Kulava 31 - Livulu lya Shukulu Kalunga

Shambandinga ali vaMindyani

¹ Shukulu Kalunga wendekele kuli Mosesa ngwendi,

² “Linga shambandinga kuli vaMindyani omwo a vije valingile kuli vanu va Isalele. Omo unamanesa kulinga vyoshe evi, co ukatsa.”

³ Ngecivene, Mosesa wendekele kuli vanu va Isalele ngwendi, “Lipakateni vingonga ngeci vanalume voshe vaye ku nzita, vakalwe na vaMindyani mukalingile shambandinga Shukulu Kalunga ali vakevo.

⁴ Ku muyati umo na umo wa Isalele kutunde vanalume 1,000 vaye ku nzita.”

⁵ Vanalume 1,000 vaangukile ku muyati na muyati, co vungi vwavo vapwile vanalume 12,000 valipakatele vingonga vyavo.

⁶ Mosesa wavatumine ku nzita amo na muka-kushika Finehase muna Elyazale muka-kukombelela. Finehase ikeye wambatele vivala vyakujela, amo na malupembo akwimba kashashutwiya.

⁷ Co valwisile vaMindyani, ngwe muje mwashikile Shukulu Kalunga kuli Mosesa, co vatsiile vanalume voshe,

⁸ amo na vimyene vatanu va vaMindyani, Mwene Evi, na Mwene Lekeme, na Mwene Zule, na Mwene Hule, na Mwene Lemba. Co vatsiile lalo na Mbalame muna Mbeole na moko ya mukwale.

⁹ Co vanu va Isalele vafungulwile vanakazi va vaMindyani amo na vanike, vambatele vingombe vavo vyoshe na matanga a vimanga vavo oshe, co vapukwile vufuko vwavo vwoshe,

¹⁰ venyekele vinganda vya vaMindyani vyoshe, na vilombo vyavo vyoshe.

¹¹ Ngecivene, vanu va Isalele vambatele vyoshe vije vapukwile na vije vafungulwile, amo na vinzinda na vimuna.

¹² Asinoni vavinenele kuli Mosesa, na Elyazale muka-kukombelela, na ku mbunga ya vanu va Isalele, vaje vakele mu cilombo mu vyana vya vaMowavi musambwa ya Ndonga ya Yondau vyashungama na Yeliko.

Mashwalale veluka kwimbo

¹³ Mosesa na Elyazale muka-kukombelela, na vantwama voshe va mbunga ya vanu va Isalele vatuukile mu cilombo nakuliwana na mashwalale.

¹⁴ Co Mosesa waluvalesele manene vamyata va mashwalale, na vaka-kushika mashwalale 1,000 na vaka-kushika mashwalale 100, vaje velukile ku nzita.

¹⁵ Mosesa wavehwile ngwendi, “Omwo vikajo mwasezelao vanakazi voshe ava vayoye?

¹⁶ Anukeni ngweni ava vakevo vanakazi vaje vakavangeyeye vilongesa vya Mbalame ku Peole vakevo vene vashongangeyeye vanu va Isalele ngeci vonwele kulemesa Shukulu Kalunga. Eci cikeco cuma canenesele mushongo wakulitambwisa akati ka vanu va Shukulu Kalunga.

¹⁷ Ngecivene, ololo tsiyeni vakwenje voshe, na vanakazi voshe vaje valimono laja na vanalume,

¹⁸ oloni vambanda voshe vaje kanda valimone na vanalume vanyungeni.

¹⁹ Oloni yeni voshe munatsii vanu, nambe vaje vanakwata a civimbi, munapande kukala anja ya cilombo matangwa atanu na avali. Co lijeleseni a litangwa lyamucitatu, na a litangwa lyamucitanu na avali amolika na vaje vinzinda munakafungulwile.

²⁰ Munapande kujelesa vuzalo vwoshe na vyuma vyoshe vije vinalingiwa na cilambu, na vya maka a membe, nambe vya viti.”

²¹ Asinoni Elyazale muka-kukombelela wendekele kuli vanalume vaje velukile ku nzita ngwendi, “Evi vikevyo vilongesa vyashikile Shukulu Kalunga kuli Mosesa ngwendi,

²² ngolinde, na siliva, na vunengu, na cikuvo, na vutale vwa citasu, na vutale vwa shumbu,

²³ na vyuma vyoshe vije kuvyenye ku tuhya, viitiseni mu tuhya, co vikapwa vyakujela. Nameme ngoco mukavijelesa lalo na mema akujelesa, oloni coshe cije kucasa kwita mu tuhya, co mukacijelesa na mema akujelesa.

²⁴ A litangwa lyamucitanu na avali munapande kukusha vuzalo vweni, co mukajela, asinoni mukakovela mu cilombo.”

Kulipangela vyakupukula

²⁵ Shukulu Kalunga wendekele kuli Mosesa ngwendi,

²⁶ “Yove na Elyazale muka-kukombelela amo na vantwama va mbunga ya vanu va Isalele, munapande kulava vyuma vyoshe vije vanafungulwile, amo na vinzinda na vimuna.

²⁷ Co angununa vije munafungulwile mu mitambela ivali, mutambela umo wa mashwalale, co mutambela ukwavo wa mbunga yoshe.

²⁸ Co ku mutambela uje wakundama ku mashwalale, ku vinzinda 500 ambatako cinzinda umo, cuma cimolika na ku vingombe, na ku vimulu, na ku vimanga, na ku vimembe kupwa mulambu wa Shukulu Kalunga.

²⁹ Vyaneni kuli Elyazale muka-kukombelela kupwa mulambu wa Shukulu Kalunga.

³⁰ Co ku litambelo lyasala kuli vije munaana kuli vanu va Isalele, ku makumi atanu ambateniko cinzinda umo, na ku vingombe, na ku vimulu, na ku vimanga, na ku vimembe. Co vyaneni kuli vaLevi vaje vaka-kunyunga Mbalaka ya Shukulu Kalunga.”

³¹ Ngecivene, Mosesa na Elyazale muka-kukombelela valingile ngwe muje mwavashikile Shukulu Kalunga.

³² Vyuma evi vikevyo vakafungulwile mashwalale ku nzita vyapwile vimanga na vimembe 675,000,

³³ na vingombe 72,000,

³⁴ na vimulu 61,000,

³⁵ na vambanda vaje kanda valimone na vanalume 32,000.

³⁶ Litambelo lije lyakundamene ku mashwalale vaje vaile ku nzita lyapwile vimanga, na vimembe 337.500,

³⁷ co mulambu wa Shukulu Kalunga wa vimanga, na vimembe wapwile 675.

³⁸ Vingombe vapwile 36,000, co mulambu wa Shukulu Kalunga wa vingombe wapwile 72.

³⁹ Vimulu vapwile 30,500, co mulambu wa Shukulu Kalunga wa vimulu wapwile 61.

⁴⁰ Vambanda vaje kanda valimone na vanalume vapwile 16,000, co mulambu wa Shukulu Kalunga wa vambanda vaje kanda valimone na vanalume wapwile 32.

⁴¹ Ngecivene, Mosesa waanene kuli Elyazale muka-kukombelela mulambu uje wapwile mutambela wa Shukulu Kalunga, ngwe muje mwashikile Shukulu Kalunga kuli Mosesa.

⁴² Vije vivatambwile mbunga ya vanu va Isalele vyapwile amolika na vije vivatambwile mashwalale.

⁴³ Vyapwile vimanga na vimembe 337,500,

⁴⁴ na vingombe 36,000,

⁴⁵ na vimulu 30,500,

⁴⁶ na vambanda vaje kanda valimone na vanalume 16,000.

⁴⁷ Co ku makumi atanu Mosesa wambateleko cinzinda umo, na ku vimuna, ngwe muje mwashikile Shukulu Kalunga, co wavyanene kuli vaLevi vaje vakele nakunyunga Mbalaka ya Shukulu Kalunga.

⁴⁸ Asinoni vamyata vaje vakele nakushika mashwalale vaile kuli Mosesa

⁴⁹ vendekele ngwavo, “Mwane, vangamba vove vanalava mashwalale vaje vali mwisi yakushika kwetu, co naumo wai nazimbalao akati kavo.

⁵⁰ Ngecivene, tunanena mulambu wa Shukulu Kalunga, uje munu na munu nakawanene, wa vyuma vya ngolinde vyakutaleka, na tunzeya, na vimbilingwa, na sungu, nakulyambesa yetu vavenya ku mesho a Shukulu Kalunga.”

⁵¹ Co Mosesa, na Elyazale muka-kukombelela vatambwile ngolinde ije yoshe yakele na cifwa cakutaleka.

⁵² Mulambu woshe wa ngolinde uje valambwile vamyata vakele nakushika mashwalale wapwile makilo 200.

⁵³ Co vaje kuvapwile vamyata, vakevo vatulikile vije vakapukwile.

⁵⁴ Ngecivene, Mosesa, na Elyazale muka-kukombelela vambatele ngolinde nakuyitwala ku Mbalaka Mwakuliwanena ngeci Shukulu Kalunga anyunge vanu vaIsalele.