Kulava 29 - Livulu lya Shukulu Kalunga

Milambu ya a Ciwano ca Mwaka Wauha

¹ “A litangwa lyakulivanga ku ngonde yamucitanu na vivali mukakala na cikungulukilo cakujela, co kesi mukapange. Likelyo litangwa limukaimba malupembo

² Co mukakombelela kuli Shukulu Kalunga n̄ombelo ya kwenyeka, co lwengo lwaluvwa lwa n̄ombelo eyi lukavwaelelesa Shukulu Kalunga. Mukakombelela muna ngombe wa nkomba umolika, na lijamba lya manga umo, na vana va vimanga vatanu na vavali va mwaka umolika, voshe vakujeneka kapenga.

³ Amo na cimuna umo na umo mukakombelela n̄ombelo yayo ya vimbuto vya vunga vwakulola vwavuvwa vwakuseneta vwakukumbasana na mazi a olive. Amo na ngombe wa nkomba mukakombelela makilo atatu a vunga, co amo na lijamba lya manga mukakombelela makilo avali a vunga,

⁴ co amo na muna manga umo na umo mukakombelela kilo imo ya vunga, ku vana va vimanga vaje vatanu na vavali.

⁵ Co lalo mukakombelela lijamba lya membe umolika kupwa n̄ombelo ya a vuvi, co mu ngila eyi mukalijelesa.

⁶ Mukakombelela vimuna ava, kuwezelela ku n̄ombelo ya kwenyeka ya a litangwa na litangwa, na a ngonde na ngonde, na vin̄ombelo vyavo vya vimbuto, na vin̄ombelo vyavo vya vinyu, ngwe ku lishiko lyavyo. Vikevyo vinapu vin̄ombelo vya vyakulya kuli Shukulu Kalunga, co lwengo lwaluvwa lwa vin̄ombelo evi lukavwaelelesa Shukulu Kalunga.

Vin̄ombelo vya a Litangwa lya Kulyamba

⁷ “A litangwa lyamulikumi ku ngonde yamucitanu na vivali mukakala na cikungulukilo cakujela, co kesi mukalye vyakulya, nambe kupanga vipangi.

⁸ Oloni mukakombelela n̄ombelo ya kwenyeka kuli Shukulu Kalunga, co lwengo lwaluvwa lwa n̄ombelo eyi lukavwaelelesa Shukulu Kalunga. Mukakombelela muna ngombe wa nkomba umolika, na lijamba lya manga umo, na majamba a vana va vimanga vatanu na vavali va mwaka umolika, voshe vakujeneka kapenga.

⁹ Co mukakombelela n̄ombelo yayo ya vimbuto vya vunga vwakulola vwavuvwa vwakuseneta vwakukumbasana na mazi a olive. Amo na ngombe wa nkomba mukakombelela makilo atatu a vunga, amo na lijamba lya manga mukakombelela makilo avali a vunga,

¹⁰ co amo na muna manga umo na umo, ku vana va vimanga vaje vatanu na vavali mukakombelela kilo imolika ya vunga.

¹¹ Co lalo mukakombelela lijamba lya membe umolika kupwa n̄ombelo ya a vuvi, kuwezelela ku membe wakujelesa vanu, na n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

Vin̄ombelo vya a Ciwano ca Mapapela

¹² “A litangwa lyamulikumi na atanu ku ngonde yamucitanu na vivali mukakala na cikungulukilo. Mukanyunga ciwano eci mukusingimika Shukulu Kalunga a matangwa atanu na avali, kesi mukapange.

¹³ A litangwa lyakulivanga mukakombelela kuli Shukulu Kalunga n̄ombelo ya kwenyeka ya vyakulya, co lwengo lwaluvwa lwa n̄ombelo eyi lukavwaelelesa Shukulu Kalunga. Mukakombelela vana va vingombe va nkomba likumi na vatatu, na majamba a vimanga vavali, co na majamba a vana va vimanga likumi na vawana va mwaka umolika, voshe vakujeneka kapenga.

¹⁴ Co mukakombelela n̄ombelo yayo ya vimbuto vya vunga vwakulola vwavuvwa vwakuseneta vwakukumbasana na mazi a olive. Mukakombelela makilo atatu a vunga amo na ngombe wa nkomba umo na umo, na makilo avali a vunga amo na lijamba lya manga umo na umo,

¹⁵ co na kilo imo ya vunga amo na manga umo na umo, ku vaje vana va vimanga likumi na vawana amo na vin̄ombelo vya vinyu vije vishakiwa.

¹⁶ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

¹⁷ “A litangwa lyamucivali mukakombelela vana va vingombe va nkomba likumi na vavali, na majamba a vimanga vavali na majamba a vana va vimanga likumi na vawana va mwaka umolika, voshe vakujeneka kapenga.

¹⁸ Co mukakombelela amo navo vin̄ombelo vyavyo vya vimbuto na vin̄ombelo vyavyo vya vinyu vyoshe vivemika a litangwa lyakulivanga lya ciwano.

¹⁹ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa na n̄ombelo yayo ya vimbuto, na n̄ombelo yayo ya vinyu.

²⁰ “Co a litangwa lyamucitatu mukakombelela vana va vingombe va nkomba likumi na umo, na majamba a vimanga vavali, co na majamba a vana va vimanga likumi na vawana va mwaka umolika, voshe vakujeneka kapenga.

²¹ Co mukakombelela amo navo vin̄ombelo vyavyo vya vimbuto, na vin̄ombelo vyavyo vya vinyu vyoshe vivemika a litangwa lyakulivanga lya ciwano.

²² Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

²³ “A litangwa lyamuciwana mukakombelela vana va vingombe va nkomba likumi, na majamba a vimanga vavali, na majamba a vana va vimanga likumi na vawana va mwaka umolika, voshe vakujeneka kapenga.

²⁴ Co mukakombelela amo navo vin̄ombelo vyavyo vya vimbuto, na vin̄ombelo vyavo vya vinyu vyoshe vivemika a litangwa lyakulivanga lya ciwano.

²⁵ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

²⁶ “A litangwa lyamucitanu mukakombelela vana va vingombe va nkomba vatanu na vawana, na majamba a vimanga vavali, co na majamba a vana va vimanga likumi na vawana va mwaka umolika, voshe vakujeneka kapenga.

²⁷ Co mukakombelela amo navo vin̄ombelo vyavyo vya vimbuto, na vin̄ombelo vyavyo vya vinyu vyoshe vivemika a litangwa lyakulivanga lya ciwano.

²⁸ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

²⁹ “A litangwa lyamucitanu na limo, mukakombelela vana va vingombe va nkomba vatanu na vatatu, na majamba a vimanga vavali, na majamba a vana va vimanga likumi na vawana va mwaka umolika, voshe vakujeneka kapenga.

³⁰ Co mukakombelela amo navo vin̄ombelo vyavyo vya vimbuto, na vin̄ombelo vyavyo vya vinyu vyoshe vivemika a litangwa lyakulivanga lya ciwano.

³¹ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

³² “A litangwa lyamucitanu na avali mukakombelela vana va vingombe va nkomba vatanu na vavali, na majamba a vimanga vavali, na majamba a vana va vimanga likumi na vawana va mwaka umolika, voshe vakujeneka kapenga.

³³ Co mukakombelela amo navo vin̄ombelo vyavyo vya vimbuto na vin̄ombelo vyavyo vya vinyu vyoshe vivemika a litangwa lyakulivanga lya ciwano.

³⁴ Co lalo mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa na n̄ombelo yayo ya vimbuto, na n̄ombelo yayo ya vinyu.

³⁵ “A litangwa lyamucitanu na atatu, co mukalikungulwila amo nakulemesa, co kesi mukapange.

³⁶ Oloni mukakombelela n̄ombelo ya kwenyeka kupwa n̄ombelo ya vyakulya, co lwengo lwaluvwa lwa n̄ombelo eyi lukavwaelelesa Shukulu Kalunga. Mukakombelela muna ngombe wa nkomba umo, na lijamba lya manga umo, co na majamba a vana va vimanga vatanu na vavali va mwaka umolika, voshe vakujeneka kapenga.

³⁷ Co mukakombelela amo navo vin̄ombelo vyavyo vya vimbuto, na vin̄ombelo vyavyo vya vinyu vyoshe vivemika a litangwa lyakulivanga lya ciwano.

³⁸ Co mukakombelela lijamba lya membe umolika kupwa n̄ombelo ya a vuvi, mukuwezelela ku n̄ombelo ya kwenyeka ya a litangwa na litangwa, na n̄ombelo yayo ya vimbuto, na n̄ombelo yayo ya vinyu.

³⁹ “Awa akewo mashiko anemanena milambu ya kwenyeka, na milambu ya vimbuto, na milambu ya vinyu, na milambu ya kulitombola, vije mukakombelela kuli Shukulu Kalunga a viwano vyeni vije vivemika. Evi vikevyo vyakuwezelela ku milambu imulinakwana mukushulisa visingo vyeni nambe milambu yeni ya cizango.”

⁴⁰ Ngecivene, Mosesa walekele vanu va Isalele vyuma vyoshe vije vyamushikile Shukulu Kalunga.