Kushangumuka 29 - Livulu lya Shukulu Kalunga

Yakomba eta kwimbo lya Lambani

¹ Asinoni Yakomba waile vungenzi vwendi, ku lifuti lya mu ngangela.

² Aje vene wetele a lisima ku cana kuje kwakele matanga atatu a vimanga vavutamene kumukulo. Co aje matanga akele nakunwanwanwa mu lisima lije vene livafwikile limanya lyakama.

³ Omo matanga oshe analikungulwila amolika, co tunyungi vandumuna limanya nakunwisa matanga avo. Asina lalo velwisilako limanya omo vananu laja mema.

⁴ Yakomba wehwile tunyungi ngwendi, “Eni vandolome vange, mutunda kuli?” Vamukumbulwile ngwavo, “Tutunda ku Halane.”

⁵ Co wavehwile ngwendi, “Muzivuka Lambani muna Nahole ndi?” Vamukumbulwile ngwavo, “Eyo, tumuzivuka.”

⁶ Co Yakomba wavehwile lalo ngwendi, “Ikeye nenduka mwamuvwa ndi?” Vamukumbulwile ngwavo, “Eyo nenduka mwamuvwa, kenga, na munendi Lakele uje alinakwija na vutanga vwendi vwa vimanga.”

⁷ Yakomba wendekele kuli tunyungi ngwendi, “Kengeni litangwa kulicili, simbu yakukungulula vimanga kanda icete, omo vika kumuvanwisa mema ngeci veluke mukulya lalo?”

⁸ Co tunyungi vamukumbulwile ngwavo, “Kutwasa kuvanga noo matanga oshe anakungulukila amo kuno, co twandumuna limanya ku lisima, asinoni tunwisa vimanga mema.”

⁹ Omo Yakomba wakele nakwendeka navo, co Lakele wetele amo na vimanga va ishe vaje vanyungile.

¹⁰ Omo Yakomba wamwene Lakele amo na vutanga vwa vimanga va inanu Lambani, washwenyele ku lisima, wandumwine limanya nakunwisa vimanga.

¹¹ Asinoni watsembele Lakele, co washangumukile kulila omwo wavwaelelele.

¹² Wamulekele ngwendi, “Yange nji mwehwa wa isho, nji muna Lembeka.” Co Lakele washatukile nakukaleka ishe.

¹³ Omo Lambani wazivile muzimbu wa ali mwehwendi Yakomba, co washatukile lumbisi nakumushesha, wamuvumbatelele nakumutsemba, wamutwalele ku njuvo. Cooni Yakomba watangelele Lambani muzimbu wa vyuma vyoshe vije vyalingiwile,

¹⁴ co Lambani wamukumbulwile ngwendi, “Eyo, mwa vushunga vene yove unapu u mwehwange, maninga ange vene.” Ngeci Yakomba wakele kuje ngonde yoshe yamutunu.

Yakomba apangela Lakele na Leya kuli Lambani

¹⁵ Lambani wendekele kuli Yakomba ngwendi, “Kesi unjipangele ngoco omwo u kavushoko kange embwe. Njikufweta vika?”

¹⁶ Lambani wakele na vana vendi vavali va vanakazi, lizina lya mukulunu lyapwile Leya, na lizina lya shongo lyapwile Lakele.

¹⁷ Leya wakele na mesho akutsitsivala, oloni Lakele akumukenga wapwile wamuvwa manene.

¹⁸ Yakomba wazemene Lakele, co wendekele kuli Lambani ngwendi, “Njikamipangela myaka itanu na ivali nga munjitava kwambata Lakele.”

¹⁹ Lambani wamukumbulwile ngwendi, “Mwamuvwa kumwambata yove kutuvakana kumwambata kuli munalume weka. Ngecivene, kala kuno ngeci unjipangele.”

²⁰ Yakomba wapangelele Lambani myaka itanu na ivali ngeci ambate Lakele, oloni simbu ije yasholokele ngwe matangwa amandondo lika kuli ikeye, omwo Yakomba wazemene Lakele manene.

²¹ Asinoni Yakomba wendekele kuli Lambani ngwendi, “Njaneni oni munakazi wange njambate, omwo matangwa anapumo.”

²² Co Lambani walingile ciwano cakama ca vulo, walanyele vanu vavangi va mu mutambela uje.

²³ Oloni vutsiki vuje watwalele Leya kuli Yakomba, co Yakomba walimwene nendi.

²⁴ Lambani waanene ndungo yendi wa mumbanda Zilipa kuli munendi Leya kupwa mukwasi wendi.

²⁵ Alikaki mutondo Yakomba wanangukile ngeci kuma vanamwana Leya. Ngecivene, waile kuli Lambani nakwendeka ngwendi, “Vikajo wanjilingila ngeci? Yange njapangelele Lakele. Omwo vikajo unanjikwisila?”

²⁶ Lambani wamukumbulwile ngwendi, “Capwa cilika cetu kushombwesa akulivanga mwana wa mukulunu kesi wa shongo embwe.

²⁷ Vandamena tai simano ya vushombolwa icihwe, asinoni njikakwana lalo Lakele. Nga umushaka, co ukapanga lalo myaka itanu na ivali.”

²⁸ Yakomba watavele, co omo ciwano ca vushombolwa cahwile, Lambani waanene munendi Lakele kuli Yakomba kupwa munakazi wendi lalo.

²⁹ Lambani waanene ndungo yendi wa mumbanda Mbileha kuli munendi Lakele kupwa mukwasi wendi.

³⁰ Ngecivene, Yakomba wakele amo na Lakele, co wamuzemene manene kutuvakana Leya. Asinoni wapangelele lalo Lambani myaka ikwavo itanu na ivali.

Vana va Yakomba

³¹ Shukulu Kalunga wamwene ngeci Yakomba wazemene manene Lakele kutuvakana Leya, co washokolwele shivu ya Leya ngeci akale na vana, oloni Lakele wapwile mumba.

³² Leya wakele na kafumba, wakitile mwana wa munalume. Wendekele ngwendi, “Shukulu Kalunga natundisa vusiwa vwange, cooni munalume wange akanjizema manene kutuvakana Lakele.” Ngecivene, wamulukile lizina lyendi Luvena.

³³ Co Leya wakele lalo na kafumba, wakitile mwana wa munalume mukwavo. Wendekele ngwendi, “Shukulu Kalunga nanjana lalo mwana wa munalume omwo nazivi ngeci munalume wange kanjizemene.” Ngecivene, wamulukile lizina lyendi Simyoni.

³⁴ Co Leya wakele lalo na kafumba, wakitile mwana wa munalume mukwavo. Wendekele ngwendi, “Ololo munalume wange akalikuta amo nange omwo njinamukitila vana va vanalume vatatu.” Ngecivene, wamulukile lizina lyendi Levi.

³⁵ Co wakele lalo na kafumba, wakitile mwana wa munalume mukwavo. Wendekele ngwendi, “Njikashangazala Shukulu Kalunga. Ngecivene, wamulukile lizina lyendi Yunda.” Co walikelele kukita.