Kulava 9 - Livulu lya Shukulu Kalunga

Kunyunga Ciwano ca Pasovala camucivali

¹ Shukulu Kalunga wendekele kuli Mosesa mu mambo ya Sinai ku ngonde yakulivanga mu mwaka wamucivali omo vanu va Isalele vanatundu laja mu Ingito ngwendi,

² “Vanu va Isalele vanapande kunyunga Ciwano ca Pasovala a simbu yaco ivemika.

³ Kushangumuka a litangwa lyamulikumi na awana ku ngonde eyi vene ku cingwezi, mukacinyunga a simbu yaco ivemika ngwe ku mashiko aco oshe na vilongesa vyaco vyoshe.”

⁴ Ngecivene, Mosesa walekele vanu va Isalele kunyunga Ciwano ca Pasovala.

⁵ Co vanyungile Ciwano ca Pasovala mu mambo ya Sinai ku ngonde yakulivanga a litangwa lyamulikumi na awana ku cingwezi. Co vanu va Isalele valingile vyuma vyoshe ngwe muje vene mwashikile Shukulu Kalunga kuli Mosesa.

⁶ Oloni kwakele vanu vamo kuvajelele ngwe ku mashiko a Mosesa omwo vakwatele a civimbi, co kuvasele kunyunga litangwa lya Ciwano ca Pasovala. Vezile kuli Mosesa na Alone a litangwa lije vene

⁷ vendekele ngwavo, “Yetu kutwajelele omwo twakwatele a civimbi, omwo vikajo vanatuvindikila ngwavo kutwasa kukombelela n̄ombelo kuli Shukulu Kalunga amolika na vanu va Isalele a simbu yaco?”

⁸ Co Mosesa wavakumbulwile ngwendi, “Vandameneni tai njikazive vika ovyo vyakanjishika Shukulu Kalunga ali yeni.”

⁹ Shukulu Kalunga wendekele kuli Mosesa ngwendi,

¹⁰ “Leka vanu va Isalele ngwove, oloni nga umo weni nambe mutekulwila weni kajelele akukwata a civimbi, nambe ali mu vungenzi vwa kulyala, anga napande kunyunga Ciwano ca Pasovala.

¹¹ Vanamitavesa kucinyunga ku ngonde yamucivali, ku cingwezi ca litangwa lyamulikumi na awana. Co mukalya ciwano na makende akujeneka musima na visapa-sapa vyakulula.

¹² Kesi vakasezeo vyakulya vimo noo ku mutondo nambe kupokolao citsiya cimo ca cimuna. Vakanyunge lika Ciwano ca Pasovala ngwe ku mashiko aco oshe.

¹³ Oloni nga munu najele, co kesi mu vungenzi ikeye alikela kunyunga Ciwano ca Pasovala, co kuvakamulava lalo kupwa umo wa vanu vange embwe, omwo ikeye kakombelelele n̄ombelo kuli yange a simbu yaco. Co uje munu ngongo yendi vavenya.

¹⁴ “Nga muka-kwija alinakukala akati keni ashaka kunyunga Ciwano ca Pasovala, ikeye napande kucinyunga ngwe kukushika kwa lishiko lyaco. Lishiko eli valimikila munu na munu, nambe muka-kwija nambe vavenya lifuti.”

Lishelwa lya tuhya akamwa ya Mbalaka Mwakuliwanena

¹⁵ A litangwa lije omo vashimbikile Mbalaka Mwakuliwanena, lishelwa lyaifwikile, co ku cingwezi lyakele akamwa ya Mbalaka, lyasholokele ngwe tuhya noo ku mutondo.

¹⁶ Ngecivene, lije lishelwa lyakeleo simbu yoshe, co ku vutsiki lyasholokele ngwe tuhya.

¹⁷ Oshe aje alitundila lishelwa akamwa ya Mbalaka, co vanu va Isalele vajalukile muje mu cilombo, co vakashimbikile lalo cilombo cavo oshe aje alyemanene.

¹⁸ Vanu va Isalele vakele nakujaluka mu cilombo cavo omo Shukulu Kalunga avashika. Omo avashika lalo, co vatumbamene mu cilombo simbu yoshe ije lishelwa lyakele akamwa ya Mbalaka Mwakuliwanena.

¹⁹ Omo lishelwa lyakele matangwa amangi akamwa ya Mbalaka, co vanu va Isalele vononokele lishiko lya Shukulu Kalunga, co kuvasele kujalukamo.

²⁰ Visimbu vimo lije lishelwa lyakele lika matangwa amandondo akamwa ya Mbalaka, omo Shukulu Kalunga avashika, co vatumbamene mu cilombo, co omo Shukulu Kalunga avashika lalo, co vajalukilemo.

²¹ Visimbu vimo lishelwa lyakeleo kutunda ku cingwezi nakweta ku mutondo, co omo lishelwa lyatundileo ku mutondo vajalukilemo.

²² Nameme lishelwa lyakeleo matangwa avali, nambe ngonde, nambe mwaka, nambe simbu yakama, vanu va Isalele anga vatumbamene mu cilombo, kuvajalukilemo. Oloni omo lishelwa lyatundileo, co vajalukilemo.

²³ Omo Shukulu Kalunga avashika, co vatumbamene mu cilombo, co omo Shukulu Kalunga avashika lalo, co vajalukilemo, co vononokele lishiko lije lyashikile Shukulu Kalunga kuli Mosesa.