Kushangumuka 10 - Livulu lya Shukulu Kalunga

Vatekulwila va vana va Nowa

¹ Ava vakevo vatekulwila va vana va Nowa, Shemi, na Hama, na Njafeta. Ava vanu vatatu vakitile vana vavo omo livazi lyetile.

² Vana va Njafeta mazina avo, Ngomele, na Mangonge, na Mandai, na Njavani, na Tumbale, na Meshake, na Tilase. Vakevo vapwile vakukulwila va vanu vaje valilukile mazina avo.

³ Vatekulwila va Ngomele mazina avo, Ashekenaze, na Lifate, na Tongalame.

⁴ Co vatekulwila va Njavani mazina avo, Elishahe, na Sipeini, na Sepulasi, na Londesiya.

⁵ Vakevo vapwile vakukulwila va vanu vaje vakele ku ngenge ya mema a kalunga na a man̄anda. Ava vakevo vatekulwila va Njafeta, vaje vayoyele mu miyati yavo na mu mafuti avo akulyangunuka, co naanga na naanga vendekele muyati wavo.

⁶ Vana va Hama va vanalume mazina avo, Kushe, na Ingito, na Limbiya, na Kanana. Vakevo vapwile vakukulwila va vanu vaje valilukile mazina avo.

⁷ Vatekulwila va Kushe mazina avo, Semba, na Havila, na Sambeta, na Lama, na Sambeteka. Vatekulwila va Lama mazina avo, Shemba, na Ndendane.

⁸ Kushe wakitile munendi wa munalume lizina lyendi Nimelonde, wapwile muka-kushwana wakulivanga ano asi, ikeye wakele na nzili yakama manene.

⁹ Wapwile ciyambi wakama manene ku mesho a Shukulu Kalunga, co akeo atunda endekesi ngwavo, “Shukulu Kalunga akupwise ciyambi wakama ngwe Nimelonde!”

¹⁰ Nimelonde ikeye walivangele kushwana ku Mbambilone, na ku Eleki, na ku Akande, mitambela eyi itatu yakele mu Mbambilone.

¹¹ Omo watundile mu lifuti lije, co waile ku Asil ya nakukatunga vinganda vya Nenivayi, na Lehombote Ile, na Kala,

¹² na Lesene ije ili mukati ka Nenivayi na nganda yakama ya Kala.

¹³ Vatekulwila va Ingito mazina avo, Lindiya, na Aname, na Lehave, na Nafetuhe,

¹⁴ na Patuluse, na Kaselu, kuje kuvatundile vaFilisitiya na vaKelete.

¹⁵ Kanana wakitile munendi wa ntwatwa wa munalume lizina lyendi Sindone, co munendi wamucivali lizina lyendi Hete. Vakevo vapwile vakukulwila va vanu vaje valilukile mazina avo.

¹⁶ Co Kanana lalo wapwile kukulwila ya vaNjevushi, na vaAmoli, na vaNgilengashi,

¹⁷ na vaHivi, na vaAleki, na vaSini,

¹⁸ na vaAlevandi, na vaZemali, na vaHamati. Co miyati ya vaKanana yashandokelele kwoshe,

¹⁹ co nginga ya vaKanana yatundile ku Sindone ku mbwela kweta ku Ngelale kuyehi na Ngaza, na mu ngangela ya Sondoma, na Ngomola, na Andema, na Zemboime kuyehi na Lasha.

²⁰ Ava vakevo vatekulwila va Hama, vaje vayoyele mu miyati yavo na mu mafuti avo akulyangunuka, co naanga na naanga vendekele muyati wavo.

²¹ Shemi ikeye wapwile mukulunu wa Njafeta, ikeye kukulwila ya vaHevelu voshe.

²² Vana va Shemi va vanalume mazina avo, Elame, na Ashule, na Alepakeshande, na Lunde, na Alama. Vakevo vapwile vakukulwila va vanu vaje valilukile mazina avo.

²³ Vatekulwila va Alama mazina avo, Uze, na Hule, na Ngetale, na Meshake.

²⁴ Alepakeshande ikeye wakitile Shela, co Shela wakitile Evele.

²⁵ Evele wakitile vana vavali va vanalume, lizina lyaumo Pelenge, omwo a matangwa endi akeo vanu va mu kaye valipangele, co mukwavo vamulukile lizina lyendi Njokotane.

²⁶ Vatekulwila va Njokotane mazina avo, Alemondande, na Shelefe, na Hazalemavete, na Njela,

²⁷ na Handolame, na Uzale, na Ndikela,

²⁸ na Ombale, na Ambimaele, na Shemba,

²⁹ na Ofila, na Havila, na Njombambe. Ava voshe vapwile vatekulwila va Njokotane.

³⁰ Co lifuti lije livatungile lyashangumukilile ku Mesha nakweta ku Sefale ku malundu a mu ngangela.

³¹ Ava vakevo vatekulwila va Shemi, vaje vayoyele mu miyati yavo na mu mafuti avo akulyangunuka, co naanga na naanga vendekele muyati wavo.

³² Vanu voshe ava vapwile vatekulwila va Nowa, muyati na muyati, na vikota vyavo vyakulyangunuka. Omo livazi lyetile, miyati yoshe ili ano asi yatunda kuli vana va Nowa va vanalume.