Kulava 30 - Livulu lya Shukulu Kalunga

Mashiko aa visingo

¹ Co Mosesa wendekele kuli vantwama va miyati ya vanu va Isalele ngwendi,

² “Omu mukemwo mwanashiki Shukulu Kalunga. Omo munu alisinga cisingo cakwana cuma cimo kuli Shukulu Kalunga nambe kulisinga kulikela kulinga cuma cimo, kapandele kupokola cikulaeso cendi, oloni napande kulinga vyuma vyoshe vije vyanakulaesele kulinga.

³ “Omo mumbanda wa muzike acili nakukala mu njuvo ya ishe, nga alisinga cisingo cakwana cuma cimo kuli Shukulu Kalunga nambe kulisinga kulikela kulinga cuma cimo,

⁴ napande kulinga vyuma vyoshe vije vyanalisingile nambe vyanakulaesele, kuvanga ishe avyane omo aviziva.

⁵ Oloni nga ishe amuvindika kushulisa cisingo cendi, co kucapandele lalo acinyunge embwe. Co Shukulu Kalunga akamusambesaco, omwo ishe ikeye namuvindika kucinyunga.

⁶ “Nga munakazi nalisingile simbu kanda ashomboke nambe kupupuzuka kwendeka, nambe kukulaesa kulikela kulinga cuma cimo,

⁷ co napande kulinga vyuma vyoshe vije vyanalisingile nambe vyanakulaesele, kuvanga munalume wendi amuvindike a vyuma vije vyanazivile.

⁸ Oloni nga munalume wendi amuvindika kushulisa cisingo cendi nambe kupupuzuka mukwendeka kwendi, omo ikeye navizivi laja, kucapandele lalo uje munakazi acinyunge. Co Shukulu Kalunga akamusambesaco.

⁹ “Oloni fwile nambe munakazi wakukondola napande kunyunga cisingo coshe ikeye alisinga, na cikulaeso coshe cakulikela kulinga cuma cimo.

¹⁰ “Nga munakazi wakushomboka alisinga cisingo nambe akulaesa kulikela kulinga cuma cimo,

¹¹ co napande kulinga vyuma vyoshe vije vyanalisingile nambe vyanakulaesele kuvanga munalume wendi amuvindike omo vyuma vije navizivi laja.

¹² Oloni nga munalume wendi amuvindika kushulisa cisingo omo navizivi laja, co kucapandele lalo uje munakazi acinyunge embwe. Co Shukulu Kalunga akamusambesaco, omwo munalume wendi namuvindika kunyunga cije cisingo cendi,

¹³ omwo munalume wendi ali na moko yakucikolesa nambe kumanesa cisingo nambe cikulaeso cije canalingile.

¹⁴ Oloni nga mwita matangwa na matangwa munima yakuziva cije cisingo, co munalume wendi kavindikile cije cisingo, co uje munakazi napande kulinga vyuma vyoshe vije vyanalisingile nambe vyanakulaesele, omwo munalume wendi nakolesa cije cisingo a kumuvindika a litangwa lije wacizivile.

¹⁵ Oloni nga munalume wendi alimbulula cije cisingo omo kuneti matangwa na matangwa, co ngongo yendi vavenya.”

¹⁶ Awa akewo mashiko ashikile Shukulu Kalunga kuli Mosesa aa visingo vije vikalingiwa ali mumbanda wa muzike uje alinakukala mu njuvo ya ishe, nambe ali munakazi wakushomboka.