Kushangumuka 21 - Livulu lya Shukulu Kalunga

Kusemuka kwa Isake

¹ Shukulu Kalunga wavezikisile Sala ngwe muje mwamukulaesele,

² ngecivene, Sala wakele na kafumba, co wakitile mwana wa munalume omo Avilahama te nakuluvala laja. Mwana wasemukile vene a simbu ije yatumbwile Njambi,

³ ngecivene, Avilahama wamulukile lizina lyendi Isake.

⁴ Omo Isake wakele na matangwa atanu na atatu, co Avilahama wamutuwile, ngwe muje mwamushikile Njambi.

⁵ Avilahama wakele na myaka 100 omo Isake wasemukile.

⁶ Sala wendekele ngwendi, “Njambi nanjinenela mbwase nakujolela. Vanu voshe vakaziva a cuma eci vakajolela amo nange.”

⁷ Co Sala wendekele lalo ngwendi, “Iyajo wayongwele ngeci Sala akakala na mwana kuli Avilahama? Kuma njinakiti nendi mwana wa munalume mu vukulukazi vwendi.”

⁸ Mwana wakulile, co omo wetele a litangwa lije washumukile, Avilahama walingile ciwano cakama.

Vasheka Hangale na Ishimela

⁹ Litangwa limo Ishimela, muna Avilahama, uje yakitile na Hangale kaIngito, wakele nakweha na Isake muna Sala.

¹⁰ Ngecivene, omo Sala wavamwene, co wendekele kuli Avilahama ngwendi, “Sheka ou ndungo wa munakazi na munendi. Mwana wou munakazi kapandele kushwana vufuko vwove, vuje vwakashwana munange Isake.”

¹¹ Cuma eci cayandesele Avilahama manene, omwo Ishimela nendi lalo wapwile munendi.

¹² Oloni Njambi wendekele kuli Avilahama ngwendi, “Kesi ulinyenge ali Ishimela na ali ndungo yove Hangale. Linga omu mwanakuleka Sala, omwo muli Isake mukemwo ukawanenamo vatekulwila vaje njinakukulaesa.

¹³ Co njikana lalo vana vavangi kuli muna ndungo yove wa munakazi, omwo nendi lalo napu munove, ngecivene, njikapwisa vatekulwila vendi muyati wakama.”

¹⁴ Alikaki mutondo-tondo, Avilahama waanene Hangale vyakulya na njeke ya cilambu yakushula ya mema. Wamutwikilevyo a mutwe, co wamwakele mwana ku mwongo, wamushuwile. Ngecivene, Hangale waile nakuyevangela mu mambo ya Mbeleshemba.

¹⁵ Omo mema oshe ahwile, co Hangale wasezele munendi mwisi ya liputa,

¹⁶ watumbamene asi alyala kamandondo ngwe nunda ya mamita 100. Walyendekesele mu mbunge yendi ngwendi, “Kunjapandele kumona atsila munange.” Omo watumbamene kuje, co washangumukile kulila.

¹⁷ Njambi wazivile kulila kwa mwana, co kangelo ka Njambi oku ali mwilu watambekele kuli Hangale ngwendi, “Hangale, vika ulinyenga? Kesi uzive lyova. Njambi nazivi kulila kwa munove.

¹⁸ Katuka ukamushake nakumuzembeleka, omwo njikapwisa vatekulwila vendi muyati wakama.”

¹⁹ Asinoni Njambi watonesele mesho a Hangale, co Hangale wamwene lisima lya mema. Waile ku lisima, co washulisile ije njeke ya cilambu na mema, co waaneneko amo munendi.

²⁰ Njambi wanyungile Ishimela, co omo wakolele wakele mu mambo ya Palane, ikeye wapwile ciyambi wakama.

²¹ Vaina vamwambatelele munakazi wa kaIngito.

Lizivasano akati ka Avilahama na Ambimeleki

²² A simbu ije Ambimeleki na Fikole muka-kushika mbunga ya mashwalale vendi vaile kuli Avilahama, vendekele kuli ikeye ngwavo, “Njambi ali nove mu vyuma vyoshe vije ulinakulinga.

²³ Ngecivene, lisinge ano vene ku mesho a Njambi ngeci kesi ukanjikwise, nambe kukwisa vana vange, nambe vatekulwila vange. Omwo yange njakulingi mwamuvwa, ngeci nove lalo unapande kunjikulaesa ngwove ukanjilinga mwamuvwa mu lifuti lino muulinakukala.”

²⁴ Avilahama wakumbulwile ngwendi, “Njalisingi.”

²⁵ Asinoni Avilahama walinyengelele kuli Ambimeleki omwo ya lisima lije vambatele vangamba va Ambimeleki.

²⁶ Co Ambimeleki wendekele ngwendi, “Kunjizivuka ou nalingi cuma eci, omwo yove kuwanjilekele, kuvanga lelo vene asinoni njivizive.”

²⁷ Ngecivene, Avilahama waanene vimanga na vingombe kuli Ambimeleki, co muvuvali vwavo valikumiiye cikumiiyo.

²⁸ Asinoni Avilahama watepesele vimanga va lwavo vatanu na vavali mu vutanga vwendi,

²⁹ co Ambimeleki wamwihwile ngwendi, “Omwo vikajo walingila ngeci?”

³⁰ Co Avilahama wamukumbulwile ngwendi, “Unapande kutambula vimanga ava vatanu na vavali, nga uvatambula, co vapwa vukaleo vwange, ngeci yove unatava ngwove yange vene Avilahama njendile lisima eli.”

³¹ Mukemwo mutambela uje vautumbwile Mbeleshemba, omwo akeo aje uvalisingilile va Avilahama na Ambimeleki.

³² Omo vamanesele kulikumiiya cikumiiyo ku Mbeleshemba, Ambimeleki na Fikole velukile ku lifuti lya Filisitiya.

³³ Avilahama wakunine muti wa tamalisiki mu Mbeleshemba, co walemesele Shukulu Kalunga Njambi wa ku myaka yoshe.

³⁴ Co Avilahama wakele mu lifuti lya Filisitiya simbu yakama.