Kushangumuka 16 - Livulu lya Shukulu Kalunga

Hangale na Ishimela

¹ Salai munakazi wa Avilama, kakitile vana. Oloni wakele na ndungo yendi wa mumbanda wa kaIngito lizina lyendi Hangale.

² Ngecivene, Salai wendekele kuli Avilama ngwendi, “Yange Shukulu Kalunga nanjumina kukita vana. Njikulomba ngwange ulimone nou ndungo yange wa mumbanda, amo akanjikitilako mwana.” Co Avilama watavele vije vyendekele Salai.

³ Ngecivene, Salai waanene Hangale ndungo yendi kuli Avilama ngeci apwe lishano lyendi lya mbanja. Eci calingiwile omo Avilama wakele mu lifuti lya Kanana myaka likumi.

⁴ Avilama wakele amo na Hangale, co Hangale wakele na kafumba. Ngecivene, Hangale omo wamwene ngeci ali na kafumba, walyalesele nakushaula Salai.

⁵ Co Salai wendekele kuli Avilama ngwendi, “Ou unapu mulonga wove ngeci Hangale alinakunjishaula. Yange vene njamwanene kuli yove, co kutunda aje alimwene ngeci ali na kafumba, ikeye alinakunjishaula. Shukulu Kalunga atusompe kuwana iya umo nalingi mwamuvwa, nove nange!”

⁶ Avilama wamukumbulwile ngwendi, “Kenga, ikeye wapwa ndungo yove, ali mu mavoko ove, wasa kulinga coshe ciwushaka ali ikeye.” Ngecivene, Salai wapangesele Hangale na muuka manene ngeci Hangale watewele.

⁷ Kangelo ka Shukulu Kalunga wawanene Hangale ku lisima mu mambo, ku tapalo ya ku Shule.

⁸ Co kangelo wendekele ngwendi, “Hangale ndungo ya Salai, ulinakutunda kuli? Co lalo ulinakuya kuli?” Hangale wamukumbulwile ngwendi, “Njili na kutewa ku mesho a shukulu yange Salai.”

⁹ Co kangelo wendekele kuli Hangale ngwendi, “Iluka kuli shukulu yove Salai ukapwe u ndungo yendi vene.”

¹⁰ Co kangelo ka Shukulu Kalunga wamulekele ngwendi, “Njikatumisa manene vatekulwila vove ngeci naumo wai akasa kuvalava.

¹¹ Ukakala na mwana wa munalume, ukamuluka lizina lyendi Ishimela, omwo Shukulu Kalunga nazivi tuyando twove.

¹² Oloni munove akayoya ngwe ngolo, ikeye akalizinda na vanu voshe, co na vakevo lalo vakamuzinda. Ikeye akakala kulyala na vavushoko vendi voshe.”

¹³ Hangale walyendekesele ikeye vavenya ngwendi, “Mwa vushunga njinamono Njambi oku njiciyoya!” Ngecivene, Hangale watumbwile Shukulu Kalunga uje wendekele kuli ikeye ngwendi, “Ou napu Njambi Muka-kumona.”

¹⁴ Omu mukemwo vanu vakatumbula lisima eli lyakala mukati ka Kandeshe na Mbelende ngwavo, “Lisima lya Muka-kuyoya Ou Muka-kunjimona.”

¹⁵ Hangale wakitile mwana wa munalume, wamulukile lizina lyendi Ishimela.

¹⁶ A simbu ije Avilama te ali na myaka makumi atanu na atatu na myaka itanu na umo omo Hangale wakitile nendi mwana.