Kulava 27 - Livulu lya Shukulu Kalunga

Vana va Zelofehande va vanakazi valomba vushwana

¹ Zelofehande wapwile muna Hefele, Hefele wapwile muna Ngilyande, Ngilyande wapwile muna Makile, Makile wapwile muna Manase, Manase wapwile muna Yosefa. Co vana va Zelofehande va vanakazi mazina avo, Mahela, na Nowa, na Hongela, na Mileka, na Tileza.

² Co vana va Zelofehande vaile nakwimana ku cikolo ca Mbalaka Mwakuliwanena ku mesho a Mosesa na Elyazale muka-kukombelela, na kuli vantwama, na ku mbunga yoshe ngwavo,

³ “Tatetu watsililile mu mambo, ikeye kakele akati ka vaje vakavangeyeye Kola, uje watengulukilile Shukulu Kalunga. Oloni tatetu watsile omwo vuvi vwendi vavenya, kasezele vana va vanalume vai.

⁴ Omwo vikajo lizina lya tatetu liziluka ku cikota cendi mu Isalele, omwo ikeye kakele na vana va vanalume ndi? Twaneniko netu vufuko akati ka vavushoko vwa tate.”

⁵ Ngecivene, Mosesa watwalele n̄anda yavo kuli Shukulu Kalunga,

⁶ co Shukulu Kalunga wendekele kuli ikeye ngwendi,

⁷ “Cihula ca vana va Zelofehande cinapu cacivwa, ngeci vaane vufuko vwavo akati ka vavushoko vwa ishavo, vufuko vwendi vavushwane vakevo.

⁸ Leka vanu va Isalele ngeci ngwove, nga munu atsa ikeye kasezele mwana wa munalume, co munendi wa munakazi napande kushwana vufuko vwendi.

⁹ Nga ikeye kasezele mwana wa munakazi, co vandolome vendi vavushwane vakevo.

¹⁰ Nga ikeye kesi na vandolome vendi, co shongo ya ishe avushwane.

¹¹ Oloni nga ikeye kesi shongo ya ishe nambe inanu ya ishe, asinoni kavushoko kendi wa a mbunge avushwane nakuvunyunga kupwa vufuko vwendi vavenya. Vanu va Isalele vanapande kunyunga lishiko eli, ngwe omo yange Kalunga njashikile Mosesa. ”

Yoshwa vamwangula kwinga muli Mosesa

¹² Co Shukulu Kalunga wendekele kuli Mosesa ngwendi, “Lamata a Minkinda ya Avalime, co ukamona lifuti lije linjikana kuli vanu va Isalele.

¹³ Co omo unalimono, asinoni ukatsa, ngwe muje mwatsile ndolome yove Alone.

¹⁴ Omo mbunga yoshe valinyenyetelele ali yange kuje ku mema a ku Meliva, yeni muvuvali vweni mwatengulukilile kushika kwange muje mu mambo ya Zine, omwo yove wavyanene kusholola nzili yange yakujela ku mesho avo.” Mema a ku Meliva akele ku Kandeshe muje mu mambo ya Zine.

¹⁵ Mosesa walombelele kuli Shukulu Kalunga ngwendi,

¹⁶ “Yove Shukulu Kalunga, Njambi mukakwana mwonyo vyuma vyoshe, njakulombo ngwange imika munu uje asa kutwamenena mbunga ya vanu ava,

¹⁷ uje asa kuvashika nakuvatwamenena, ngeci mbunga yove kesi vapwe ngwe vimanga vakujeneka kanyungi.”

¹⁸ Ngecivene, Shukulu Kalunga wendekele kuli Mosesa ngwendi, “Sana Yoshwa muna Nune, uje washula na Munzinzime wange, kambeka mavoko ove a mutwe wendi.

¹⁹ Co mwimike ku mesho a Elyazale muka-kukombelela na ku mbunga yoshe ya vanu va Isalele nakumushika ku mesho avo voshe.

²⁰ Co mwane nzili yove, ngeci mbunga yoshe ya vanu va Isalele vakamwononoke.

²¹ Ikeye akemana ku mesho a Elyazale muka-kukombelela, co Elyazale akalilongesa kuwana cizango cange akupangesa Ulime na Tumime, co mu ngila eyi akatwamenena Yoshwa na mbunga yoshe ya vanu va Isalele mu vipangi vyavo vyoshe.”

²² Mosesa walingile ngwe muje mwamushikile Shukulu Kalunga, wemikile Yoshwa ku mesho a Elyazale muka-kukombelela, na ku mbunga yoshe.

²³ Mosesa wakambekele mavoko endi a mutwe wa Yoshwa nakumushika ngwe muje mwamushikile Shukulu Kalunga.