Kulava 33 - Livulu lya Shukulu Kalunga

Vungenzi vwa vanu va Isalele vwakutunda ku Ingito nakuya ku Mowavi

¹ Ovu vukevwo vungenzi vwa vanu va Isalele na mazina a mitambela kuje kuvatungilile vilombo vyavo omo vatundile mu Ingito ngwe ku miyati yavo, a simbu ije vavatwamenene kuli Mosesa na Alone.

² Akushika kwa Shukulu Kalunga, Mosesa wasonekele lizina lya mutambela kuje vatungilile cilombo cavo.

³ Vanu va Isalele vatundile ku Lamesese mu lifuti lya Ingito a litangwa lyamulikumi na atanu ku ngonde yakulivanga ku mwaka, munima ya Ciwano cakulivanga ca Pasovala. Akunyunga kwa Shukulu Kalunga, vatundile ku Lamesese nakundikangela, ku mesho a vaka-Ingito voshe vaje vavamwene,

⁴ vaje vakele nakutsinda vana vavo va va ntwatwa va vanalume vaje vatsiile Shukulu Kalunga. Co akulinga evi Shukulu Kalunga wavamwesele ngeci ikeye ali na nzili kuhyana vinjambi va vaka-Ingito.

⁵ Co vanu va Isalele vatundile ku Lamesese, vakatungile cilombo cavo ku Sukote.

⁶ Vatundile ku Sukote, vakatungile cilombo cavo ku Etame kumukulo wa mambo.

⁷ Vatundile ku Etame velukile lalo kunima ku Pi Hahilote, mu ngangela ya Mbale Zefone, co vakatungile cilombo cavo kuyehi na Mingendole.

⁸ Vatundile ku Pi Hahilote vetile mukati ka Mema a Kalunga Akuvenga nakweta mu mambo ya Shule, co vendele vungenzi vwa matangwa atatu mu mambo ya Etame. Asinoni vakatungile cilombo cavo ku Mala.

⁹ Vatundile ku Mala, vaile ku Elime, kuje kwakele masima a tuvwelu-vwelu likumi na avali na miti ya mashakavale makumi atanu na avali. Co vakatungile cilombo cavo kuje.

¹⁰ Vatundile ku Elime, vakatungile cilombo cavo kuyehi na Linema lya Suwezi.

¹¹ Co vatundile kuje, vakatungile cilombo cavo mu mambo ya Sine.

¹² Vatundile ku mambo ya Sine, vakatungile cilombo cavo ku Ndofeka,

¹³ asinoni vatundile ku Ndofeka, vakatungile cilombo cavo ku Alushe.

¹⁴ Vatundile ku Alushe, vakatungile cilombo cavo ku Lefindime, kuje kukwakele mema akunwa.

¹⁵ Vatundile ku Lefindime, vakatungile cilombo cavo mu Mambo ya Sinai.

¹⁶ Vatundile mu Mambo ya Sinai, vakatungile cilombo cavo ku Kimbelote Hataava mutambela uje uvatumbwile ngwavo “Vimbumbo vya lishungu.”

¹⁷ Vatundile ku Kimbelote Hataava, vakatungile cilombo cavo ku Hezelote.

¹⁸ Vatundile ku Hezelote, vakatungile cilombo cavo ku Litema.

¹⁹ Vatundile ku Litema, vakatungile cilombo cavo ku Limone Peleze.

²⁰ Vatundile ku Limone Peleze, vakatungile cilombo cavo ku Limbena.

²¹ Vatundile ku Limbena, vakatungile cilombo cavo ku Lisa.

²² Vatundile ku Lisa, vakatungile cilombo cavo ku Kehelata.

²³ Vatundile ku Kehelata, vakatungile cilombo cavo ku Munkinda wa Shefele.

²⁴ Vatundile ku Munkinda wa Shefele, vakatungile cilombo cavo ku Halanda.

²⁵ Vatundile ku Halanda, vakatungile cilombo cavo ku Mahelote.

²⁶ Vatundile ku Mahelote, vakatungile cilombo cavo ku Tahate.

²⁷ Vatundile ku Tahate, vakatungile cilombo cavo ku Tela.

²⁸ Vatundile ku Tela, vakatungile cilombo cavo ku Miteka.

²⁹ Vatundile ku Miteka, vakatungile cilombo cavo ku Hashemone.

³⁰ Vatundile ku Hashemone, vakatungile cilombo cavo ku Moselote.

³¹ Vatundile ku Moselote, vakatungile cilombo cavo ku Mbene Njakane.

³² Vatundile ku Mbene Njakane, vakatungile cilombo cavo ku Hole Hangindengande.

³³ Vatundile ku Hole Hangindengande vakatungile cilombo cavo ku Njotembasa.

³⁴ Vatundile ku Njotembasa, vakatungile cilombo cavo ku Ambelona.

³⁵ Vatundile ku Ambelona, vakatungile cilombo cavo ku Eziyone Ngembe.

³⁶ Vatundile ku Eziyone Ngembe, vakatungile cilombo cavo ku Kandeshe mu mambo ya Zine.

³⁷ Vatundile ku Kandeshe, vakatungile cilombo cavo ku Munkinda wa Hole, kumukulo wa lifuti lya Endome.

³⁸ Akushika kwa Shukulu Kalunga, Alone muka-kukombelela walamatele ku Munkinda wa Hole, co wakatsililile kuje vene, a litangwa lyakulivanga ku ngonde yamucitanu mu mwaka wamumakumi awana omo vaIsalele vanatundu laja mu Ingito.

³⁹ Alone wakele na myaka 123 omo watsile a Munkinda wa Hole.

⁴⁰ Co Mwene wa Alande uje wakele mu mbwela ya lifuti lya Kanana wazivile ngwavo vaIsalele valinakwija.

⁴¹ VaIsalele vatundile ku Munkinda wa Hole, vakatungile cilombo cavo ku Zalumone.

⁴² Vatundile ku Zalumone, vakatungile cilombo cavo ku Punone.

⁴³ Vatundile ku Punone, vakatungile cilombo cavo ku Ovote.

⁴⁴ Vatundile ku Ovote, vakatungile cilombo cavo ku vingundu vya Avalime mu lifuti lya vaMowavi.

⁴⁵ Vatundile ku Avalime, vakatungile cilombo cavo ku Ndimboni Ngande.

⁴⁶ Vatundile ku Ndimboni Ngande, vakatungile cilombo cavo ku Alemone Ndimbelataime.

⁴⁷ Vatundile ku Alemone Ndimbelataime, vakatungile cilombo cavo ku Munkinda wa Avalime kuyehi na Munkinda wa Nembo.

⁴⁸ Vatundile ku Minkinda ya Avalime vakatungile cilombo cavo mu vyana vya Mowavi kujavuka Ndonga ya Yondau vyashungama na Yeliko.

⁴⁹ Vatungile cilombo cavo ku vyana vya Mowavi ku Yondau kuyehi na Mbete Njeshimote na Cana ca Miti ya Mingongo.

Mosesa ashika vanu va Isalele omo kanda vajavuke Yondau

⁵⁰ Shukulu Kalunga wendekele kuli Mosesa mu vyana vya Mowavi ku Yondau vyashungama na Yeliko ngwendi,

⁵¹ “Leka vanu va Isalele ngwove, omo mukajavuka Yondau nakukovela mu lifuti lya Kanana,

⁵² munapande kushekamo voshe vaje vatungamo, nakunyongesa tumponya twavo twa mamanya, na vikuvo, nakusiwula mitula ije ivakalemesela.

⁵³ Ngecivene, mukatambula lifuti nakukalamo, omwo njinamyana lifuti kupwa vushwana vweni.

⁵⁴ Co mukashwana lifuti nakulipangelalyo akati ka miyati yeni na vikota vyeni akuta n̄ela, mukaana mutambela wakama kuli vaje vavangi, na mutambela waundondo kuli vaje vavandondo.

⁵⁵ Oloni nga yeni kumukashekemo vavenya lifuti lije, co vaje vakasalamo vakamiyandesa ngwe vimba vyakutinukila a mesho eni, na mambimbo akumitiva a mivila yeni, co vakamiyandesa mu lifuti lije limukakala.

⁵⁶ Nga kumukavashekemo, co njikanyongesa yeni ngwe munjayongwele kuvanyongesa vakevo.”