Kulava 26 - Livulu lya Shukulu Kalunga

Kulava kwamucivali kwa vanu va Isalele

¹ Munima ya mushongo uje wakulitambwisa Shukulu Kalunga wendekele kuli Mosesa na Elyazale muna Alone muka-kukombelela ngwendi,

² “Laveni mbunga yoshe ya vanu va Isalele, kushangumukila kuli vaje vali na myaka makumi avali nambe kutuvakana, vaje vasa kupwa mashwalale mu Isalele.”

³ Co Mosesa na Elyazale muka-kukombelela vononokele, co vasanene vanalume voshe vaje vakele na myaka ije.

⁴ Vakungulukilile mu vyana vya vaMowavi musambwa ya Ndonga ya Yondau vyalishungamene na Yeliko. Ava vakevo vanu va Isalele vaje vatundile mu lifuti lya Ingito.

⁵ Vatekulwila va Luvena uje wapwile ntwatwa ya Yakomba vapwile ava, ku cikota ca Hanoki kwatundile vaHanoki, ku cikota ca Palu kukekwo kwatundile vaPalu,

⁶ ku cikota ca Hezelone kwatundile vaHezelone, ku cikota ca Kalemi kwatundile vaKalemi,

⁷ eci cikeco cikota ca Luvena, vaje vavalavele vapwile 43,730.

⁸ Co vatekulwila va Palu vapwile Elyambe,

⁹ na vana vendi Nemwele, Ndatane, na Avilame. (Ava va Ndatane na Avilame vaje vavaangwile mbunga ya vanu va Isalele. Vakevo vaje vatengulukilile Mosesa na Alone, co valipandakanene na Kola omo vatengulukilile Shukulu Kalunga.

¹⁰ Co livu lyeshamene nakuvaleula, co vakevo vatsile amo na Kola na vaje vamukavele omo tuhya twanyongesele vaje vanalume 250, co vakevo vapwile cimweso ku vanu.)

¹¹ Oloni vana va Kola kuvavatsiile.

¹² Vatekulwila va Simyoni kupwisa ku cikota cavo vapwile ava. Ku cikota ca Nemwele kukekwo kwatundile vaNemwele. Ku cikota ca Njamine kwatundile vaNjamine. Ku cikota ca Njakine kwatundile vaNjakine.

¹³ Ku cikota ca Zela kukekwo kwatundile vaZela. Ku cikota ca Shaulu kwatundile vaShaulu.

¹⁴ Eci cikeco cikota ca Simyoni, vaje vavalavele vapwile 22,200.

¹⁵ Vatekulwila va Ngande kupwisa ku cikota cavo vapwile ava. Ku cikota ca Zefone kwatundile vaZefone. Ku cikota ca Hangi kwatundile vaHangi. Ku cikota ca Shuni kwatundile vaShuni.

¹⁶ Ku cikota ca Ozini kukekwo kwatundile vaOzini. Ku cikota ca Eli kwatundile vaEli.

¹⁷ Ku cikota ca Alonde kwatundile vaAlonde. Ku cikota ca Aleli kukekwo kwatundile vaAleli.

¹⁸ Eci cikeco capwile cikota ca Ngande, vaje vavalavele vapwile 40,500.

¹⁹ Ele na Onane vapwile vana va Yunda, oloni vatsililile mu Kanana.

²⁰ Vatekulwila va Yunda kupwisa ku cikota cavo vapwile ava. Ku cikota ca Shela, kwatundile vaShela. Ku cikota ca Peleze, kwatundile vaPelezi. Ku cikota ca Zela, kwatundile vaZela.

²¹ Vatekulwila va Peleze vapwile ava. Ku cikota ca Hezelone, kwatundile vaHezelone. Ku cikota ca Hamule, kwatundile vaHamule.

²² Eci cikeco capwile cikota ca Yunda, vaje vavalavele vapwile 76,500.

²³ Vatekulwila va Isakale kupwisa ku cikota cavo vapwile ava. Ku cikota ca Tola, kwatundile vaTola. Ku cikota ca Puwa, kwatundile vaPuwa.

²⁴ Ku cikota ca Njashumbe kwatundile vaNjashumbe. Ku cikota ca Shimelone kwatundile vaShimelone.

²⁵ Eci cikeco capwile cikota ca Isakale vaje vavalavele vapwile 64,300.

²⁶ Vatekulwila va Zembuloni kupwisa ku cikota cavo vapwile ava. Ku cikota ca Selende, kwatundile vaSelende. Ku cikota ca Elone, ku kwatundile vaElone. Ku cikota ca Njahelele, kwatundile vaNjahelele.

²⁷ Eci cikeco capwile cikota ca Zembuloni, vaje vavalavele vapwile 60,500.

²⁸ Vatekulwila va Yosefa kupwisa ku cikota ca Manase na Efalime vapwile ava.

²⁹ Vatekulwila va Manase vapwile ava. Ku cikota ca Makile, kwatundile vaMakile. Makile wapwile ishe ya Ngilyande. Ku cikota ca Ngilyande, kwatundile vaNgilyande.

³⁰ Ava vakevo vapwile vatekulwila va Ngilyande. Ku cikota ca Iyezele, kwatundile vaIyezele. Ku cikota ca Heleke, kwatundile vaHeleke.

³¹ Ku cikota ca Asilyele, kukekwo kwatundile vaAsilyele. Ku cikota ca Shekeme, kwatundile vaShekeme.

³² Ku cikota ca Sheminda, kwatundile vaSheminda. Ku cikota ca Hepa, kwatundile vaHepa.

³³ Zelofehande muna Hepa kakele na vana va vanalume oloni wakele na vana va vanakazi lika, mazina avo vapwile, Mahela, na Nowa, na Hongela, na Mileka na Tileza.

³⁴ Eci cikeco capwile cikota ca Manase, vaje vavalavele vapwile 52,700.

³⁵ Vatekulwila va Efalime kupwisa ku cikota cavo vapwile ava. Ku cikota ca Shutela, kwatundile vaShutela. Ku cikota ca Mbekele, kwatundile vaMbekele. Ku cikota ca Tahane, kwatundile vaTahane.

³⁶ Ava vakevo vapwile vatekulwila va Shutela. Ku cikota ca Elane, kwatundile vaElane.

³⁷ Eci cikeco capwile cikota ca Efalime, vaje vavalavele vapwile 32,500. Ava vakevo vapwile vatekulwila va Yosefa ngwe ku cikota cavo.

³⁸ Vatekulwila va Mbenjemani ngwe ku cikota cavo vapwile ava. Ku cikota ca Mbela, kwatundile vaMbela. Ku cikota ca Ashimbele, kwatundile vaAshimbele. Ku cikota ca Ahileme kwatundile vaAhileme.

³⁹ Ku cikota ca Shefufame, kwatundile vaShefufame. Ku cikota ca Hefame, kwatundile vaHefame.

⁴⁰ Vatekulwila va Mbela muli Alenda na Namane vapwile ava. Ku cikota ca Alenda, kwatundile vaAlenda. Ku cikota ca Namane, kwatundile vaNamane.

⁴¹ Eci cikeco capwile cikota ca Mbenjemani, vaje vavalavele vapwile 45,600.

⁴² Vatekulwila va Ndani ngwe ku cikota cavo vapwile ava. Ku cikota ca Shuhame, kwatundile vaShuhame. Eci cikeco capwile cikota ca Ndani,

⁴³ voshe ava vapwile cikota ca Shuhame, co vaje vavalavele vapwile 64,400.

⁴⁴ Vatekulwila va Ashele ngwe ku cikota cavo vapwile ava. Ku cikota ca Imena, kwatundile vaImena. Ku cikota ca Ishevi, kwatundile vaIshevi. Ku cikota ca Mbeliya, kwatundile vaMbeliya.

⁴⁵ Vatekulwila va Mbeliya vapwile ava. Ku cikota ca Hembele, kwatundile vaHembele. Ku cikota ca Malekyele, kwatundile vaMalekyele.

⁴⁶ Ashele wakele na mwana wa munakazi lizina lyendi Sela.

⁴⁷ Eci cikeco cikota ca Ashele, vaje vavalavele vapwile 53,400.

⁴⁸ Vatekulwila va Nafetali ngwe ku cikota cavo vapwile ava. Ku cikota ca Njahezele, kwatundile vaNjahezele. Ku cikota ca Nguni, kwatundile vaNguni.

⁴⁹ Ku cikota ca Njezele, kwatundile vaNjezele. Ku cikota ca Shileme, kwatundile vaShileme.

⁵⁰ Eci cikeco cikota ca Nafetali, vaje vavalavele vapwile 45,400.

⁵¹ Vungi vwa vanu va Isalele vavalavele vapwile 601,730.

⁵² Co Shukulu Kalunga wendekele kuli Mosesa ngwendi,

⁵³ “Angununa lifuti mukati ka miyati, ngwe ku vungi vwavo.

⁵⁴ Ku muyati uje kuli vanu vavangi vane mutambela wakama wa lifuti, co kuje kuli muyati waundondo vane mutambela waundondo wa lifuti, co ku muyati na muyati vane vyavapande ngwe ku vungi vwavo.

⁵⁵ Oloni ukaangunune lifuti akuta n̄ela, ngwe ku mazina a miyati ya vatekulwila vavo ku vungi vwavo.

⁵⁶ Co vushwana vwavo ukavwangununa akuta n̄ela mukati ka vaje vavangi na ava vavandondo.”

⁵⁷ Ava vakevo vapwile vaLevi vaje vavalavele kupwisa ku vikota vyavo. Ku cikota ca Ngeleshone, kwatundile vaNgeleshone. Ku cikota ca Kohate, kwatundile vaKohate. Ku cikota ca Melali, kwatundile vaMelali.

⁵⁸ Ava vakevo vapwile vatekulwila va vikota vya vaLevi, cikota ca vaLimbeni na cikota ca vaHevelone na cikota ca vaMaheli na cikota ca vaMushi na cikota ca vaKola, co Kohate wapwile ishe ya Amelame.

⁵⁹ Lizina lya munakazi wa Amelame lyapwile Njokevende, mutekulwila wa Levi, uje wasemukile kuli Levi mu Ingito. Kuli Amelame wakitilileko Alone na Mosesa na ndokazi yavo Milyamu.

⁶⁰ Alone wakitile Nandave, na Avihu, na Elyazale na Itamale.

⁶¹ Oloni Nandave na Avihu vatsile omo vakombelelele n̄ombelo ya tuhya twakujeneka kujela ku mesho a Shukulu Kalunga.

⁶² Co vanalume vakukola va vaLevi amo na vimbututu va vanalume vaje vakele na ngonde imo nambe kutuvakana, vungi vwavo vapwile 23,000. Vakevo kuvavalavelele kumo na vaIsalele vakwavo omwo vakevo kuvatambwile vushwana mukati ka vaIsalele.

⁶³ Evi vikevyo vikota vije vyalavele Mosesa na Elyazale muka-kukombelela omo valavele vaIsalele mu vyana vya vaMowavi musambwa ya Ndonga ya Yondau vyalishungama na Yeliko.

⁶⁴ Co mukati kavo naumo wai wasaleleo kuli vaje vavalavele akulivanga kuli Mosesa na Alone muka-kukombelela kuje ku mambo ya Sinai.

⁶⁵ Omwo Shukulu Kalunga wendekele na vanu va Isalele ngwendi, “Mwa vushunga vene muvavoshe mukatsila muno mu Mambo, naumo wai akasalao, kuvanga lika Kalembi muna Njefune, na Yoshwa muna Nune.”