Kushangumuka 25 - Livulu lya Shukulu Kalunga

Vatekulwila va Avilahama vakwavo

¹ Avilahama wambatele munakazi wendi mukwavo lizina lyendi Ketula.

² Co Avilahama wakitilile vana kuli Ketula mazina avo, Zimelane, na Njokeshane, na Mendane, na Mindyani, na Ishembeka, na Shuwa.

³ Njokeshane ikeye wapwile ishe ya Shemba, na Ndendane, co vatekulwila va Ndendane mazina avo, Ashulime, na Letushime, na Leumime.

⁴ Vana va Mindyani mazina avo, Efa, na Efele, na Hanoki, na Ambinda, na Elenda. Voshe ava vapwile vatekulwila va Ketula.

⁵ Ngecivene, Avilahama waanene Isake vufuko vwendi vwoshe vuje vwakele navwo,

⁶ oloni omo simbu wakele nakuyoya, Avilahama wapangezelele vwana kuli vana vendi vaje vakitilile kuli vanakazi vendi va mbanja. Asinoni watumine ava vana ku lifuti lya mu ngangela, kulyala na munendi Isake.

Kutsa kwa Avilahama nakumutsinda

⁷ Avilahama wayoyele myaka 175,

⁸ co watsile omo wakuluvalele manene. Vamutsindile kuje vatsindile vavushoko vwendi.

⁹ Ngecivene, vana vendi va vanalume, Isake na Ishimela, vamutsindile mu Linzenzengoma lya Makepela, mu lihya lije lyakele mu ngangela ku Mamele, lije lyapwile lihya lya Efelone muna Zohale kaHiti.

¹⁰ Likelyo lihya lije Avilahama walandele kuli vaHiti, muvuvali vwavo Avilahama na munakazi wendi Sala vavatsindile kuje.

¹¹ Njambi wavezikisile Isake omo ishe Avilahama watsile. Isake watungile kuyehi na “Lisima lya Muka-kuyoya Ou Nanjimono Yange.”

Vatekulwila va Ishimela

¹² Ava vakevo vatekulwila va Ishimela, muna Avilahama uje yakitile na Hangale kaIngito ndungo ya Sala.

¹³ Ishimela wakele na vana va vanalume mazina avo, Nembayote, na Kendale, na Andembele, na Mimbesamu,

¹⁴ na Mishame, na Nduma, na Masa,

¹⁵ na Handande, na Tema, na Njetule, na Nafishe, na Kendema.

¹⁶ Ava vakevo vapwile vakukulwila va miyati likumi na ivali, co mazina avo vaalukile membo avo na vilombo vyavo, vapwile vana va vimyene va vanalume likumi na vavali ngwe ku miyati yavo.

¹⁷ Ishimela watsile omo wakele na myaka 137.

¹⁸ Co vatekulwila va Ishimela vatungile mukati ka Havila na Shule ku mutambela wa mu ngangela kuyehi na nginga ya Ingito mu ngila yakuya ku Asilya. Vakevo vakele kulyala na vatekulwila vakwavo va Avilahama.

Kusemuka kwa Isau na Yakomba

¹⁹ Ava vakevo vatekulwila va Isake muna Avilahama.

²⁰ Isake wakele na myaka makumi awana omo wambatele Lembeka ndokazi ya Lambani vana va Mbetwele (kaAlama wa ku Mesopotamya.)

²¹ Isake walombelele kuli Shukulu Kalunga ali munakazi wendi Lembeka, omwo Lembeka wapwile mumba. Co Shukulu Kalunga wazivile lilombelo lyendi ngeci Lembeka wakele na kafumba.

²² Omo simbu kanda vana vampasa vasemuke, valilwisile umo na mukwavo mwimo lya Lembeka. Co Lembeka wendekele ngwendi, “Omwo vikajo cuma cakufwa ngacije cilingiwa kuli yange?” Co waile mukwihula kuli Shukulu Kalunga mu lilombelo ngeci amukumbulule.

²³ Co Shukulu Kalunga wamukumbulwile ngwendi, “Miyati ivali ili mwimo lyove, ukakita vanu vavali vaje vakalizunga. Umo akakala na nzili kuhyana mukwavo, mukulunu ikeye akapangela shongo yendi.”

²⁴ Omo simbu yendi yakukita yetele, Lembeka wakitile vana vampasa va vanalume.

²⁵ Mwana wakulivanga wapwile wakuvenguluka, muvila wendi wakele na vukupa, ngeci vamulukile Isau.

²⁶ Mwana wamucivali omo wasemukile, wakwatele ku linsinsinye lya Isau, co vamulukile Yakomba. Isake wakele na myaka makumi atanu na limo omo Isau na Yakomba vasemukile.

Isau alandesa kuli shongo yendi moko ya vu ntwatwa vwendi

²⁷ Isau na Yakomba vakolele. Isau wapwile ciyambi wakama, wapwile munalume uje wazemene mu shwata, oloni Yakomba wapwile munalume wa kwoloka, wazemene kukala mu vimbalaka.

²⁸ Isake wazemene Isau omwo wakele nakuvwaelela kulya situ ije yakele nakumutsiila. Oloni Lembeka wazemene Yakomba.

²⁹ Litangwa limo, Yakomba wakele nakuteleka musozi wa makunde akuvenga, co Isau wezile kutunda mu shwata mukuyomba. Ikeye wakele na njala,

³⁰ co wendekele kuli Yakomba ngwendi, “Njinatsi njala, njaneko vyakulya ovyo vyakuvenguluka.” (Omu mukemwo valukile Isau lizina lya Endome.)

³¹ Yakomba wamukumbulwile ngwendi, “Njikakwanavyo nga unjana moko ya vu ntwatwa vwove.”

³² Isau wamukumbulwile ngwendi, “Kenga! Yange njinatsi njala, cooni vu ntwatwa vwange vukanjikwasa vikajo?”

³³ Oloni Yakomba wamukumbulwile ngwendi, “Akulivanga lisinge ngeci ukanjilandesa moko ya vu ntwatwa vwove.” Isau walisingile, co walandesele moko ya vu ntwatwa vwendi kuli Yakomba.

³⁴ Asinoni Yakomba wamwanene makende na musozi wa makunde. Co walile nakunwa, asinoni wakatukile waile. Omu mukemwo mwayengwilile Isau moko ya vu ntwatwa vwendi.