Kushangumuka 30 - Livulu lya Shukulu Kalunga

¹ Omo Lakele wamwene ngeci ikeye kesi na mwana yanakiti kuli Yakomba, co wazivilile ndokazi yendi lifuwa, wendekele kuli Yakomba ngwendi, “Nange njishaka kukita, nga kunjikiti, co njitsa.”

² Yakomba waluvalele na Lakele, wendekele kuli ikeye ngwendi, “Kunjasa kwinga mu mwela wa Njambi. Njambi ikeye nashoko shivu yove ngeci kesi ukite vana.”

³ Asinoni Lakele wendekele ngwendi, “Ndungo yange Mbileha ou, limone nendi, ngeci anjikitileko mwana. Co mu ngila eyi yange njikapwa vaina ya uje mwana.”

⁴ Co Lakele waanene Mbileha kuli munalume wendi, ngeci Yakomba walimwene nendi.

⁵ Mbileha wakele na kafumba, co wakitile mwana wa munalume.

⁶ Lakele wendekele ngwendi, “Njambi nanjimanena. Ikeye nazivi kulomba kwange ngeci nanjana mwana wa munalume.” Ngecivene, wamulukile lizina lyendi Ndani.

⁷ Mbileha wakele lalo na kafumba, wakitile mwana wa munalume wamucivali.

⁸ Co Lakele wendekele ngwendi, “Njinalu nzita yakukaluwa na ndokazi yange, oloni njinamufungulula.” Ngecivene, wamulukile lizina lyendi Nafetali.

⁹ Omo Leya wamwene ngeci ikeye nalikela kukita vana, co waanene ndungo yendi Zilipa kuli Yakomba ngeci apwe munakazi wendi.

¹⁰ Asinoni Zilipa wakitile mwana wa munalume.

¹¹ Co Leya wendekele ngwendi, “Njinapu muka-kuvezika,” ngecivene, wamulukile lizina lyendi Ngande.

¹² Cooni Zilipa wakitile lalo mwana wa munalume mukwavo.

¹³ Co Leya wendekele ngwendi, “Njinavwaelela ololo! Co vanakazi voshe vakanjitumbula muka-kuvwaelela,” ngecivene, wamulukile lizina lyendi Ashele.

¹⁴ Co a simbu ya kuteja tiliku, Luvena waile ku mahya, wakawanene mandeleke, ngeci wawanenele kuli vaina Leya. Lakele wendekele kuli Leya ngwendi, “Njaneko mandeleke a munove.”

¹⁵ Leya wamukumbulwile ngwendi, “Kuma kuwapwisilemo omo wanjitambula munalume wange ndi? Co ushaka lalo njikwane mandeleke a munange.” Lakele wamukumbulwile ngwendi, “Nga unjanako mandeleke a munove, co vutsiki vwa lelo Yakomba akaija mu njuvo yove.”

¹⁶ Omo Yakomba watundile ku mahya cingwezi, co Leya wamusheshele. Wendekele ngwendi, “Vutsiki vwa lelo unapande kwija mu njuvo yange, omwo njinakufwetela laja na mandeleke a munange.” Co Yakomba walimwene nendi ku vutsiki vuje.

¹⁷ Njambi wakumbulwile malombelo a Leya, wakele na kafumba. Wakitile mwana wa munalume wamucitanu.

¹⁸ Leya wendekele ngwendi, “Njambi nanjana cikandelela omwo njinaanene ndungo yange kuli munalume wange.” Ngecivene, wamulukile lizina lyendi Isakale.

¹⁹ Asinoni Leya wakele lalo na kafumba, wakitile mwana wa munalume wamucitanu na umo.

²⁰ Wendekele ngwendi, “Njambi nanjana vwana vwakukomokesa. Ololo oni munalume wange akanjisingimika, omwo njinakiti nendi vana va vanalume vatanu na umo.” Ngecivene, wamulukile lizina lyendi Zembuloni.

²¹ Munima yevi, Leya wakitile mwana wa munakazi, wamulukile lizina lyendi Ndaina.

²² Asinoni Njambi wanukile lalo Lakele, wakumbulwile lilombelo lyendi, co washokolwele shivu yendi ngeci akale na vana.

²³ Lakele wakele na kafumba, co wakitile mwana wa munalume. Wendekele ngwendi, “Njambi nanjitundisa shwamwa yakujeneka kukita.”

²⁴ Ngecivene, wamulukile lizina lyendi Yosefa ngwendi, “Shukulu Kalunga anjane lalo mwana wa munalume mukwavo.”

Lizivasano lya Yakomba na Lambani

²⁵ Omo Yosefa wasemukile, Yakomba wendekele kuli Lambani ngwendi, “Njitave ngeci njiiluke kwimbo lyange.

²⁶ Wazivuka munjinakupangela na nzili, ngecivene, njane vanakazi vange na vana vange ngeci njiye.”

²⁷ Oloni Lambani wendekele kuli ikeye ngwendi, “Akulivanga njitave ngeci njikuleke eci, omwo njinananguka akutaa ngwange Shukulu Kalunga nanjivezikisa omwo yove.

²⁸ Co njileke fweto yove ngeci njikufweteyo.”

²⁹ Yakomba wamukumbulwile ngwendi, “Wazivuka munjinakupangela, ololo matanga a vimuna vove anatumu omwo yange njinavanyungu mwamuvwa.

³⁰ Omo njezile kuwakele na matanga amangi, oloni ololo vanasemunwina, co Shukulu Kalunga navezikisa vyoshe vije vinjakupangelele. Ololo simbu inete ngeci njikenge a naanga yange.”

³¹ Lambani wamwihwile ngwendi, “Vika njikufweta?” Yakomba wamukumbulwile ngwendi, “Kunjishaka fweto embwe. Njikanyunga matanga ove nga yove ulinga evi vinjikuleka.

³² Njitave njiitangane mu matanga ove oshe nakutundisamo vana va vimanga voshe vakuzivala na voshe vana va vimembe vamapelenge nambe vana va vimembe vakuvalama. Eyi ikeyo fweto injishaka.

³³ Ngecivene, kulutwe ukawana nga njinapu munu wa kulongwa. Omo ukaija nakunjifweta, co nga ukawana njili na membe ou kesi wakuvalama nambe wamapelenge nambe manga umo kesi wakuzivala, co ukazivuka ngwove napu wakwiva.”

³⁴ Lambani wamukumbulwile ngwendi, “Mwamuvwa njatava. Tukapanga ngwe muunayongola.”

³⁵ Oloni a litangwa lije vene, Lambani waangunwine majamba a vimembe vamingolila nambe vamapelenge, na vaje va lwavo voshe na vaje vakuvalama lalo vamapelenge nambe vaje vakele na mambanda-mambanda akutoka. Co waangunwine lalo vimanga voshe vakuzivala. Wavanene ku mavoko a vana vendi va vanalume,

³⁶ asinoni waile wasezele Yakomba na vutanga ovu, co wendele vungenzi vwa matangwa atatu. Ngecivene, Yakomba wanyungile aje matanga a Lambani amusezelele.

³⁷ Yakomba wavatwile minango ya miti ya popula, na alumonde, na miti ya puleni, co watundisile vyula vimo ngeci ije minango ikale na mingolila yakutoka.

³⁸ Washimbikile ije minango kulutwe lwa matanga muje mu mato avo akunwila mema. Co wayakele kuje, omwo vaje vimuna vakele nakulilonda omo vaija nakunwa mema.

³⁹ Co omo vimembe vavambwile kulutwe lwa ije minango, co vasemene vana vavo vamingolila, na vaje vamapelenge, na vaje vakuvalama.

⁴⁰ Asinoni Yakomba waangunwine vana va vimanga kuvatundisa ku vimembe, co wavakengesele ku mutambela wa vimuna vamingolila, na vaje vakuzivala ku vutanga vwa Lambani. Mu ngila eyi vene, vutanga vwa Yakomba vwatumine, oloni kavakumbasanene na vaje va Lambani.

⁴¹ Omo vimuna va nzili vavambwile, Yakomba wakele nakwaka minango kulutwe lwavo omo vanwa mema mu vwato, ngeci vasemene mukati ka minango ije.

⁴² Oloni kaakele minango kulutwe lwa vaje vakuzeya. Co vaje vakuzeya vapwile va Lambani, cooni vaje va nzili, vakevo vapwile va Yakomba.

⁴³ Mu ngila eyi vene, Yakomba wafukile manene. Wakele na matanga amangi, na vindungo va vanalume, na ava va vanakazi, na tumelo, na vimulu.