Kulava 19 - Livulu lya Shukulu Kalunga

Lito lya ngombe wakuvenga

¹ Shukulu Kalunga wendekele kuli Mosesa na Alone ngwendi,

² “Lekeni vanu va Isalele vaminenele ngombe wakuvenga wakujeneka kapenga uje kanda ashangumuke kulima,

³ mukamwane kuli Elyazale muka-kukombelela. Co vakamutwale anja mu ngangela ya cilombo ngeci vakamutsiye.

⁴ Asinoni Elyazale muka-kukombelela akanonako maninga amo, co akambwitikamo mulavo wendi, nakuwashamwina visimbu vitanu na vivali kukengesa ku Mbalaka Mwakuliwanena.

⁵ Co munu umo akenyeke uje ngombe woshe wamutunu ku mesho a muka-kukombelela, na cilambu cendi, na situ yendi, na maninga endi, na mila yendi.

⁶ Asinoni muka-kukombelela akanone kaciti ka kendale, na kacishamo ka hisope, na mukole wakuvenguluka, co vakavyumbile mu tuhya muje mulinakwenyela uje ngombe.

⁷ Co munima yevi, muka-kukombelela akakushe vuzalo vwendi nakulitazela mema a muvila wendi, asinoni akakovela mu cilombo, oloni ikeye anga kajelele noo ku cingwezi.

⁸ Co uje munu nenyeka ngombe napande kukusha vuzalo vwendi nakulitazela mema a muvila wendi, oloni ikeye anga kajelele noo ku cingwezi.

⁹ Asinoni munu umo najele akakungiye lije lito lya ngombe nakulyaka mu mutambela wakujela anja ya cilombo, vakalinyungile mbunga ya vanu va Isalele. Co lije lito vakalyake mu mema akujelesa mukutundisa vuvi.

¹⁰ Co uje munu nakungiya lije lito napande kukusha vuzalo vwendi, oloni ikeye anga kajelele noo ku cingwezi. Co mashiko awa akapwa a simbu yoshe, muvuvali vweni vaIsalele, na vaka-kwija vaje valinakukala akati kavo.

Kukwata a civimbi

¹¹ “Woshe uje akwata a civimbi ca munu woshe-iwoshe akapwa wakujeneka kujela a matangwa atanu na avali.

¹² Napande kulijelesa na mema akujelesa a litangwa lyamucitatu, na a litangwa lyamucitanu na avali, asinoni akajela. Oloni nga ikeye kalijelesele a litangwa lyamucitatu, na a litangwa lyamucitanu na avali, co ikeye kakajele embwe.

¹³ Woshe uje akwata a civimbi, co kalijelesa ajwalesa Mbalaka ya Shukulu Kalunga, omwo mema akujelesa kuvamwitazelelewo. Co munu wangacije kuvakamulava lalo kupwa munu wa Njambi.

¹⁴ “Eli likelyo lishiko nga munu atsila mu mbalaka yoshe-iyoshe, co woshe uje ali mu mbalaka ije a simbu ya kutsa kwendi nambe uje akakovelamo akapwa wakujeneka kujela a matangwa atanu na avali.

¹⁵ Co njava yoshe, na ndeo yoshe vilimuje mu mbalaka, vije kuvyesi na vifwiko vyakufwikako, navyo lalo vikapwa vyakujeneka kujela.

¹⁶ Nga munu akwata a munu uje ivanatsiila anja yangoco, nambe uje natsi ku monde, nambe nga munu akwata a citsiya ca munu watsile laja, nambe a mbumbo, co ikeye akapwa wakujeneka kujela a matangwa atanu na avali.

¹⁷ “Ku munu uje kajelele, vakambate lito lya ngombe wakuvenga uje venyekele kupwa n̄ombelo yakujelesa ku vuvi, vakalikundule nakulyaka mu njava, nakwakamo mema amavwa.

¹⁸ Asinoni munu uje najele akambate kacishamo ka hisope nakukambwitika mu mema, nakushamwina aje mema a mbalaka ije, na a vivala vyoshe vilimo, na ali vanu vaje valimo. Mu ngila eyi vene mukemwo vakajelesa munu uje nakwatele a citsiya ca munu wa kutsa, nambe a civimbi ca munu uje natsi ku monde, nambe uje nakwata a mbumbo.

¹⁹ Co munu uje najele akashamwine mema uje kajelele a litangwa lyamucitatu, na a litangwa lyamucitanu na avali. A litangwa lyamucitanu na avali akajelesa uje munu, co ikeye akakushe vuzalo vwendi, nakujwela mema a muvila wendi, asinoni akapwa wakujela ku cingwezi.

²⁰ “Munu uje najwala oloni kalijelesa ikeye vavenya aviisa Mbalaka ya Shukulu Kalunga, omwo mema akulijelesa kuvamwitazelelewo. Co munu wangacije kuvakamulava lalo kupwa munu wa Njambi.

²¹ Munapande kunyunga mashiko awa simbu yoshe ya kulutwe. Co woshe uje ashamwina mema akulijelesa napande kukusha vuzalo vwendi, na woshe uje akwata a mema akujelesa akapwa wakujeneka kujela noo ku cingwezi.

²² Cuma coshe cije akwata munu wakujeneka kujela cikapwa cakujeneka kujela vene. Munu woshe uje acikwata akapwa wakujeneka kujela noo ku cingwezi.”