Kulava 25 - Livulu lya Shukulu Kalunga

Vanu va Isalele vali ku Peole

¹ Omo vaIsalele vakele mu Cana ca Miti ya Mingongo, co vanalume vashangumukile kulinga vupangala na vanakazi va vaMowavi vaje vakele kuje.

² Co vanakazi ava valanyele vanalume va Isalele ku viwano vyavo vyakukombelela kuje vakele nakulemesela vinjambi va vaMowavi. Vanalume va Isalele valile nakulemesa vinjambi vavo.

³ Co vaIsalele valemesele Mbale wa ku Peole. Ngecivene, Shukulu Kalunga waluvalele navo,

⁴ wendekele kuli Mosesa ngwendi, “Kungulula vantwama voshe va Isalele nakuvashukika kulutwe lwa Mbalaka Mwakuliwanena mutanya mwelu, ngeci vukalu vwakama Shukulu vwa Kalunga vutunde ali Isalele.”

⁵ Ngecivene, Mosesa wendekele kuli maako ngwendi, “Munu na munu akati keni atsiye vanalume voshe vaje valemesele Mbale wa ku Peole.”

⁶ Co kengeni, umo kaIsalele wanenele munakazi wa kaMindyani mu mbalaka yendi ku mesho a Mosesa na mbunga yoshe, simbu vakevo vacikele nakulilila ku cikolo ca Mbalaka Mwakuliwanena.

⁷ Omo Finehase, muna Elyazale mutekulu wa Alone muka-kukombelela wamwene eci, wakatukile wasezele mbunga, co wanonele likunga,

⁸ wakavele uje munalume na uje munakazi muje mu mbalaka, co muvuvali vwavo voshe wavapulyasanene likunga. Mu ngila eyi uje mushongo wakulitambwisa washakele kunyongesa vaIsalele wahwile,

⁹ oloni vaje vatsile ku mushongo ou vapwile vanu 24,000.

¹⁰ Co Shukulu Kalunga wendekele kuli Mosesa ngwendi,

¹¹ “Omo a evi nalingi Finehase, nolwesa vukalu vwange ali vanu va Isalele. Ikeye nakala na ntwima yakusingimika vukama vwange ngeci wavyanene kulemesa vinjambi veka kuvanga yange. Co omu mukemwo kunjavanyongesele vanu voshe mu vukalu vwange.

¹² “Ngecivene, muleke ngwove, ‘Kenga, yange njilinakulikumiiya nendi cikumiiyo ca kulitombola ca ku simbu yoshe ya kulutwe.

¹³ Ikeye na vatekulwila vendi vakapwa vaka-kukombelela simbu yoshe, omwo ikeye katavele ngeci valemese vinjambi veka kuvanga yange lika, co mu ngila eyi naambesa vuvi vwa vanu va Isalele.’ ”

¹⁴ Lizina lya uje kaIsalele ivatsiile na uje munakazi wa kaMindyani lyapwile Zimeli muna Salu. Salu wapwile mukulunu wa ku naanga imo ya muyati wa Simyoni.

¹⁵ Co lizina lya uje munakazi wa kaMindyani lyapwile Kozembi muna Zule. Zule wapwile mukulunu wa cikota cimo ca Mindyani.

¹⁶ Co Shukulu Kalunga wendekele kuli Mosesa ngwendi,

¹⁷ “Lwisa vaMindyani nakuvanyongesa,

¹⁸ omwo vamikokweyeyeye a vuvi vuje valingile kuli yeni kuje ku Peole, co na ali ndokazi yavo Kozembi, muna mukulunu wa kaMindyani uje ivatsiile a simbu ya mushongo uje wakulitambwisa ku Peole.”