Kulava 36 - Livulu lya Shukulu Kalunga

Vushwana vwa vanakazi vakushomboka

¹ Vantwama va ku cikota ca Ngilyande muna Makile, mutekulu wa Manase muna Yosefa, vaile kuli Mosesa, na kuli vantwama va vanu va Isalele.

² Vendekele ngwavo, “Mwane, omo Shukulu Kalunga washikile kupangezela lifuti kupwa vushwana vwa vanu va Isalele akuta n̄ela, ikeye lalo wakushikile kwana vushwana vwa ndolome yetu Zelofehande kuli vana vendi va vanakazi.

³ Oloni nga vakashomboka ku vanalume va miyati yeka kesi ya vanu va Isalele, co vushwana vwavo vakavutundisa ku vushwana vwa vakukulwila vetu, nakuvunungulwila ku miyati ije vakashombokela.

⁴ Co omo Mwaka Wakuliilwisila wa vanu va Isalele weta, vushwana vwavo vakavunungulwila ku vushwana vwa miyati ije vakashombokela, co vushwana vakavutundisa ku vushwana vwa muyati wa vakukulwila vetu.”

⁵ Ngecivene, akushika kwa Shukulu Kalunga Mosesa waanene lishiko eli kuli vanu va Isalele ngwendi, “Evi vanendeka vatekulwila va Yosefa vinapu vya vushunga.

⁶ Evi vikevyo vyanashiki Shukulu Kalunga vana va vanakazi va Zelofehande ngwendi, valishombokele ku vanu vaje vavanashaka, oloni kuvanga va mu naanga ya ishavo.

⁷ Kukwesi vushwana navumo vwai vwa vanu va Isalele vukatunda ku muyati umo nakuvunungulwila ku muyati ukwavo, co vanu va Isalele vakakakateye kunyunga vushwana vwa vaishavo.

⁸ Co vana va vanakazi voshe vaje vashwana vushwana mu muyati umo wa vanu va Isalele vakashomboke ku vanalume vaje va mu naanga ya muyati wa vaishavo, ngeci vanu va Isalele vakashwane munu na munu vushwana vwa vakukulwila vendi.

⁹ Mu ngila eyi vushwana navumo vwai vukatunda ku muyati umo, nakuvunungulwila ku muyati ukwavo, co miyati yoshe ya vanu va Isalele vakakakateye nakunyunga munu na munu vushwana vwendi vavenya.”

¹⁰ Ngecivene, vana va Zelofehande, valingile ngwe muje mwashikile Shukulu Kalunga kuli Mosesa.

¹¹ Co Mahela, na Tileza, na Hongela, na Mileka, na Nowa, vana va Zelofehande va vanakazi, vashombokele kuli vashonyavo va ku vuyishe ngwe muje mwashikile Shukulu Kalunga kuli Mosesa.

¹² Vashombokele ku vikota vya vatekulwila va Manase muna Yosefa, co vushwana vwavo vavunyungilile vene mu muyati wa ishavo.

¹³ Awa akewo mashiko na vilongesa vije vyashikile Shukulu Kalunga kuli Mosesa ali vanu va Isalele mu vyana vya Mowavi ku Ndonga ya Yondau vyalishungama na Yeliko.