Kushangumuka 11 - Livulu lya Shukulu Kalunga

Kaposhi ka Mbambilone

¹ Akulivanga, vanu voshe vaano a kaye vendekele muyati umolika, na ndaka imolika.

² Omo vaile mu ngangela, vetele mu cana ca mu Mbambilone, co vatungile muje.

³ Co valyendekesele umo na mukwavo ngwavo, “Tumungeni vindopi nakuvyenyeka mwamuvwa.” Co vakele na vindopi vyakutunga navyo, amo na tala yakukolesa vindopi.

⁴ Asinoni valyendekesele ngwavo, “Tutungeni nganda yakama amo na kaposhi kakalaja kakete kwilu, ngeci tutsimane kutewa tukashandokela ano asi oshe.”

⁵ Oloni Shukulu Kalunga wezile asi mukumona nganda na kaposhi vije vivatungile vaje vanu.

⁶ Co Shukulu Kalunga wendekele ngwendi, “Kengeni! Ava voshe vanapu vanu vamo, co vakevo valinakwendeka muyati umo, eci cinapu vushangumukilo vwa vyuma vije vivakalinga. Co ololo vakasa kulinga cuma coshe civashaka kulinga!

⁷ Ngecivene, tuyeni tushuluke asi, tukatanganese muyati wavo ngeci omo vendeka kesi valizive.”

⁸ Ngecivene, Shukulu Kalunga wavashandwelele ano asi oshe, co vaje vanu valikelele kutunga ije nganda.

⁹ Co nganda ije vaitumbwile ngwavo Mbambilone omwo kuje kukekwo Shukulu Kalunga watanganesele muyati wa vanu voshe. Kutunda aje vene Shukulu Kalunga wavashandwelele ano asi oshe.

Vatekulwila va Shemi

¹⁰ Ava vakevo vatekulwila va Shemi. Co a myaka ivali omo livazi lyetile, Shemi wakele na myaka 100, wakitile mwana wa munalume lizina lyendi Alepakeshande.

¹¹ Kutunda aje akitilile Alepakeshande, Shemi wayoyele myaka ikwavo 500, co wakitile lalo vana va vanalume na ava va vanakazi.

¹² Omo Alepakeshande wakele na myaka 35, wakitile mwana wa munalume lizina lyendi Shela.

¹³ Kutunda aje akitilile Shela, Alepakeshande wayoyele myaka ikwavo 403, co wakitile lalo vana va vanalume na ava va vanakazi.

¹⁴ Omo Shela wakele na myaka 30, wakitile mwana wa munalume lizina lyendi Evele.

¹⁵ Kutunda aje akitilile Evele, Shela wayoyele myaka 403, co wakitile lalo vana va vanalume na ava va vanakazi.

¹⁶ Omo Evele wakele na myaka 34, wakitile mwana wa munalume lizina lyendi Pelenge.

¹⁷ Kutunda aje akitilile Pelenge, Evele wayoyele myaka 430, co wakitile lalo vana va vanalume na ava va vanakazi.

¹⁸ Omo Pelenge wakele na myaka 30, wakitile mwana wa munalume lizina lyendi Leu.

¹⁹ Kutunda aje akitilile Leu, Pelenge wayoyele myaka 209, co wakitile lalo vana va vanalume na ava va vanakazi.

²⁰ Omo Leu wakele na myaka 32, wakitile mwana wa munalume lizina lyendi Selunge.

²¹ Kutunda aje akitilile Selunge, Leu wayoyele myaka 207, co wakitile lalo vana va vanalume na ava va vanakazi.

²² Omo Selunge wakele na myaka 30, wakitile mwana wa munalume lizina lyendi Nahole.

²³ Kutunda aje akitilile Nahole, Selunge wayoyele myaka 200, co wakitile lalo vana va vanalume na ava va vanakazi.

²⁴ Omo Nahole wakele na myaka 29, wakitile mwana wa munalume lizina lyendi Tela.

²⁵ Kutunda aje akitilile Tela, Nahole wayoyele myaka 119, co wakitile lalo vana va vanalume na ava va vanakazi.

²⁶ Omo Tela wakele na myaka 70, wakitile vana vendi vatatu va vanalume mazina avo, Avilama, na Nahole, na Halane.

Vatekulwila va Tela

²⁷ Ava vakevo vatekulwila va Tela, ishe ya Avilama, na Nahole, na Halane. Halane ikeye wapwile ishe ya Lote,

²⁸ co Halane watsililile mu nganda ije vene ya Ule ya mu Mbambilone muje muvamukitilile, a simbu ije te ishe anga acili na kuyoya.

²⁹ Avilama wambatele Salai, co Nahole wambatele Mileka muna Halane, uje wapwile ishe ya Iseka.

³⁰ Oloni Salai wapwile mumba.

³¹ Tela waile na munendi Avilama, na mutekulyendi Lote muna Halane, na vainamweno Salai munakazi wa Avilama, co watundile mu nganda ya Ule mu Mbambilone amo navo ngeci aye ku lifuti lya Kanana. Co vetele ku lifuti lya Halane nakutunga muje.

³² Tela watsililile kuje omo wakele na myaka 205.