Kushangumuka 33 - Livulu lya Shukulu Kalunga

Yakomba aliwana na Isau

¹ Omo Yakomba wamwene Isau alinakwija amo na vanu vendi 400, waangunwine vanike, vamo kuli Leya, vakwavo kuli Lakele, vakwavo kuli mashano vendi vavali va mbanja.

² Akulivanga watwamekeleko vaje mashano vendi va mbanja amo na vana vavo, asinoni Leya na vana vendi, co vakumaneselako Lakele na Yosefa.

³ Yakomba watwamene kulutwe, watsikamene nakulemesa visimbu vitanu na vivali omo washwenyele kuli ndolome yendi.

⁴ Oloni Isau washatukile nakumushesha, wamuvumbatelele nakumutsemba. Co voshe vavali valilile.

⁵ Omo Isau wandwile mesho endi wamwene vanakazi na vanike, co wehwile ngwendi, “Ava veya uli navo?” Yakomba wamukumbulwile ngwendi, “Mwane, ava vakevo vana vaje vananjana Njambi mu ngozi yendi.”

⁶ Asinoni vaje mashano vendi va mbanja vezile nakukandelela nakulemesa amo na vana vavo.

⁷ Co Leya na vana vendi vezile nakukandelela nakulemesa, asinoni Yosefa na Lakele vezile nakulemesa akukotoka.

⁸ Co Isau wamwihwile ngwendi, “Aje matanga njaliwana nawo avikajo? Eci cinanunguluka vika?” Yakomba wamukumbulwile ngwendi, “Cinanunguluka ngeci njiwane kutetela ku mesho a shukulu yange.”

⁹ Oloni Isau wendekele ngwendi, “Embwe ndolome yange. Nyunga evi ulinavyo. Yange njili na vufuko vwavungi.”

¹⁰ Yakomba wamukumbulwile ngwendi, “Embwe mwane, nga njinawana kutetela ku mesho ove, tambula vwana vwange. Omo njamono cihanga cove, cinapu ngwe njinamono cihanga ca Njambi, omwo unanjizivila mema ku mbunge.

¹¹ Mwane, tambuleni vwana ovu njinaminenela omwo Njambi nanjitetela, nakunjana vyuma vyoshe evi njilinavyo.” Co Yakomba wamusindiiye noo Isau wavutambwile.

¹² Asinoni Isau wendekele ngwendi, “Tulivwaeseni ngeci tuye. Yange njitwama kulutwe lweni.”

¹³ Oloni Yakomba wamukumbulwile ngwendi, “Shukulu mwazivuka ngeci vanike vapwa vakuzeya, co njinapande kuyongola lalo a vimanga na vingombe amo na vana vavo. Nga tuvendesa manene nameme litangwa limo, co vatsa.

¹⁴ Shukulu, livangeni kulutwe, yange njija kamandondo munima, njikenda ngwe munjinasela na vimuna na vanike noo njikamiwana mu Endome.”

¹⁵ Co Isau wendekele ngwendi, “Mwamuvwa njikusezele vamo vanu vange.” Oloni Yakomba wamukumbulwile ngwendi, “Embwe, kucitava, njishaka lika kuwana kutetela ku mesho ove.”

¹⁶ Ngecivene, a litangwa lije Isau wakatukile vungenzi vwendi vwakwiluka ku Endome.

¹⁷ Oloni Yakomba waile ku Sukote, kuje kwakatungile njuvo yendi. Co mwela uje waulukile lizina lya Sukote omwo kukekwo watungilile macakana a vimuna vendi.

¹⁸ Omo Yakomba watundile ku Mesopotamya, wetele mwamuvwa ku nganda ya Shekeme mu lifuti lya Kanana, co watungile cilombo cendi kuyehi na nganda.

¹⁹ Yakomba walandele mutambela wa livu aje ashimbikile mbalaka yendi. Walilandele kuli vatekulwila va Hamole ishe ya Shekeme na mavundungulu a siliva akupwa 100.

²⁰ Co kuje Yakomba watungile lalo mutula nakuuluka lizina lyawo ngwendi, “Njambi, ikeye Njambi ya Isalele.”