Kulava 22 - Livulu lya Shukulu Kalunga

Mbalake Mwene wa vaMowavi asana Mbalame

¹ VaIsalele vajalukile, co vakatungile cilombo cavo mu vyana vya Mowavi ku mutambela wa mu ngangela ya Ndonga ya Yondau, kushungama na Yeliko.

² Omo Mbalake muna Zipole, wazivile vije vyoshe vivalingile vaIsalele kuli vaAmoli,

³ co ikeye na vanu vendi voshe vazivile lyova lyakama omwo va Isalele vapwile vavangi manene.

⁴ Co vaMowavi vendekele kuli vantwama va Mindyani ngwavo, “Mbunga eyi ikalyasa vyuma vyoshe vije vyatuzengeleka, ngwe ngombe mwakakambula mwila wa mu cana.” Ngecivene, Mwene Mbalake

⁵ watumine tunganda kuli Mbalame muna Mbeole, uje wakele ku Petole kuyehi na Ndonga ya Yufuleti mu lifuti lya Amawe. Co vamulekele majwi atundile kuli Mbalake ngwavo, “Njikuleka ngwange unapande kuzivuka ngeci kunaija muyati umo vanatundu ku Ingito, co ava vanu vanashandokela kwoshe-ikwoshe, co lalo vanatungu kulishungama nange.

⁶ Vanatuhyana, yetu tunapu tuvavandondo, ngecivene, ija wakunjisingilevo. Amo twakuvafungulula nakuvasheka mu lifuti lyetu. Omwo njazivuka ngeci uje iwuvezikisa akavezika, co uje iwusinga akasingiwa.”

⁷ Ngecivene, vantwama va vaMowavi na vaMindyani vatwalele mushendo wakutaesa kuli Mbalame, co vamulekele majwi atundile kuli Mwene Mbalake.

⁸ Co Mbalame wendekele kuli vakevo ngwendi, “Laleni kuno, co imene njikamikumbulula vije vyakanjileka Shukulu Kalunga.” Ngecivene, vaje vantwama va vaMowavi vatumbamene kuli Mbalame.

⁹ Co Njambi wezile kuli Mbalame nakumwihula ngwendi, “Ava vanu vanatundu kulijo ava vanatumbama nove?”

¹⁰ Co Mbalame wamukumbulwile ngwendi, “Mwene Mbalake muna Zipole wa ku Mowavi ikeye navatumu kuli yange nakunjileka ngwendi,

¹¹ ‘Vanu ava vanatundu ku Ingito vanashandokela mu lifuti mwoshe. Ashaka njikamusingilevo, ngeci avalwise nakuvasheka.’ ”

¹² Njambi wendekele kuli Mbalame ngwendi, “Kesi uye amo na ava vanu, co kesi ukasinge vanu va Isalele, omwo njavavezikisa laja.”

¹³ Alikaki Mbalame waile kuli tunganda va Mwene Mbalake, wavalekele ngwendi, “Ilukeni kwimbo lyeni omwo Shukulu Kalunga nanjivyanesa kuya amo neni.”

¹⁴ Ngecivene, velukile kuli Mbalake, co vamulekele ngwavo, “Mbalame navyana kwija amo netu.”

¹⁵ Co Mbalake watumine lalo vantwama vavangi, vaje vakele na vulemu vwakutuvakana vaje vakulivanga.

¹⁶ Co vaile kuli Mbalame nakumuleka lijwi lyatundile kuli Mbalake ngwavo, “Kesi utave cumacimo cakukuvindika kwija kuli yange!

¹⁷ Njikakusingimika na kasingimiko kakama, co njikakulingila cuma coshe ciwakunjitumbwila. Ngeci ija vwasi wakunjisingile vano vanu.”

¹⁸ Oloni Mbalame wavakumbulwile ngwendi, “Nameme nga Mbalake akanjana siliva yoshe na ngolinde yoshe ya mu lipela lyendi, oloni kunjasa kuvyana kushika kwa Shukulu Kalunga Njambi yange, nameme kutundisako nambe kwakelako.

¹⁹ Oloni laleni kuno ngwe muvalingile vaje vakweni, ngeci njizivuke vije vyanjileka Shukulu Kalunga.”

²⁰ Co vutsiki vuje vene Njambi wezile kuli Mbalame nakumuleka ngwendi, “Nga ava vanu vanaija nakulomba ngeci uye navo, livwaesele cimweja ngeci uye navo, oloni ya ukalinge lika vije njikuleka.”

²¹ Ngecivene, alikaki Mbalame walemekele cimulu cendi, waile amo na vaje vantwama va Mowavi.

Cimulu ca Mbalame endeka

²² Oloni Njambi waluvalele na Mbalame omwo walondele a cimulu cendi nakuya amo na vangamba vendi vavali, co kangelo ka Shukulu Kalunga wemanene mu ngila nakuyishoka.

²³ Omo cimulu wamwene kangelo ka Shukulu Kalunga nemana mu ngila nakwata mukwale mu livoko lyendi, co watundilemo nakuya mu shwata. Co Mbalame wapupile cimulu nakumwilwisila mu ngila.

²⁴ Co kangelo ka Shukulu Kalunga wemanene mu ngila yakulishwata mukati ka vitungu vya mikolovozi ya vushuka vwa vinyu, co kuje kwakele civumbe ca mamanya ku mitambela yoshe noku-noku.

²⁵ Omo cimulu wamwene kangelo ka Shukulu Kalunga, co walyengelele ku civumbe nakusindakanena lindi lya Mbalame ku civumbe. Co Mbalame lalo wapupile uje cimulu.

²⁶ Co kangelo ka Shukulu Kalunga waile kulutwe, wemanene aje alishwatela ngila, aje kwaakele mutambela weka lalo wakulyengela.

²⁷ Omo cimulu wamwene kangelo ka Shukulu Kalunga, co wavutamene. Co Mbalame waluvalele manene ngeci wapupile uje cimulu na mulamu wendi.

²⁸ Asinoni Shukulu Kalunga washamesele kanwa ka cimulu, co cimulu wendekele kuli Mbalame ngwendi, “Vikajo njinalingi kuli yove ngeci unjipupe visimbu vitatu?”

²⁹ Co Mbalame wamukumbulwile ngwendi, “Omwo wanjimono vulema! Nga njinakele na mukwale mu livoko lyange, ngwe njinakutsii ololo vene.”

³⁰ Co cimulu wamukumbulwile ngwendi, “Kuma kesi yange cimulu cove iwukalondo visimbu vyoshe kweta na ku lelo ndi? Kuma kwakele visimbu vimo vinjakulingile ngacije ndi?” Co Mbalame wamukumbulwile ngwendi, “Embwe.”

³¹ Asinoni Shukulu Kalunga watonesele mesho a Mbalame, co wamwene kangelo ka Shukulu Kalunga nemana mu ngila na mukwale wendi mu livoko. Co Mbalame wakulamesele cihanga cendi nakulyumbila asi.

³² Co kangelo ka Shukulu Kalunga wamwihwile ngwendi, “Omo vikajo wapupanga ngacije cimulu cove visimbu vitatu? Kenga njinaija nakukulwisa omwo ngila yove yaivi ku mesho ange, yove kuwapandele kwija vungenzi ovu.

³³ Oloni cimulu cove nanjimwene ngeci nalyengele visimbu vitatu. Nga ikeye kalyengele, ngwe njinakutsiile na kusezao cimulu.”

³⁴ Asinoni Mbalame wakumbulwile kangelo ka Shukulu Kalunga ngwendi, “Njinalingi vuvi omwo kunjazivukile ngwange yove unemana mu ngila nakunjilwisa. Oloni nga eci njinalingi cacivi ku mesho ove, co njiluka kwimbo.”

³⁵ Oloni kangelo ka Shukulu Kalunga wendekele kuli ikeye ngwendi, “Ya oni na ava vanu, oloni ya ukendeke lika vije vinjikuleka.” Ngecivene, Mbalame waile amo navo.

Mbalake atambula Mbalame

³⁶ Omo Mbalake wazivile ngeci Mbalame alinakwija, co waile nakukaliwana nendi ku Ale, nganda ije yakele ku Ndonga ya Alenone ku nginga ya vaMowavi.

³⁷ Co Mbalake wendekele kuli Mbalame ngwendi, “Omo vikajo kuwezile omo njatumine lijwi kuli yove a simbu yakulivanga? Kuma yove uyongola ngwove kunjasa kukufweta vyakupwamo ndi?”

³⁸ Mbalame wamukumbulwile ngwendi, “Kenga, njinaija kuli yove. Oloni yange njili na nzili mukajo yakwendeka nambe lijwi limo? Njasa kwendeka lika vije vyanjileka Njambi kwendeka.”

³⁹ Ngecivene, Mbalame waile na Mbalake ku limbo lya Kilyate Huzote,

⁴⁰ kuje Mbalake wakombelelele vingombe na vimanga, co waanene situ imo kuli Mbalame na vaje vantwama vakele navo.

Vuka-kwimanena vwa Mbalame vwakulivanga

⁴¹ Co alikaki Mbalake watwalele Mbalame ku Mbamote Mbale, kuje Mbalame wasele kumona mutambela wa vanu va Isalele.