Kulava 5 - Livulu lya Shukulu Kalunga

Vanu vakujeneka kujela ngwe ku mashiko a Mosesa vavatuwisa mu cilombo

¹ Shukulu Kalunga wendekele kuli Mosesa ngwendi,

² “Shika vanu va Isalele vatuwise munu woshe mu cilombo uje ali na mushongo wa a cikonde wakulitambwisa nambe mushongo wakususula, nambe munu woshe uje kajelele akwata a civimbi.

³ Tuwiseni vanalume na vanakazi vaje vanajwala vaye anja ya cilombo, ngeci mu cilombo cavo, muje munjakala akati ka vanu vange mupwe mwakujela.”

⁴ Ngecivene, vanu va Isalele vononokele, co vavatuwisile mu cilombo voshe vaje kuvajelele, ngwe muje mwashikile Shukulu Kalunga kuli Mosesa.

Lishiko lyakuliilwisila a kuvulumuna

⁵ Shukulu Kalunga wendekele kuli Mosesa ngwendi,

⁶ “Endeka kuli vanu va Isalele ngwove, omo munalume nambe munakazi avulumwina mukwavo, navulumwina yange Kalunga,

⁷ munu wa cifwa eci napande kulitavela vuvi vwendi vwanavulumuna nakufweta mulonga woshe, co awezeleleko litambelo lya ndando makumi avali nakufwetela uje yanavulumwina.

⁸ Oloni nga uje munu natsi kesi na kavushoko kendi wa a mbunge uje asa kutambula fweto ya mulonga, co ije fweto ikapwa ya Shukulu Kalunga, co vakayane kuli muka-kukombelela amo na lijamba lya manga mukujelesa vuvi vwa uje munu muka-mulonga.

⁹ Ngecivene, milambu yoshe yakujela ije ivakatwala vaIsalele kuli Shukulu Kalunga ikapwa ya muka-kukombelela.

¹⁰ Vyuma vyoshe vyakujela vya munu vikapwa vyendi vavenya, oloni vyoshe vije aana munu kuli muka-kukombelela vikapwa vya muka-kukombelela vene.”

Mashiko a lifuwa lyakuyongwela

¹¹ Asinoni Shukulu Kalunga wendekele kuli Mosesa ngwendi,

¹² “Endeka kuli vanu va Isalele ngwove, nga munakazi wa munu asevuka nakujeneka kulongwa kuli munalume wendi

¹³ a kulala na munalume weka, co vanavishweke ku mesho a munalume wendi, co uje munakazi nalijwalesa ikeye vavenya, oloni kukwesi mukaleo wakumwambulula, omwo ikeye kuvamukwatele mu cilinga cije.

¹⁴ Cooni nga munalume wendi nazivi lifuwa lyakuyongwela munakazi wendi ngwe nalingi vuvi, oloni kesi na vukaleo,

¹⁵ asinoni uje munalume akatwale munakazi wendi kuli muka-kukombelela. Ikeye lalo napande kwambata n̄ombelo ya vinganja vivali vya vunga vwa mbale ya maumwa, oloni kesi etileo mazi a olive nambe kwakao insense yakunika lwengo lwaluvwa, omwo inapu n̄ombelo ya vimbuto yakutunda ku lifuwa lya munalume, mukwanukilao vuvi.

¹⁶ “Muka-kukombelela akatwale uje munakazi nakumwimika kulutwe lwa mutula.

¹⁷ Co aketile mema akujela mu lilonga lya vuma, akajomone livu lya mu Mbalaka Mwakuliwanena, akalyake mu mema ngeci alule.

¹⁸ Asinoni muka-kukombelela akashakulula vin̄ambu vya munakazi nakwaka n̄ombelo ya vunga vwa mbale ya maumwa mu mavoko endi. Co muka-kukombelela akakwate lilonga lije lili na mema akulula aje anena cisingo.

¹⁹ Asinoni muka-kukombelela akasinge uje munakazi, co akendeke ngwendi, ‘Nga kuwalingile vupangala, co kuuvulumuka ku cisingo eci cisholoka mu mema awa.

²⁰ Oloni nga unalingi vupangala,

²¹ Shukulu Kalunga asinge lizina lyove akati ka vavushoko vwove. Co ukapwa muka-kujombwesa limbo nameme kushoka shivu.

²² Mema awa a cisingo alinakukovela mwimo lyove akupwise muka-kujombwesa limbo nameme kukushoka shivu.’ ” Co uje munakazi akakumbulule ngwendi, “Njatava, Shukulu Kalunga alinge ngacije.”

²³ “Asinoni uje muka-kukombelela akasoneke vije visingo mu livulu, co aake vije visoneka mu mema akulula a muje mu lilonga.

²⁴ Co akanwise uje munakazi mema akulula a cisingo, co aje mema a cisingo akakovela mwimo lyendi nakumuvinjisa.

²⁵ Co muka-kukombelela akanone ije n̄ombelo ya lifuwa ya vunga vwa mbale ya maumwa mu mavoko a uje munakazi, na kuyikundika kuli Shukulu Kalunga, nakuyitwala ku mutula.

²⁶ Asinoni muka-kukombelela akajomonao livoko lyakushula lya n̄ombelo ya vunga vwa mbale ya maumwa kupwa canukiso nakuyenyekela a mutula. Akumanesa, akanwise mema uje munakazi.

²⁷ Nga ikeye nalingi vupangala, co aje mema a cisingo akamuvinjisa manene, co uje munakazi akapwa muka-kujombwesa limbo nameme shivu yendi ikashoka, na lizina lyendi likapwa lyakusinga akati ka vavushoko vwendi.

²⁸ Oloni nga ikeye kaliviisile napu wakujela, kakasa kuvulumuka oloni akasa kukita vana.

²⁹ “Eli likelyo lishiko lya lifuwa omo munakazi uje ali na munalume wendi asevuka nakuliviisa ikeye vavenya,

³⁰ nambe omo lifuwa lya munalume lyakuyongwela munakazi wendi ngwendi nalingi vupangala limuwana, akatwale uje munakazi ku mesho a Shukulu Kalunga. Co muka-kukombelela akalinge nendi mwoshe muje mwaila lishiko eli.

³¹ Co munalume akasamba ku vuvi vuje, oloni munakazi nga ali na mulonga, co ngongo yendi ikeye vavenya.”