Kushangumuka 32 - Livulu lya Shukulu Kalunga

Yakomba alivwaesa aliwane na Isau

¹ Yakomba waile vungenzi vwendi, co tungelo va Njambi valiwanene nendi.

² Omo wavamwene, wendekele ngwendi, “Eyi ikeyo mbunga ya Njambi!” Co walukile lizina lya mwela uje Mahanaime.

³ Co Yakomba watumine tunganda kulutwe kuli ndolome yendi Isau mu lifuti lya Endome.

⁴ Co wavashikile ngwendi, “Mukamuleke shukulu yange Isau ngweni, ‘Yange Yakomba ngamba yove, njakakele kuli Lambani, co njakeshwalele manene kuje, ololo njilinakwiluka.

⁵ Co yange njili na vingombe, na vimulu, na vimanga, na vimembe, na vindungo va vanalume na ava va vanakazi. Njituma lijwi kuli yeni mwane ngwange munjitetele ngeci munjitambule.’ ”

⁶ Omo tunganda velukile kuli Yakomba vendekele ngwavo, “Twaile kuli ndolome yove Isau, co na ikeye vene ali mu ngila alinakwija mukukushesha. Alinakwija na vanu 400.”

⁷ Ngecivene, Yakomba wazivile lyova manene nakujujuka. Co waangunwine vanu vaje wendele navo mu vimbunga vivali, co lalo waangunwine vimanga vendi, na vimembe, na vingombe na tumelo lalo mu vimbunga vivali.

⁸ Ikeye wayongwele ngwendi, “Nga Isau aija nakulwisa mbunga yakulivanga, co mbunga yamucivali ikovoka.”

⁹ Asinoni Yakomba walombelele ngwendi, “Njambi ya kuku Avilahama na Njambi ya tate Isake, yove Shukulu Kalunga wendekele kuli yange ngwove ukeluka ku lifuti lyove na kuli vavushoko vwove, co vyuma vyoshe wasa kunjivwaeselavyo mwamuvwa.

¹⁰ Kucanjipandelemo kutetela kwangacije na vuvwa vwove vuunasholola kuli yange ngamba yove, co nacimo cai njajavukile naco Yondau kuvanga mulamu lika, co ololo kenga, njineluka na vimbunga evi vivali!

¹¹ Njakulombo, njamene kuli ndolome yange Isau. Njili na lyova ali ndolome yange kutewa omo aija akutunyongesa yetu voshe na vanakazi, na vanike.

¹² Anuka ngeci yove wendekele ngwove, ‘Mwa vushunga njikakuvezikisa nakutumisa vatekulwila vove ngeci naumo wai akasa kuvalava. Vakapwa vavangi manene ngwe lishen̄avu.’ ”

¹³ Ngecivene, Yakomba walalele kuje vutsiki vuje. Co waangwile ku vyuma vije vyakele navyo kupwa vwana vwakwana kuli ndolome yendi Isau.

¹⁴ Vimembe vapwile 200 va lwavo na makumi avali a majamba a vimembe, na vimanga 200 va lwavo na makumi avali a majamba a vimanga,

¹⁵ na makumi atatu a tumelo va mavele na vana vavo, na makumi awana a vingombe va lwavo na vingombe va nkomba likumi, amo na makumi avali a vimulu va lwavo, na va nkomba va vimulu likumi.

¹⁶ Co vutanga vumo na vumo wavwanene ku livoko lya umo na umo wa vangamba vendi. Wendekele kuli vakevo ngwendi, “Yeni kulutwe, co sezeni lyaana akati ka vutanga vumo na vumo.”

¹⁷ Co washikile ngamba uje watwamene kulutwe ngwendi, “Omo mukaliwana na ndolome yange Isau, nga amihula ngwendi, ‘Iyajo shukulu yeni? Mulinakuya kulijo? Iyajo namyana ava vimuna vali kulutwe lweni?’

¹⁸ Co munapande kumukumbulula ngweni, ‘Vinapu vya ngamba yove Yakomba. Ikeye navitumu kupwa vwana kuli shukulu yendi Isau, na ikeye vene Yakomba alinakwija munima yetu.’ ”

¹⁹ Co washikile lalo cuma cimo kuli munu wamucivali, na kuli wamucitatu, na kuli voshe vaje vakele na matanga ngwendi, “Munapande kwendeka lijwi limolika kuli Isau omo muliwana nendi.

²⁰ Munapande kwendeka lalo ngweni, ‘Eyo, ngamba yove Yakomba alinakwija munima yetu.’ ” Wayongwele ngwendi, “Njikamuhwimisa mu mbunge avwana ovu njinamwana, co omo njiliwana nendi, amo akanjisambesa.”

²¹ Co watwamekele vwana kulutwe lwendi, co walalele muje mu cilombo vutsiki vuje.

Yakomba alyundula na kangelo ku Penyele

²² A vutsiki vuje Yakomba wendukile, waile na vanakazi vendi vavali, na mashano vendi va mbanja vavali, amo na vana vendi va vanalume likumi na umo, co vajavukile Ndonga ya Yamboke.

²³ Omo navajavwisa laja, co wajavwisile lalo vufuko vwendi vwoshe vuje vwafukile,

²⁴ oloni ikeye wasalele endi lika munima. Asinoni munalume wezile walyundwile nendi mu vimbando noo a mungulungengu.

²⁵ Omo uje munalume wamwene ngeci kasele kuhyana Yakomba, co wapupile mu nyonga ya Yakomba, ngeci yasongonokele.

²⁶ Co uje munalume wendekele ngwendi, “Njecele njiye litangwa ololo lituuka.” Oloni Yakomba wamukumbulwile ngwendi, “Kunjikweca, kuvanga unanjivezikisa.”

²⁷ Co uje munalume wamwihwile ngwendi, “Lizina lyove yove iyajo?” Yakomba wamukumbulwile ngwendi, “Yange Yakomba.”

²⁸ Asinoni uje munalume wendekele kuli ikeye ngwendi, “Lizina lyove kuvakalitumbula lalo Yakomba embwe, oloni Isalele omwo yove unalu na Njambi na vanu lalo, co unahyana.”

²⁹ Yakomba wendekele ngwendi, “Cooni njikulomba unjileke lizina lyove.” Oloni ikeye wamukumbulwile ngwendi, “Omwo vikajo ushaka kuzivuka lizina lyange?” Asinoni ikeye wavezikisile Yakomba.

³⁰ Yakomba wendekele ngwendi, “Njamono Njambi mesho na mesho, kuma njiciyoya!” Co walukile lizina lya uje mwela Penyele.

³¹ Co litangwa lyatuukile, Yakomba watundile kuje ku Penyele, oloni wajendukile omwo nyonga yendi yasongonokele.

³² Ngecivene, kweta na ku litangwa lya lelo vatekulwila va Isalele kuvesi kulya situ ya mu nyonga, omwo a nyonga ya Yakomba akeo apupile uje munalume.