Kushangumuka 27 - Livulu lya Shukulu Kalunga

Isake avezikisa Yakomba

¹ Omo Isake nakuluvala laja na mesho endi akele na kavwivwivwi, wasanene Isau munendi wa mukulunu, wendekele kuli ikeye ngwendi, “Munange!” Co Isau wamukumbulwile ngwendi, “Yange uno shukulu.”

² Isake wendekele ngwendi, “Kenga, yange njakuluvala laja, njili muyehi na kutsa.

³ Ambata vuta vwove na mikili yove, ya mu shwata ukanjitsiileko kasitu,

⁴ ngeci wakunjitelekele vyakulya vya lwengo lwaluvwa ngwe muje munjashaka. Co wakunjinenelevyo, ngeci omo njakumanesa kulya, asinoni njakukuvezikise simbu kanda njicitse.”

⁵ Simbu Isake acili nakwendeka na Isau, kuma Lembeka namutolilila. Co omo Isau waile mukuyomba,

⁶ Lembeka wendekele kuli munendi Yakomba ngwendi, “Ololo njazivi isho nendeka na ndolome yove Isau ngwendi,

⁷ ‘Njinenele situ ya mu shwata, unjitelekeleyo. Co omo njinali, njakukuvezikise civezikiso cange ku mesho a Shukulu Kalunga simbu kanda njicitse.’ ”

⁸ Co Lembeka wendekele lalo ngwendi, “Ololo munange njitolilile ngeci ulinge vyuma evi vinjendeka.

⁹ Ya ku vutanga ukashakeko vana va vimembe vavali, njakuvateleke nakulinga vyakulya vije vyazema isho manene.

¹⁰ Omo njamanesa kuteleka, co wakutwalela isho ngeci akalye, co akakuvezikise simbu kanda acitse.”

¹¹ Oloni Yakomba wendekele kuli vaina ngwendi, “Mwazivuka ngweni Isau wakala na vukupa a muvila wendi, oloni yange kunjesi navwo.

¹² Omo tate akanjipapateya, amo akawana ngeci njilinakumukwisa, co a ngila eyi, njilinakulishakela lika cisingo yange vavenya kutuvakana civezikiso.”

¹³ Co vaina vamukumbulwile ngwavo, “Munange, cisingo eci ciije ali yange, linga ngwe omwo njinendeka, ya lika ukashake vana va vimembe.”

¹⁴ Yakomba waile nakukashaka vana va vimembe, co wavanenele kuli vaina, co vaina vatelekele vyakulya vije vyazemene Isake.

¹⁵ Asinoni Lembeka wanonele vuzalo vwavuvwa vwa Isau, vuje vwatulikile mu njuvo, wavuzikile Yakomba.

¹⁶ Co wamwakele vilambu vya vana va vimembe a mavoko endi na a mukoshi aje ajenekele vukupa.

¹⁷ Co wamwanene vyakulya vyakutovala amo na makende aje ocele.

¹⁸ Asinoni Yakomba waile kuli ishe nakwendeka ngwendi, “Tate!” Co ishe wamukumbulwile ngwendi, “Ewa munange iyajo owo?”

¹⁹ Yakomba wamukumbulwile ngwendi, “Yange munove wa mukulunu Isau, njinalingi ngwe muje muwanjilekele. Indukeni mwane mulye situ eyi njinaminenela, ngeci munjivezikise.”

²⁰ Co Isake wamukumbulwile ngwendi, “Munange, navwasi mukajo unawana situ?” Yakomba wamukumbulwile ngwendi, “Shukulu Kalunga Njambi yove ikeye nanjikwasa ngeci njiiwane.”

²¹ Co Isake wendekele kuli Yakomba ngwendi, “Munange shwenya muyehi ngeci njikupapateye, nga mwa vushunga yove munange Isau ndi weka.”

²² Co Yakomba washwenyele kuyehi na ishe. Co Isake wamupapateyeye nakwendeka ngwendi, “Lijwi lyove ni lilinakusholoka ngwe lya Yakomba, oloni mavoko ove ni analifu ngwe mavoko a Isau.”

²³ Oloni Isake kanangukile ngeci ou alinakwendeka nendi napu Yakomba omwo mavoko a Yakomba akele na vukupa ngwe mavoko a Isau. Co Isake wavezikisile Yakomba,

²⁴ oloni wamwihwile lalo ngwendi, “Mwa vushunga yove Isau ndi?” Co Yakomba wamukumbulwile ngwendi, “Yange vene.”

²⁵ Co Isake wendekele ngwendi, “Njineneleko situ imo njilye. Co omo njinamanesa kulya, asinoni njikuvezikisa.” Co Yakomba wanenele situ kuli ishe, wamunenelele lalo vinyu, co Isake wanwile.

²⁶ Asinoni Isake wendekele kuli ikeye ngwendi, “Njishwenye muyehi unjitsembe munange.”

²⁷ Omo Yakomba washwenyele muyehi na kumutsemba, co Isake wanikile a vuzalo vwendi, co wamuvezikisile, wendekele ngwendi, “Vweko vwavuvwa vwa munange vunalifu ngwe vweko vwa lihya lije lyanavezikisa Shukulu Kalunga.

²⁸ Njambi akwane nyonzi yakutunda mwilu, mahya ove apwe a vwilo, akwane vimbuto vyavingi na vinyu!

²⁹ Miyati yoshe vakapwe vangamba vove, co vanu voshe vakakulemese. Ukashwane vavushoko vwove voshe, na vatekulwila va vaka-nyoko vakakulemesa. Vaje vakakusinga, navo vakasingiwe, co vaje vakakuvezikisa, vakapwe vakuvezika.”

Isau alomba civezikiso kuli Isake

³⁰ Co capwile ngeci omo Isake namanesa kuvezikisa Yakomba, na Yakomba natunduko laja, co ndolome yendi Isau wetele kutunda mu shwata mukuyomba.

³¹ Co ikeye lalo watelekele vyakulya vyakutovala, wavitwalele kuli ishe, wendekele ngwendi, “Tate indukeni mutumbame mulye situ eyi njinaminenela, ngeci munjivezikise.”

³² Isake wamwihwile ngwendi, “Yove iyajo?” Isau wamukumbulwile ngwendi, “Yange munove wa mukulunu Isau.”

³³ Ngecivene, Isake walikomokelele nakujaja, co wehwile ngwendi, “Kuma iyajo ou natsiile kasitu nakunjinenelaye? Njamanesa kulya vene omo simbu kanda wije. Co njinamuvekisa laja, cili akapwa wakuvezika.”

³⁴ Omo Isau wazivile majwi awa, co walilile manene nakutambeka nakuviilila manene. Wendekele ngwendi, “Tate njivezikiseko nange lalo!”

³⁵ Co Isake wamukumbulwile ngwendi, “Ndolome yove nezile nakunjikwisa. Ikeye natambula civezikiso cove.”

³⁶ Co Isau wendekele lalo ngwendi, “Eyi ikeyo simbu yamucivali Yakomba nanjikwisa. Kunjasa kukomoka omo lizina lyendi lyapwa Yakomba. Ikeye wanjitambwile moko ya vu ntwatwa vwange, co ololo lalo nanjitambula civezikiso cange. Kuma yange kuunjivezikisa lalo civezikiso cimo ndi?”

³⁷ Isake wamukumbulwile ngwendi, “Kenga, njinapwisa laja Yakomba shukulu yove, co njinapwisa vavushoko vwove voshe kupwa vindungo vendi. Njinamwana vimbuto na vinyu. Co ololo nacimo cai njasa kulinga kuli yove munange!”

³⁸ Oloni Isau wendekele lalo ngwendi, “Tate, kuma ukavezikisa lumolika ndi? Nange lalo tate njivezikiseko!” Co walombele nakulila manene.

³⁹ Asinoni Isake wendekele kuli ikeye ngwendi, “Kukwesi nyonzi ikatunda mwilu ikaija ali yove, kuukakala na mahya a vwilo.

⁴⁰ A mukwale wove akeo ukayoyela, co ukapwa ndungo ya ndolome yove. Oloni omo ukamutengulukila, co ukacakunuka ku mandauluwa yendi.”

⁴¹ Co Isau wazindile Yakomba, omwo ikeye Yakomba watambwile civezikiso cije capandele kupwa ca Isau. Co Isau wayongwele ngwendi, “Simbu yakulila tate ili muyehi, akeo anjikatsiila ndolome yange Yakomba.”

⁴² Oloni omo Lembeka wazivile vutumbe vwa Isau, wasanene Yakomba nakumuleka ngwendi, “Tolilila, ndolome yove Isau ali na vutumbe vwakukuwana ngeci akutsiye.

⁴³ Ngecivene, ololo munange, linga eci cinjikuleka. Ano vene, ya kuli ndolome yange Lambani ku Halane,

⁴⁴ ukakale kuje kasimbu, noo litoto lya ndolome yove linatulu,

⁴⁵ mu ngila eyi, Isau akevala evi viwunalingi kuli ikeye. Asinoni njikatuma munu akakushaka ngeci wiluke kuno. Omwo vikajo njikajena yeni muvuvali vweni a litangwa lyangongo?”

Isake atuma Yakomba kuli Lambani

⁴⁶ Lembeka wendekele kuli Isake ngwendi, “Njinajuka ali vanakazi va Isau va vaHiti. Nga na Yakomba lalo akambata umo wa vanakazi va vaHiti ngwe ava, mwamuvwa kuli yange nga kutsa vene.”