Shekeme, kuje kuvalinakunyungila vandolome vove matanga.” Yosefa wamukumbulwile ngwendi, “Eyo, njiya.”

¹⁴ Co ishe wamulekele ngwendi, “Ya ukamone vandolome vove nga vanenduka mwamuvwa na matanga oshe. Co ukeluke wakunjilekeko.” Ngecivene, ishe wamutumine ku vungenzi vwendi kutunda ku Cimbongo ca Hevelone. Asinoni Yosefa wetele ku Shekeme.

¹⁵ Co munu umo wamuwanene alinakwendangana mu cana cangoco, wamwihwile ngwendi, “Vikajo ushakezeka?”

¹⁶ Yosefa wamukumbulwile ngwendi, “Njilinakushakezeka vandolome vange, vakevo valinakunyunga matanga avo. Wasa kunjileka kuvali?”

¹⁷ Co uje munu wamulekele ngwendi, “Vanailaja. Njavazivile vendeka ngwavo valinakuya ku Ndotane.” Ngecivene, Yosefa wakavele vandolome vendi, wakavawanene ku Ndotane.

¹⁸ Oloni vandolome vendi vamumwenenene alyala kamandondo. Omo kanda acete kuli vakevo, vamukele munga yakumutsiya.

¹⁹ Ngecivene, valyendekesele umo na mukwavo ngwavo, “Kengeni cilota-vinjozi ou alinakwija.

²⁰ Tulivwaeseni tumutsiye tumumbile mu mbulu. Co twasa kukendeka ngwetu cikashama namukwata. Asinoni tukamone oni vinjozi vyendi indi vikapanga vika.”

²¹ Omo Luvena wavazivile vendeka ngacije, co wayongwele mwakwovwela Yosefa. Wendekele ngwendi, “Kesi tumutsiye embwe.

²² Mumbileni lika mu mbulu yamuno mu mambo, oloni kesi mumuvulumune embwe.” Ikeye wendekele eci omwo wayongwele mwakumwovwela ngeci eluke kuli ishe.

²³ Omo Yosefa wetele kuli vandolome vendi, vamukwatele nakumushulula cikoveyo cendi cacilaja mavoko cije cazalele,

²⁴ co vamumbilile mu mbulu.

²⁵ Omo vatumbamene nakulya, vandwile mesho avo, co vamwene cendo ca vaIshimaela valinakwita vatunda ku Ngilyande vaya ku Ingito na tumelo twavo, vambatele vyemba vyakunika lwengo na kenya.

²⁶ Co Yunda wendekele kuli vandolome vendi ngwendi, “Cuma mukajo tukawanao nga tutsiya ndolome yetu tushweke kutsa kwendi?

²⁷ Tumulandeseni lika kuli ava vaIshimaela, kesi tumutsiye embwe omwo ikeye napu ndolome yetu, maninga etu amolika.” Vandolome vendi vamutavele,

²⁸ ngecivene, omo vaMindyani vamo vaka-kulandesa vetile, vandolome vendi vamusosele kumutundisa mu mbulu, co vamulandesele kuli vaIshimaela na mavundungulu a siliva makumi avali, co vamutwalele ku Ingito.

²⁹ Omo Luvena welukilile ku lisima wawanene Yosefa waimo, co watavwile vuzalo vwendi omwo vusiwa.

³⁰ Ngecivene, waile kuli vandolome vendi nakwendeka ngwendi, “Ndolome yetu waimo muje! Vati njilinga?”

³¹ Asinoni vatsiile membe, vambwitikile cikoveyo ca Yosefa cacilaja mavoko mu maninga.

³² Ngecivene, vatwalele cije cikoveyo kuli ishavo vamulekele ngwavo, “Twawana eci cikoveyo. Kengeni, indi cikeco cikoveyo ca munove indi ceka?”

³³ Co Yakomba wacizivukile wendekele ngwendi, “Eyo, cikeco vene cikoveyo ca munange! Cikashama namukwata munange Yosefa, namusanyozola sanyu-sanyu!”

³⁴ Yakomba watavwile vuzalo vwendi omwo vusiwa, co wazalele cikeleya. Walilile munendi simbu yakama.

³⁵ Asinoni vana vendi voshe va vanalume na ava va vanakazi vezile kuli ikeye nakumuzembeleka, oloni ikeye wavyanene kumuzembeleka wendekele ngwendi, “Njikaya ku vukalo vwa vatsi anga njicilila munange.” Ngecivene, watwaleleo kulila manene munendi Yosefa.

³⁶ A simbu ije, omo vaMindyani vetele mu Ingito valandesele Yosefa kuli Potifalo, uje wapwile umo wa vamyata va mwene, mukulunu wa mashwalale wa ku lipela.