Kulava 21 - Livulu lya Shukulu Kalunga

VaKanana vavafungulula kuli vaIsalele

¹ Omo mwene wa vaKanana wa ku Alande, uje wakele mu mbwela ya lifuti lya Kanana, wazivile ngwavo vaIsalele valinakwija ku ngila ya ku Atalime, co ikeye wavalwisile nakufungululako vamo.

² Co vaIsalele valisingile cisingo kuli Shukulu Kalunga ngwavo, “Nga yove Shukulu Kalunga utukundika vanu ava mu mavoko etu, co tukanyongesa membo avo oshe njwa.”

³ Shukulu Kalunga wavazivile, co wavakwasele kufungulula vaKanana. Co vatumbwile mutambela uje ngwavo Holema. Omwo kuje kukekwo vaIsalele vanyongesele membo a vaKanana.

Linyoka wa vunengu

⁴ Co vaIsalele vatundile ku Munkinda wa Hole vaile mu ngila yakuya ku Linema lya Akava, kwongoloka lifuti lya Endome. Oloni a ngila vanu vajenekele kusimpa,

⁵ co valinyenyetele nakutengulukila Njambi na Mosesa ngwavo, “Vikajo mwatutundisilile mu Ingito ngeci tutsile muno mu mambo? Omwo muno kumwesi vyakulya nambe mema ayi. Yetu tunenukwa na vyakulya vy acifwa cangacije!”

⁶ Ngecivene, Shukulu Kalunga watumine manyoka va vushungu vwavuvi akati ka vanu, co vaIsalele vavangi vashumuwile na kutsa.

⁷ Co vanu vezile kuli Mosesa vendekele ngwavo, “Tunalingi vuvi omo tunalinyenyetele nakutengulukila Shukulu Kalunga nove lalo. Ololo tulombelele kuli Shukulu Kalunga ngeci atundise ava manyoka.” Ngecivene, Mosesa walombelelele vanu.

⁸ Co Shukulu Kalunga walekele Mosesa kufula linyoka wa vutale vwa vunengu nakumushukika a manda,

⁹ ngecivene, Mosesa wafulile linyoka wa vunengu wamushukikile ku manda. Ngeci munu woshe uje nashumuwa omwo akenga ku linyoka wa vunengu, co ayoya.

VaIsalele vatunda ku Munkinda wa Hole vaya ku cana ca vaMowavi

¹⁰ Co vanu va Isalele vatundile kuje, co vatungile cilombo cavo ku Ovote.

¹¹ Omo vatundile ku Ovote, vatungile cilombo cavo mu vingundu vya Avalime mu mambo mu ngangela mu lifuti lya Mowavi.

¹² Asinoni vatungile cilombo cavo mu Cana ca Zelende.

¹³ Co kutunda kuje vajalukile lalo, vatungile cilombo cavo ku kunto ya Ndonga ya Alenone, mu mambo ije yeta mu lifuti lya vaAmoli. Ndonga ya Alenone ikeyo yapwile nginga mukati ka vaMowavi na vaAmoli.

¹⁴ Omu mukemwo mulyendeka Livulu lya Vinzita vya Shukulu Kalunga ngwalyo, “Twafungulwile Nganda ya Waheve mu mutambela wa Sufa, na vyana, Ndonga ya Alenone,

¹⁵ na vushelumukilo vwa cana cije citwala ku nganda ya Ale nakweta ku nginga ya Mowavi.”

¹⁶ Kutunda kuje, vaile ku mutambela uje uvatumbwile ngwavo “Masima,” kuje Shukulu Kalunga wendekele kuli Mosesa ngwendi, “Kungulula vanu ngeci njivane mema.”

¹⁷ Asinoni vanu va Isalele vembile mwaso ngwavo, “Masima, mema eni asheloke, tukaembila mwaso!

¹⁸ Lisima lije vendile vana va vimyene va vanalume amo na vantwama va vanu, aje vendile na mulamu wa vumwene amo na milamu yavo.” Vatundile mu mambo nakweta ku Matane.

¹⁹ Co kutunda kuje vaile ku Nahalyele, kutunda ku Nahalyele vetele ku Mbamote,

²⁰ co kutunda ku Mbamote, vaile ku lifuti lya vaMowavi, ku Munkinda wa Pisenga, uje wakenga mu mambo.

VaIsalele vafungulula Mwene Sihone na Mwene Onge

²¹ Asinoni vanu va Isalele vatumine tunganda kuli Mwene Sihone wa vaAmoli vendekele ngwavo,

²² “Tutave twite mu lifuti lyove, yetu na vimuna vetu. Kutukatundu mu tapalo nakuya mu mahya eni nambe mu vitungu vyeni vya mikolovozi ya vushuka vwa vinyu, co kutukanu mema a mu masima eni. Tukenda lika mu tapalo noo tukatuuka mu lifuti lyeni.”

²³ Oloni Sihone wavyanene vanu va Isalele kwita mu lifuti lyendi. Co ikeye wakungulwile mashwalale vendi, wakatukile nakuya ku Njahaze mu mambo, co wakalwile na vaIsalele.

²⁴ Oloni vaIsalele vamutsiile mu nzita amo na vanu vendi vavangi, co vafungulwile lifuti lyavo, kutunda ku Ndonga ya Alenone ku kunto ya lifuti lya Njavoke, likelyo lifuti lya vaAmoni, omwo nginga ya vaAmoni vainyungile manene.

²⁵ Ngecivene, vanu va vaIsalele vafungulwile membo oshe a vaAmoli, amo na Heshevone, na membo oshe aje ayizengelekele, co vatungile mukati kavo.

²⁶ Heshevone ikeyo yapwile nganda yakama ya Sihone Mwene wa vaAmoli, uje walwile akulivanga na mwene wa vaMowavi nakufungulula lifuti lyendi lyoshe kweta na ku Ndonga ya Alenone.

²⁷ Ngeci vaka-kuta visimo vakate ngwavo, “Ijeni ku Heshevone, nganda ya Mwene Sihone! Vaitungulule nakuyikolesa.

²⁸ Omwo ku simbu imo, muno vene mu nganda ya Heshevone, nzita ya Sihone yakatukile ngwe tuhya. Yanyongesele nganda ya Ale mu Mowavi, co vafungulwile vamyata va ku malundu a ku Ndonga ya Alenone.

²⁹ Luvinda lweni, yeni vanu va Mowavi! Yeni vaka-kulemesa Kemoshe munanyongo! Vinjambi veni vapwisa vanalume ngwe vaka-kwija, co vanakazi ngwe vavanafungulula kuli Mwene Sihone wa vaAmoli.

³⁰ Oloni vatekulwila vavo vananyongo, kushangumukila ku Heshevone kweta ku Ndimboni, kutunda ku Nashime kweta ku Nofa kuyehi na Mendeva.”

³¹ Ngecivene, vanu va Isalele vatungile mu lifuti lya vaAmoli.

³² Co Mosesa watumine vanu kuwana ngila yaivwa yakulwa na nganda ya Njazele. Co vaIsalele vaifungulwile na membo aje ayizengelekele, co vashekele vaAmoli vaje vakele muje.

³³ Asinoni vaIsalele, vaile mu ngila ya ku Mbashane, co Onge mwene wa ku Mbashane wakatukile na mashwalale vendi nakuvalwisa ku Endele.

³⁴ Oloni Shukulu Kalunga wendekele kuli Mosesa ngwendi, “Kesi umuzivile lyova embwe. Njikakwana nzili yakumufungulula, na vanu vendi voshe, na lifuti lyendi. Co ukalinga kuli ikeye ngwe muje walingile kuli Sihone, mwene wa vaAmoli, uje washwanene mu Heshevone.”

³⁵ Ngecivene, vaIsalele vatsiile Onge, na vana vendi va vanalume, na vanu vendi voshe, co naumo wai vasezeleo wakuyoya, asinoni vafungulwile lifuti lyendi.