Kushangumuka 18 - Livulu lya Shukulu Kalunga

Cikulaeso ca mwana wa munalume kuli Avilahama

¹ Shukulu Kalunga washolokele kuli Avilahama kuje ku miti yakujela ya Mamele. Avilahama watumbamene ku cikolo ca mbalaka yendi omwo kwakele ntwima manene,

² omo wandwile mesho endi, co wakengele, wamwene vanalume vatatu vanemana kuje. Vwasi-vwasi omo Avilahama wavamwene, washatukile nakuliwana navo, co watsikamene nakukulamena asi.

³ Avilahama wendekele kuli vakevo ngwendi, “Nga njinawana kutetela ku mesho eni mwane, kesi mutuvakane ku njuvo ya ngamba yeni, icihwimeniko kamandondo.

⁴ Njiminenela mema akujwela ku mendi, munapande kuhwimako kamandondo mwisi ya muti ou.

⁵ Njiminenela lalo na vyakulya vije vyasa kumyana nzili omo mulinakuya mu vungenzi vweni. Munanjisingimika omo munaija ku njuvo ya ngamba yeni.” Vaje vanalume vatatu vamukumbulwile ngwavo, “Twakandelelako, linga ngwe omu muunendeka.”

⁶ Ngecivene, Avilahama wazambwilile ku mbalaka nakwendeka kuli Sala ngwendi, “Zambula, ambata njeke ya vunga vwavuvwa vwakuseneta, ngeci ulinge makende.”

⁷ Asinoni Avilahama washatukilile ku litanga, waangwileko muna ngombe wamuvwa wakununa, wamwanene kuli ngamba yendi, co uje ngamba wamutsiile vwasi-vwasi.

⁸ Ngecivene, Avilahama wanonele mavele akukonda, naa a kukonda, na situ ya muna ngombe, co wajumbwile vaje vanalume. Ngecivene, wavapangezelele vyakulya mwisi ya uje muti, co valile.

⁹ Asinoni vaje vanalume vatatu vamwihwile ngwavo, “Munakazi wove Sala ali kuli?” Avilahama wavakumbulwile ngwendi, “Uje ali muje mu mbalaka.”

¹⁰ Umo wavo wendekele ngwendi, “Mwa vushunga, a simbu ino vene mungolosika, njikeluka lalo, co kenga, munakazi wove Sala akakita mwana wa munalume.” Sala wakele kunima ya Avilahama, kuje ku cikolo ca mbalaka nakutolilila.

¹¹ Avilahama na Sala a simbu ije te vanakuluvala laja, na Sala natinika laja.

¹² Ngecivene, Sala wajolele mu mbunge yendi nakwendeka ngwendi, “Ololo yange njinakuluvala laja, co lalo njinazeye, munalume wange lalo nakuluvala laja, kuma yange cinjili lalo na lishungu lyakukita vana ndi?”

¹³ Asinoni Shukulu Kalunga wehwile Avilahama ngwendi, “Omwo vikajo Sala najolo nakwendeka ngwendi, ‘Njikasa lalo kukita mwana omo njinakuluvala laja ndi?’

¹⁴ Kuma kuli cuma cimo cacikalu kuli Shukulu Kalunga ndi? Ngwe vene munjinendeka, a simbu ino vene mungolosika njikeluka kuli yove, co Sala akakita mwana wa munalume.”

¹⁵ Sala wakele na lyova, co wavyanene ngwendi, “Embwe mwane kunjajolele.” Oloni Shukulu Kalunga wamukumbulwile ngwendi, “Eyo, unajolele!”

Avilahama emanena Sondoma

¹⁶ Co vaje vanalume vatatu vakatukile, vaile ku mutambela kuje kuvakasa kumwenako mwamuvwa limbo lya Sondoma, Avilahama wavasindikiiye a ngila yavo.

¹⁷ Shukulu Kalunga walyendekesele mu mbunge yendi ngwendi, “Kunjasa kushwekela Avilahama vije njiya nakulinga kuje.

¹⁸ Vatekulwila vendi vakapwa muyati wakama wa nzili, co muli ikeye njikavezikisa miyati yoshe.

¹⁹ Njamwangwile ngeci ashike vana vendi na vatekulwila vendi mukunjononoka nakulinga evi vyavivwa na vushunga. Nga vakevo vakacilinga, co njikalinga vyuma vyoshe vije njamukulaesele.”

²⁰ Asinoni Shukulu Kalunga wendekele kuli Avilahama ngwendi, “Njinazivi a vuvi vwakukomokesa vuli mu Sondoma na Ngomola.

²¹ Njinapande kushelumukilako ngeci njikalimwene yange vavenya a vyuma evi njinazivi vya vuvi vwavo nga vinapu vya vushunga.”

²² Asinoni vaje vanalume vavali vaile kulutwe ku Sondoma, oloni Shukulu Kalunga wasalele na Avilahama.

²³ Co Avilahama washwenyele kuli Shukulu Kalunga wamwihwile ngwendi, “Mwa vushunga ulinakuya nakunyongesa vaka-vushunga amo na vaka-vuvi ndi?

²⁴ Nga muje mu nganda muli vanu makumi atanu vaka-vushunga, co ukanyongesa nganda yoshe yamutunu ndi? Kuma kuukavecela ngeci vaje vanu makumi atanu vovoke ndi?

²⁵ Kuukasa kunyongesa vaka-vushunga amolika na vanu vaka-vuvi. Omwo ni kucitava! Kuukasa kulinga ngacije embwe! Nga cikafwa ngacije, vaka-vushunga vakavasompe ngwe vaka-vuvi. Nga ngoconi, co cacikalu. Yove u muka-kusompa wa ano asi oshe, co ukalingi mwa vushunga.”

²⁶ Co Shukulu Kalunga wamukumbulwile ngwendi, “Nga njikawana vanu makumi atanu vaka-vushunga mu Sondoma, co njikavasambesa voshe omwo ali vakevo vaje.”

²⁷ Avilahama wendekele lalo ngwendi, “Shukulu njisambese a lukakateya lwange lwakwendeka nove. Yange nji munu wangoco, kunjapandele kwendeka cuma cikwavo lalo.

²⁸ Oloni vatijo nga kuje kuli lika vanu makumi awana na vatanu vaka-vushunga? Ukanyongesa nganda yoshe omwo vaje vatanu vahiho a vaje vanu makumi atanu ndi?” Co Shukulu Kalunga wamukumbulwile ngwendi, “Kunjikanyongesa nganda embwe nga njikawanamo vanu makumi awana na vatanu vaka-vushunga.”

²⁹ Avilahama wendekele lalo ngwendi, “Nga kuli vanu makumi awana lika, co vati?” Shukulu Kalunga wamukumbulwile ngwendi, “Nga kuli lika vanu makumi awana, kunjikainyongesa.”

³⁰ Avilahama wendekele lalo ngwendi, “Shukulu Kalunga kesi uluvale embwe, oloni njinapande kwendeka lalo. Vatijo nga kuje kuli lika vanu makumi atatu?” Co Shukulu Kalunga wamukumbulwile ngwendi, “Kunjikainyongesa nga njikawanamo vanu makumi atatu.”

³¹ Avilahama wehwile lalo ngwendi, “Shukulu Kalunga, njisambese ku lukakateya lwange lwakwendeka nove. Ngaco mukawanamo lika vanu makumi avali?” Co Shukulu Kalunga wamukumbulwile ngwendi, “Kunjikainyongesa ije nganda nga njikawanamo vanu makumi avali.”

³² Avilahama wehwile lalo ngwendi, “Shukulu Kalunga kesi uluvale embwe, njicendekeko lalo lumolika. Vatijo nga mukawanamo lika vanu likumi?” Co Shukulu Kalunga wamukumbulwile ngwendi, “Kunjikainyongesa nga muje mu nganda muli vanu likumi.”

³³ Omo wamanesele kwendeka na Avilahama, Shukulu Kalunga waile, co Avilahama welukile kwimbo lyendi.