Kushangumuka 31 - Livulu lya Shukulu Kalunga

Yakomba atewa Lambani

¹ Yakomba wazivile ngeci vana va Lambani va vanalume valinakwendeka ngwavo, “Yakomba nambata vyuma vyoshe vya tatetu vikevyo vije vinamufukisa.”

² Yakomba wamwene cifwa ca Lambani cinatenguluka kucafwile ngwe akulivanga.

³ Ngecivene, Shukulu Kalunga wendekele kuli Yakomba ngwendi, “Iluka ku lifuti lya isho na kuli vavushoko vwove. Yange njikakala amo nove.”

⁴ Yakomba watumine lijwi kuli Lakele na Leya ngeci valiwane nendi mu cana muje mwakele matanga endi.

⁵ Co wendekele kuli vakevo ngwendi, “Njamono ngwange cifwa ca ishweni cinatenguluka kucafwile ngwe akulivanga, nameme ngoco Njambi ya tate nakala amo nange.

⁶ Muvuvali vweni mwazivuka ngeci yange njapangelele ishweni na nzili yange yoshe.

⁷ Co ishweni wanjikwisile nakutengulula fweto yange visimbu likumi, oloni Njambi kamutavesele ngeci anjivulumune.

⁸ Omo Lambani wakele nakwendeka ngwendi, ‘Vimembe vakuvalama vakevo vakapwa fweto yove,’ co matanga oshe asemene vana vakuvalama. Co omo wendekele ngwendi, ‘Vimembe voshe vamingolila vakapwa fweto yove,’ co matanga oshe aje asemene vana vamingolila.

⁹ Ngeci Njambi natundisa matanga kuli ishweni, nanjanawo yange.

¹⁰ “A simbu yakuvambula vimuna njalotele njozi, co njamwene majamba a vimembe vakele nakulonda vimembe va lwavo vamingolila, na ava vamapelenge, na ava vakuvalama.

¹¹ Kangelo ka Njambi wanjisanene mu njozi ngwendi, ‘Yakomba!’ Co njamutavele ngwange, ‘Ewa, yange uno Shukulu.’

¹² Co kangelo ngwendi, ‘Kenga, majamba a vimembe voshe vaje vanakele nakulonda vanapu vamingolila, na ava vamapelenge, na ava vakuvalama. Evi vilinakulingiwa omwo njamono vyoshe vije alinakulinga Lambani kuli yove.

¹³ Yange Njambi uje washolokele kuli yove ku Mbetele, kuje kuwakundikile limanya nakwitilao mazi a olive mukulipwisa canukiso, kuje lalo walisingile nange. Co ololo livwaese ngeci wiluke ku lifuti kuje kuwasemukilile!’ ”

¹⁴ Co Lakele na Leya vakumbulwile Yakomba ngwavo, “Yetu lalo kukwesi vushwana vunasala vutukashwana kuli tatetu.

¹⁵ Ikeye alinakutupangesa ngwe tu vangenzi. Watulandesele laja, co ololo nali matemo etu oshe.

¹⁶ Co vufuko vwoshe ovu Njambi navutundisa kuli tatetu vunapu vwetu na vana vetu. Ngecivene, yove linga lika evi vyanakuleka Njambi.”

¹⁷ Co Yakomba walivwaesele kwiluka kuli ishe ku lifuti lya Kanana. Co walondesele vana vendi na vanakazi vendi a tumelo.

¹⁸ Co wasindikile matanga endi oshe kulutwe, na vyuma vyendi vyoshe vije vyawanene ku Mesopotamya, co wakatukile nakuya kuli ishe Isake ku Kanana.

¹⁹ Oloni omo Lambani nailaja mukuteula vimanga vendi, co Lakele wevile tumponya twa ishe.

²⁰ Yakomba wavombolokele Lambani omwo kuvalishikile a vungenzi vwendi.

²¹ Ngecivene, Yakomba wambatele vyoshe vyafukile, waile vwasi-vwasi. Co wajavukile Ndonga ya Yufuleti nakukengesela ku lifuti lya malundu lya Ngilyande.

Lambani akava Yakomba

²² Omo kwetile matangwa atatu Lambani vamulekele ngwavo Yakomba natewa.

²³ Co waile na vanu vendi vakavele Yakomba vendele matangwa atanu na avali noo wamuwanene mu lifuti lya malundu lya Ngilyande.

²⁴ Co mu njozi a vutsiki vuje vene, Njambi wezile kuli Lambani nakwendeka ngwendi, “Kesi weseke kushungwiya Yakomba mu ngila ika nambe ika.”

²⁵ Ngecivene, Lambani wawanene Yakomba nashimbika laja mbalaka yendi mu lifuti lya malundu, co Lambani lalo watungile cilombo cendi amo na vavushoko vwendi mu lifuti lya minkinda lya Ngilyande.

²⁶ Lambani wendekele kuli Yakomba ngwendi, “Omwo vikajo unanjivombolokela, nakwambata vana vange ngwe vinzinda vakukwata mu nzita?

²⁷ Vikajo wanjikwisila nakunjivomboloka kujeneka kunjilekako? Nga yove wanjilekeleko, nga njakwecelele nakuvwaelela mu vungenzi vwove, nakwimba myaso na tumbulumbumba na tulyalya.

²⁸ Oloni yove kuwanjitavesele ngeci njilisalese na vatekulyange va vanalume na ava va vanakazi amo na vana vange. Unalingi cuma cavulema!

²⁹ Njili na nzili yakukuvulumuna, oloni vutsiki vwa izau Njambi ya isho, ikeye nanjinangwile ngwendi kesi njikushungwiye mu ngila ika nambe ika.

³⁰ Njazivuka ngeci unakatukile omo unakala na cishota-mbunge cakwiluka kwimbo lyeni, oloni omo vikajo unevila tumponya twa mu njuvo yange?”

³¹ Yakomba wamukumbulwile ngwendi, “Njakele na lyova omwo njayongwele ngwange amo ukanjinyeka vana vove.

³² Oloni yove nga uwana umo kuno uje ali na tumponya twove, co napande kutsa ano vene ku mesho a vavushoko vwetu, kengezeka ngeci uwane cuma coshe cije cakundama kuli yove.” Oloni Yakomba kazivukile ngwendi Lakele nevi tumponya twa Lambani.

³³ Lambani wakovelele mu mbalaka ya Yakomba nakushakezekamo. Asina lalo wakovelele mu mbalaka ya Leya, na mu vimbalaka vya vaje mashano vavali va mbanja, oloni kawanene tumponya twendi. Asinoni wakovelele lalo mu mbalaka ya Lakele.

³⁴ Lakele wambatele tumponya twa mu njuvo ya ishe nakutushweka mu njeke ya selei ya kamelo, co watumbameneo. Nameme ngoco, Lambani washakezekele mu mbalaka mwoshe, oloni katuwanene.

³⁵ Lakele wendekele kuli ishe ngwendi, “Kesi muluvale nange mwane, kunjasa kwimana ku mesho eni, omwo njili ku cilika ca vanakazi.” Co Lambani washakezekele oloni kawanene tumponya twa mu njuvo yendi.

³⁶ Asinoni Yakomba waluvalele manene, co wehwile ngwendi, “Mulonga uka njinavulumuna kuli yove? Lishiko mukajo njinapokola lije linakwana nzili yakunjiyomba ngacije?

³⁷ Co ololo, omo unashakezeka mu vyuma vyange vyoshe, cooni cuma mukajo ca mu njuvo yove ciwunawanamo? Vituwise ano anja ngeci vanu vove na vanu vange vase kuvimona, vayongoleo kuwana iyajo akati kove nange nalingi mwamuvwa.

³⁸ Ololo njinakala nove myaka makumi avali. Vimanga vove na vimembe vove kuvalikelele kusemunwina, co kunjalilemo majamba mu matanga ove.

³⁹ Co simbu yoshe nga cikashama nakwata manga, yange njakele nakwingisamo weka. Kunjamunenele kuli yove omwo yove wavakundikile kuli yange. Oloni yange njalitwikile citele cije, omwo yove washikile ngeci njinapande kufweta ndando ya cimuna nameme vikashama vamutsiile simbu ya mutanya nambe simbu ya vutsiki.

⁴⁰ Visimbu vyavingi njakele nakuyanda na ntwima ku mutanya na lisika ku vutsiki kunjasele kulala mwamuvwa.

⁴¹ Vyuma evi vyakele nakulingiwa a myaka yoshe makumi avali ije njakele kuli yove. A myaka likumi na iwana njapangele ngeci unjane vana vove vavali, na myaka itanu na umo njapangele kuli yove ngeci unjane vimembe na vimanga. Nameme ngoco, a simbu yoshe ije, yove wakele nakutengulula-tengulula fweto yange.

⁴² Nga Njambi ya Avilahama, na Njambi ya tate Isake kakele nange, nga yove wanjishekele laja mavoko-voko. Oloni Njambi wamwene tuyando twange na vipangi vyange vije njalingile, ngeci ku vutsiki vwa izau Njambi nakwendekelele.”

Cikumiiyo akati ka Yakomba na Lambani

⁴³ Lambani wakumbulwile Yakomba ngwendi, “Vambanda ava vanapu vana vange, na vana vavo vanapu vange, na vutanga ovu vunapu vwange. Mwa vushunga, vyuma vyoshe evi ulinakumona kuno vinapu vyange. Oloni nevi njasa kulinga vene ku litangwa lya lelo vyai vyakuvindika vana vange amolika na vana vavo vavanakiti.

⁴⁴ Co mwamuvwa oni yove nange tulinge cikumiiyo. Tulinge mutumbo wa mamanya wakutwanukisa cikumiiyo cetu.”

⁴⁵ Ngecivene, Yakomba wakakwile limanya nakulimika kupwa limanya lya canukiso.

⁴⁶ Co Yakomba walekele vavushoko vwendi kukungulula mamanya amo nakuwalundika mutumbo. Co valile vyakulya kumukulo wa uje mutumbo wa mamanya.

⁴⁷ Lambani waulukile lizina lyawo Yengale Sahanduta, oloni Yakomba waulukile Ngalende.

⁴⁸ Lambani wendekele kuli Yakomba ngwendi, “Ou mutumbo wa mamanya ukewo unapu vukaleo muvuvali vwetu.” Omu mukemwo mutambela uje vaulukile lizina lya Ngalende.

⁴⁹ Co Lambani wendekele ngwendi, “Shukulu Kalunga apwe mukaleo akati ketu omo tulinakulyangunuka umo na mukwavo.” Co mwela uje vaulukile Mizipa.

⁵⁰ Ngecivene, Lambani wendekele ngwendi, “Nga yove ukayandesa vana vange, nambe nga yove ukambata vanakazi veka, nameme yange kunjesiko ngeci njizivuke vyuma evi, oloni anuka ngwove Njambi ikeye mukaleo akati kange nove.

⁵¹ Awa akewo mamanya njinalundika mutumbo akati ketu, co eli likelyo limanya lyakwimika lije linapu canukiso.

⁵² Mutumbo ou unapu vukaleo, na limanya eli linapu vukaleo ngeci kunjikasa kujomboka mutumbo ou nakwija kuli yove nakukulwisa, co nove lalo kuukasa kujomboka mutumbo ou nakwija kuli yange nakunjilwisa.

⁵³ Njambi ya Avilahama na Njambi ya Nahole, ikeye Njambi akasompa akati ketu.” Co Yakomba walisingile mukunyunga cikumiiyo mu lizina lya Njambi uje yalemesele ishe Isake.

⁵⁴ Yakomba wakombelelele n̄ombelo aje a munkinda, co walanyeleko vavushoko vwendi vakulye vyakulya vije, co valile. Valalele aje a munkinda vutsiki vuje.

⁵⁵ Alikaki mutondo-tondo, Lambani watsembele vatekulyendi na vana vendi nakuvavezikisa, co walisalesele navo, welukile kwimbo lyendi.