Kulava 18 - Livulu lya Shukulu Kalunga

Vipangi vya vaka-kukombelela na vaLevi

¹ Ngecivene, Shukulu Kalunga wendekele kuli Alone ngwendi, “Yove na vana vove, na vaLevi muvavoshe mukakala na mulonga wa vyoshe vikaviya ku Mbalaka, oloni yove lika na vana vove mukakala na mulonga wa vipangi vyeni vya vuka-kukombelela.

² Twala vavushoko vwove, va ku muyati wa Levi, vapange amo nove nakukukwasa omo yove na vana vove mukapanga mu Mbalaka Mwakuliwanena.

³ Vakevo vanapande kumipangela yeni nakupanga vipangi vyavo vya mu Mbalaka, oloni kuvapandele kushwenya kuyehi na vyuma vyakujela vije vili mu Mwela Wakujela nambe ku mutula. Nga valingamo, co na vakevo neni muvavoshe mukatsa.

⁴ Co vapange amo nove nakunyunga Mbalaka Mwakuliwanena nakupanga vipangi vyoshe vya mu Mbalaka, oloni munu weka naumo wai akashwenya kuyehi neni.

⁵ Yove na vana vove lika mukapanga vipangi vya mu Mwela Wakujela na ku mutula, ngeci vukalu vwange kesi vukasholokele lalo vanu va Isalele.

⁶ Yange njinakwangwila vavushoko vwove vaLevi akati ka vaIsalele kupwa vwana vwove. Vavakundika kuli yange Kalunga, ngeci vapange vipangi vya mu Mbalaka Mwakuliwanena.

⁷ Oloni yove lika na vana vove mukapanga vipangi vyoshe vya vuka-kukombelela na vyoshe vije vyakundama ku mutula, na vije vili mu Mwela Wakujela Manene. Yange njinamyana vipangi vya vuka-kukombelela kupwa vwana. Co munu woshe akashwenya kuyehi na vyuma vyakujela vakamutsiye.”

Mitambela ya vin̄ombelo vya vaka-kukombelela

⁸ Shukulu Kalunga wendekele kuli Alone ngwendi, “Kenga, yange njinakwana milambu yakama yoshe ije valambula kuli yange kesi ngwe vin̄ombelo vya kwenyeka. Njinakwanavyo yove na vatekulwila vove kupwa mutambela weni ku myaka yoshe.

⁹ Ku vin̄ombelo vyakujela manene, vije kesi vyakwenyekela a mutula, vyoshe evi vyakundama kuli yeni, ngeci mwa n̄ombelo ya vimbuto, na n̄ombelo ya a vuvi, na n̄ombelo yakuliilwisila. Vyuma vyoshe vije vivakundika kuli yange kupwa vyakujela manene, vinapu vyove na vana vove.

¹⁰ Munapande kulila vyuma vyoshe evi mu mutambela umo wakujela, oloni vanalume lika vakevo vakavilya, munapande kuviyongola ngeci vyapwa vyakujela.

¹¹ “Milambu yakama yoshe ije ivalambula vaIsalele kuli yange ikapwa yeni. Njinayana kuli yove, na kuli vana vove va vanalume, na ava va vanakazi ku myaka yoshe. Munu woshe wa mu naanga yove uje najele nasa kuvilya.

¹² “Njinamyana vyoshe vije vyavivwa manene, evi vinapu mazi a olive amavwa, na vinyu vyavivwa, na vimbuto vije vakateja vaIsalele akulivanga a mwaka na mwaka.

¹³ Co vushuka vwoshe na vimbuto vyoshe vyakulivanga kuhya vije vili mu lifuti lyavo vije vakalambula kuli yange vikapwa vyeni. Co munu woshe wa ku naanga yove uje najele nasa kuvilya.

¹⁴ “Vyuma vyoshe vije vili mu Isalele vivanakundika kuli yange Kalunga vinapu vyeni.

¹⁵ “Mwana wa ntwatwa woshe nambe cimuna wa ntwatwa uje ivananjana vaIsalele apwe weni. Oloni munapande kukula mwana woshe wa ntwatwa wa munu, na mwana woshe wa ntwatwa wa cimuna uje kajelele.

¹⁶ Omo vali na ngonde imo mukavakula na mavundungulu a siliva atanu ngwe ku ndando ivemika.

¹⁷ Oloni muna cimuna woshe wa ntwatwa nambe ngombe, nambe manga, nambe membe kesi mukamukule omwo vakevo vanapu vakukundika. Co mukashamwina maninga avo ku mutula, nakwenyeka mazi kupwa n̄ombelo ya vyakulya, co vweko vyayo vwavuvwa vukanjivwaelelesa.

¹⁸ Co situ ya vin̄ombelo evi ikapwa yeni, n̄undo na lindi lya cilyo vikapwa vyeni.

¹⁹ “Vin̄ombelo vyakukundika vyoshe vije vanu va Isalele vakakombelela kuli yange Kalunga njinavyana kuli yove na kuli vana vove va vanalume, na ava va vanakazi, kupwa mulambu weni ku myaka yoshe. Eci cikeco cikumiiyo ca mwongwa ca kuhwa ku mesho ange Kalunga, kuli yove na ku vatekulwila vove voshe.”

²⁰ Co Shukulu Kalunga wendekele kuli Alone ngwendi, “Kumukakala na vushwana mu lifuti lyavo, nambe kumukakala na mutambela umo akati kavo, omwo yange njinapu mutambela weni na vushwana vweni akati ka vanu va Isalele kumukajeneka navimo vyai.”

Mutambela wa vaLevi

²¹ Shukulu Kalunga wendekele ngwendi, “Njinaana kuli vaLevi camulikumi coshe cije vanu va Isalele valinakunjanaco kupwa vushwana vwavo. Eyi ikeyo fweto yavo ya vipangi vyakunyunga Mbalaka Mwakuliwanena.

²² Kutunda ano vanu va Isalele kesi vakashwenye ku Mbalaka Mwakuliwanena kutewa valikokela vuvi vwa kutsa.

²³ Kutunda ano vaLevi lika vakevo vakapanga vipangi vya mu Mbalaka Mwakuliwanena. Co vakakala na mulonga wa uje ivakatsiya uje ashwenya kuyehi na Mbalaka. Eli linapu lalo lishiko lya vatekulwila veni voshe. Co vaLevi kuvakakala na vufuko nambe vushwana mu Isalele,

²⁴ omwo njinavana cavulikumi cije civananjana vaIsalele, ngeci cipwe vushwana vwavo. Mukemwo njavaleke ngwange kuvakakala na vushwana nambe vufuko mu Isalele.”

Cavulikumi ca vaLevi

²⁵ Shukulu Kalunga wendekele kuli Mosesa ngwendi,

²⁶ “Leka vaLevi ngwove, ‘Omo mutambula cavulikumi kuli vaIsalele cije cinjinamyana yange Kalunga kupwa vufuko vweni, co munapande kwana kuli Shukulu Kalunga camulikumi kupwa mulambu weni wakama.

²⁷ Co mulambu weni vakamilavelawo kupwa mulambu wa ku vimbuto vyakulivanga, na vinyu vyakulivanga.

²⁸ Mu ngila eyi mukalambula mulambu wakama kuli Shukulu Kalunga ku vyavulikumi vyoshe vije mulinakutambula kuli vanu va Isalele. Yeni munapande kwana mulambu ou wakama wa Shukulu Kalunga kuli Alone muka-kukombelela.

²⁹ Co munapande kwana kuli Shukulu Kalunga mutambela uje wauvwa, na mutambela uje wakujela manene wa vyoshe vije vamyana.’

³⁰ Ngecivene, ukavaleke ngwove, ‘Omo munaana laja mutambela uje wauvwa, co vije vinasalao vikapwa vyeni ngwe muje ndimi akanyungu vije vinasalao omo naana laja mulambu wendi.

³¹ Yeni na naanga yeni mukalila a mutambela woshe-iwoshe wa vije vinasalao, omwo eyi inapu fweto yeni yakupanga mu Mbalaka Mwakuliwanena.

³² Co kumukakala na mulonga lalo omo yeni mukavilya, omwo yeni munaana laja vyavivwa kuli Shukulu Kalunga. Oloni kesi mukaviise mulambu wakujela manene wa vanu va Isalele akulya vimo vya ku mulambu uje omwo kanda mucane mutambela wauvwa kuli Shukulu Kalunga kutewa mukatsa.’ ”