Kushangumuka 22 - Livulu lya Shukulu Kalunga

Njambi ashika Avilahama kukombelela Isake

¹ Munima ya vyuma evi, Njambi wesekele Avilahama. Wamusanene ngwendi, “Avilahama!” Co Avilahama wamukumbulwile ngwendi, “Ewa, yange uno Shukulu!”

² Njambi walekele Avilahama ngwendi, “Ambata munove Isake, ou munove umolika iwazema manene. Ya ku lifuti lya Moliya, ukamukombelele kupwa n̄ombelo ya kwenyeka ku munkinda uje unjikakuleka.”

³ Alikaki mutondo-tondo, Avilahama wacavele vitale vyakukakombelela navyo, co walemekele cimulu cendi, waile na Isake, amo na vangamba vavali ku mutambela uje wamulekele Njambi ngeci ayeko.

⁴ A litangwa lyamucitatu, Avilahama wandwile mesho endi, co wamwene mutambela uje alyala kamandondo.

⁵ Asinoni wendekele kuli vangamba vendi ngwendi, “Saleni kuno amo na cimulu. Co yange na munange tuya kuje nakulemesa, asinoni tukeluka lalo kuli yeni.”

⁶ Ngecivene, Avilahama watwikile Isake vitale vyakukombelela navyo, oloni ikeye wambatele manungu a tuhya na moko. Co vaile muvuvali vwavo.

⁷ Isake wendekele kuli ishe ngwendi, “Tate!” Ishe wamukumbulwile ngwendi, “Ewa munange.” Isake wehwile ngwendi, “Njinamono lika manungu a tuhya na vitale, oloni muna manga wa n̄ombelo ya kwenyeka ali kulijo?”

⁸ Avilahama wamukumbulwile ngwendi, “Njambi ikeye vavenya akaliwanena manga wa n̄ombelo ya kwenyeka munange.” Co muvuvali vwavo vaile amolika.

⁹ Omo vetele ku mutambela uje wamulekele Njambi, Avilahama watungile mutula, waakeleo vitale. Co wakutile munendi nakumulangeka a mutula akamwa ya vitale.

¹⁰ Asinoni wanonele moko ngeci atsiye munendi.

¹¹ Oloni kangelo ka Shukulu Kalunga wamusanene oku ali mwilu ngwendi, “Avilahama, Avilahama!” Avilahama wakumbulwile ngwendi, “Ewa, yange uno Shukulu.”

¹² Co kangelo ka Shukulu Kalunga wendekele ngwendi, “Kesi uvulumune mwanike nameme kulinga cuma cimo kuli ikeye. Ololo njinazivuka ngeci yove ulinakukomoka Njambi, omwo yove unatavele kunjana munove umolika.”

¹³ Avilahama wandukile, co wamwene lijamba lya manga nakwatiwa ku vimbinga mu liputa. Asinoni waileko nakumukwata, co wamukombelelele kupwa mulambu wa kwenyeka mukumwingisa muli munendi Isake.

¹⁴ Avilahama walukile lizina lya mutambela uje ngwendi “Shukulu Kalunga Aliwanena.” Co nameme ku lelo vene vanu valinakwendeka ngwavo, “A munkinda wa Shukulu Kalunga ikeye vavenya Shukulu Kalunga aliwanena.”

¹⁵ Co kangelo ka Shukulu Kalunga wasanene Avilahama simbu yamucivali oku ali mwilu ngwendi,

¹⁶ “Njilisinga a lizina lyange. Yange Kalunga njinendeka ngwange, njikatumisa manene vivezikiso vyove omwo yove unalingi cuma eci, omwo unatavele kunjana munove umolika.

¹⁷ Njikakuvezikisa nakutumisa vatekulwila vove ngwe vingongonosi vya mwilu, nambe ngwe lishen̄avu. Co vatekulwila vove vakafungulula vitozi vavo.

¹⁸ Muli vatekulwila vove miyati yoshe ya asi ikavezika, omwo yove unononoka kushika kwange.”

¹⁹ Ngecivene, Avilahama welukile kuli vangamba vendi amo na Isake, co voshe vaile amolika kwimbo lya Avilahama ku Mbeleshemba.

Vatekulwila va Nahole

²⁰ Munima yevi, Avilahama wazivile ngeci Mileka nakiti vana va vanalume vatanu na vatatu kuli ndolome yendi Nahole.

²¹ Ntwatwa wapwile Uza, co kwatele ndolome yendi Mbuze, na Kemwele ikeye ishe ya Alama,

²² na Kesende, na Hazo, na Pilendasha, na Njendelafe, na Mbetwele.

²³ Co Mbetwele ikeye wapwile ishe ya Lembeka. Mileka wakitile ava vana va vanalume vatanu na vatatu kuli Nahole ndolome ya Avilahama.

²⁴ Leume lishano lya mbanja munakazi wa Nahole, ikeye lalo wakitile vana va vanalume, Temba, na Ngahame, na Tahashe na Maka.