Kushangumuka 12 - Livulu lya Shukulu Kalunga

Njambi asana Avilama

¹ Shukulu Kalunga wendekele kuli Avilama ngwendi, “Tunda mu lifuti lyove, na kuli vavushoko vwove, na mu limbo lya isho, ya ku lifuti lije njikakumwesa.

² Njikatumisa vatekulwila vove, co vakapwa muyati wakama. Njikakuvezikisa nakutsimanesa lizina lyove, ngecivene, vavangi vakawana kuvezika muli yove.

³ Njikavezikisa vaje vakakuvezikisa, oloni njikasinga vaje vakakusinga. Co muli yove njikavezikisilamo miyati yoshe.”

⁴ Avilama wakele na myaka 75, omo Shukulu Kalunga wamulekele kutunda ku Halane. Co waile na Lote.

⁵ Avilama waile na munakazi wendi Salai na Lote muna ndolome yendi, na vyoshe vije vyafukile, amo na vindungo voshe vaje vawanene mu Halane, co vakatukile nakuya ku lifuti lya Kanana. Omo vetele mu Kanana,

⁶ Avilama wendele mu lifuti lije noo wetele ku muti wa Oke wakuhwimina ku mutambela wakujela wa Shekeme. A simbu ije vaKanana anga vacikele nakuyoya mu lifuti lije.

⁷ Shukulu Kalunga washolokele kuli Avilama, co wendekele kuli ikeye ngwendi, “Eli likelyo lifuti njikana kuli vatekulwila vove.” Co kuje vene Avilama watungile mutula wa Shukulu Kalunga, uje washolokele kuli ikeye.

⁸ Co akutunda kuje, Avilama wakengeselele mu mbwela ku lifuti lya malundu mu ngangela ya nganda ya Mbetele. Co watungile cilombo cendi mukati ka Mbetele mu kangombe ka yambi na Ayi mu ngangela. Co watungile mutula kuje wakulemesela Shukulu Kalunga.

⁹ Asinoni Avilama wajalukile waile mu mbwela ku lifuti lya Nengeva mu Kanana.

Avilama ali mu Ingito

¹⁰ Oloni kwakele njala ya lyangengela mu lifuti lya Kanana. Ngecivene, Avilama waile mu mbwela ku lifuti lya Ingito, nakukakalako kasimbu lika omwo njala yaamene manene mu Kanana.

¹¹ Omo Avilama wetele kuyehi na nginga ya Ingito, co wendekele kuli munakazi wendi Salai ngwendi, “Yove uwamuvwa manene.

¹² Omo vaka-Ingito vakamona ngeci uwamuvwa, co yange vakanjitsiya, oloni yove kuvakakutsii.

¹³ Yove unapande kwamena mwonyo wange mukukavaleka ngwove u ndokazi yange.”

¹⁴ Omo Avilama na munakazi wendi Salai vetele mu Ingito, co vaka-Ingito vamwene ngeci Salai munakazi wa Avilama wapwile wamuvwa manene.

¹⁵ Co vamo vamyata va mu mbanja omo vamwene Salai, vakalekele mwene vuvwa vwa Salai, ngecivene, Salai vamutwalele ku lipela lya mwene.

¹⁶ Mwene walingile mwamuvwa na Avilama omwo ya Salai, co waanene Avilama matanga a vimanga, na vimembe, na vingombe, na vimulu, na vindungo va vanalume, na ava va vanakazi, na tumelo.

¹⁷ Oloni omo mwene wambatele Salai, co Shukulu Kalunga watumine mishongo yakukomokesa manene ali mwene, na ali vanu vendi va mu lipela.

¹⁸ Co mwene wasanene Avilama nakumwihula ngwendi, “Avilama vikajo wanjilingilamo ngeci? Omwo vikajo kuwanjilekelele ngwove Salai wapwa munakazi wove?

¹⁹ Omwo vikajo wendekele ngwove Salai wapwa ndokazi yove, co unanjitava njimwambate kupwa munakazi wange? Munakazi wove owo mwambate uye nendi!”

²⁰ Co mwene washikile vanu vendi, ngeci vasindikiiye Avilama nakumutuwisa mu lifuti, amo na munakazi wendi na vyuma vyoshe vije vyafukile.