Kushangumuka 15 - Livulu lya Shukulu Kalunga

Cikumiiyo ca Njambi kuli Avilama

¹ Munima yevi, Shukulu Kalunga wendekele kuli Avilama mu cimona ngwendi, “Kesi uzive lyova Avilama. Yange nji ntelo yove yakukuzikinina ku vushonde, co cikandelela cove cikapwa cakama manene.”

² Oloni Avilama wakumbulwile ngwendi, “Yove Shukulu Kalunga wa Akamwa ya Vyoshe, vuvwa mukajo cikapanga cikandelela cove kuli yange omwo yange kunjesi na vana? Elyazale wa ku Ndamasiku ikeye lika shwana yange.”

³ Co Avilama wendekele lalo ngwendi, “Kenga, yove kuwanjanene vana, co umo wa vindungo vange ikeye akashwana vufuko vwange.”

⁴ Co Shukulu Kalunga wamukumbulwile ngwendi, “Ou ndungo yove Elyazale kesi ikeye akashwana vufuko vwove embwe, oloni munove wove vavenya, ikeye akapwa shwana.”

⁵ Co Shukulu Kalunga wamutuwisile anja nakwendeka ngwendi, “Kenga kwilu, eseka kulava vingongonosi evi. Co vatekulwila vove vakapwa vavangi ngwe vingongonosi evi.”

⁶ Avilama wakulaelele kuli Shukulu Kalunga, co omwo a cuma eci, Shukulu Kalunga wamulaveleleco kupwa vushunga.

⁷ Shukulu Kalunga wendekele kuli Avilama ngwendi, “Yange Kalunga, uje wakutundisile ku Ule ya mu Mbambilone nakukwana lifuti eli kupwa vushwana vwove.”

⁸ Oloni Avilama wehwile ngwendi, “Yove Shukulu Kalunga wa Akamwa ya Vyoshe, njikazivuka vatijo ngwange lifuti eli likapwa lyange?”

⁹ Co Shukulu Kalunga wamukumbulwile ngwendi, “Njinenele ngombe wa lwavo, na membe wa lwavo, na lijamba lya manga, vaje vali na myaka itatu, amo na katela na muna liyembe.”

¹⁰ Ngecivene, Avilama wanenele vaje vimuna kuli Njambi, wavatetangele vipuka-vipuka, co waakele vije vipuka kwatesa ku cikwavo cimo na cimo mu mikana ivali. Oloni tuzila kavatetangele.

¹¹ Co makuvi vashelumukile a vipuka, oloni Avilama wavashekele.

¹² Omo litangwa lyatokele, Avilama walalele manene, co wakele na lyova na cangasisi.

¹³ Shukulu Kalunga wendekele kuli ikeye ngwendi, “Vatekulwila vove vakapwa vangenzi mu lifuti lya vungenzi, co vakapwa vinzinda kuje, vakavayandesa na muuka a myaka 400.

¹⁴ Oloni njikahisa muyati uje ukavapwisa vinzinda, co omo vakaseza lije lifuti lya vungenzi, vakambata vufuko vwavungi nakuya navwo.

¹⁵ Oloni yove ukakuluvala, ukatsa mu kwoloka, co vakakutsinda.

¹⁶ Vatekulwila vove vakeluka muno ku cisemwa camuciwana, omwo kunjikasheke vaAmoli noo vuvi vwavo vunatumu ngeci vakatambule cihiso.”

¹⁷ Omo litangwa lyatokele, lisusulungu lyezile, co kwasholokele ndeo yakele nakukakama vwisi, co mulangi wa tuya wetile mukati ka vipuka vya vaje vimuna.

¹⁸ A litangwa lije vene, Shukulu Kalunga walikumiiye cikumiiyo na Avilama ngwendi, “Njikulaesa kwana lifuti eli lyoshe ku vatekulwila vove, kutunda ku nginga ya Ingito nakweta ku Ndonga ya Yufuleti,

¹⁹ amo na mafuti a vaKeni, na vaKenizi, na vaKandimoni,

²⁰ na vaHiti, na vaPelezi, na vaLefaime,

²¹ na vaAmoli, na vaKanana, na vaNgilengashi, na vaNjevushi.”