Kulava 24 - Livulu lya Shukulu Kalunga

¹ Omo Mbalame wamwene ngeci, cavwaelelesele Shukulu Kalunga kuvezikisa vanu va Isalele, kaile lalo mukushakezeka vyakutaa ngwe muje mwalingile akulivanga, oloni wakengeselele mu mambo.

² Omo Mbalame wandwile mesho endi, wamwene vanu va Isalele vanatungu cilombo cavo kupwisa ngwe ku muyati na muyati. Co Munzinzime wa Njambi wezile ali ikeye nakumupangesa,

³ co wambulwile vuka-kwimanena vwendi ngwendi, “Eli likelyo lijwi lya Mbalame muna Mbeole, Ano akeo majwi a munu uje asa kumona mwamuvwa nakutungukwa,

⁴ uje asa kuziva vije vyalinakwendeka Njambi. Uje amona nakutungukwa cimona ca Njambi Muka-nzili yoshe. Uje awila asi ngwe natsi kavela-vela, oloni mesho endi natono amona vyoshe.

⁵ Vimbalaka vyove Yakomba vyapwa vyavivwa, na vilombo vyove Isalele vyavivwa!

⁶ Ngwe vyana vyakujanjavala, nambe ngwe myaaka ya ku n̄ondo ya ndonga, nambe ngwe malimangango aje akunine Shukulu Kalunga, nambe ngwe miti ya kendale ya ku ngenge ya ndonga.

⁷ Vakevo vakakala na nyonzi yakama, co vakakuna vimbuto vyavo mu mahya akutukumwina. Mwene yavo akapwa wakama kutuvakana Angange, co vumwene vwavo vukatsimana manene.

⁸ Njambi wavatundisile mu Ingito, ikeye akavalwila ngwe mpakasha. Ikeye akazilisa vitozi vavo, nakupokozola vitsiya vyavo, nakuvapokozola mikili yavo.

⁹ Muyati wakulifwa na ndumba wa nkomba wa nzili, nambe ngwe ndumba wa lwavo, iya akamushangumuna nakumwindula omo nalala? Woshe uje avezikisa Isalele nendi lalo vakamuvezikisa, co woshe uje asinga Isalele nendi lalo vakamusinga.”

¹⁰ Ngecivene, Mbalake waluvalelele Mbalame, wavungile n̄ome nakulipupa mu mavoko lyendi, co wendekele kuli Mbalame ngwendi, “Njakusanene ngwange unjisingile vitozi vange, oloni kenga yove unavavezikisa visimbu vitatu.

¹¹ Ololo iluka kwimbo lyove! Yange njakukulaesele kukwana fweto, oloni kenga, Shukulu Kalunga nakuvindika ngeci kesi utambule fweto.”

¹² Co Mbalame wakumbulwile Mbalake ngwendi, “Kuma! Kunjalekele tunganda vove vaje watumine kuli yange ngwange,

¹³ ‘Nameme nga Mbalake akanjana njuvo yakushula ya siliva na ngolinde ya mu lipela lyendi, kunjikasa kuvyana kushika kwa Shukulu Kalunga akulilingila cumacimo yange vavenya nambe cacivwa nambe cacivi. Njikendeka lika vije vyakanjileka Shukulu Kalunga kwendeka.’ ”

Vuka-kwimanena vwa Mbalame vwakumanesela

¹⁴ Co Mbalame wendekele kuli Mbalake ngwendi, “Ololo kenga njilinakwiluka kuli vavushoko vwange, oloni omo kanda njiye, njilinakukunangula vije vivakalinga vaIsalele kuli vanu vove kulutwe.”

¹⁵ Asinoni ikeye wambulwile vuka-kwimanena vwendi ngwendi, “Lijwi lya Mbalame muna Mbeole, lijwi lya munu uje asa kumona mwamuvwa nakutungukwa.

¹⁶ Uje asa kuziva majwi a Njambi, nakuzivuka mana aje akutunda kuli Njambi wa Akamwa ya Akamwa, uje amona nakutungukwa cimona ca Njambi Muka-nzili yoshe, uje awila asi ngwe, natsi kavela-vela, oloni mesho endi natono amona vyoshe.

¹⁷ Co njikenga ku vije vikaija kulutwe, njamumono mwene uje akaija, oloni kesi kuyehi. Ikeye nalifu na ngongonosi yakuvyazima, akatuuka kuli Yakomba, mulamu wa vumwene ukatunda mu Isalele. Ikeye akamanesa nzili ya vantwama va vaMowavi, nakufungulula vanu voshe va ku Seta.

¹⁸ Ikeye akafungulula vitozi vendi mu Endome. Co akapwisa Seya lifuti lya vufuko vwendi, oloni Isalele vakatwalao nakuhyana.

¹⁹ Kuli Yakomba kukatunda umo ikeye akashwana, akanyongesa vaje vakasala mu nganda.”

²⁰ Co mu cimona cendi Mbalame wamwene vaAmaleke, co wambulwile vuka-kwimanena vwendi ngwendi, “Amaleke vapwile muyati wa nzili ku miyati yoshe, oloni akukotoka vakanyonga njwa.”

²¹ Mu cimona cendi Mbalame wamwene vaKeni, co wambulwile vuka-kwimanena vwendi ngwendi, “Mutambela ou munatumbama unapu wa kwoloka, uli mwamuvwa ngwe lishwa lili mu mwanzi wa limanya.

²² Oloni yeni vaKeni mukanyonga omo vaAsilya vakamifungulula.”

²³ Co Mbalame wambulwile vuka-kwimanena vwendi ngwendi, “Veyajo ava vanu vanalikungulwila ku kunto?

²⁴ Vaka-kulwa vakaija mu mato akama kutunda ku Sipulase, co vakafungulula Asilya na Evele, oloni vakevo lalo vakanyonga voshe njwa.”

²⁵ Asinoni Mbalame wakatukile nakwiluka kwimbo lyendi, co Mbalake lalo nendi waile kwimbo lyendi.