Kulava 13 - Livulu lya Shukulu Kalunga

Vaka-kunenga lifuti lya Kanana

¹ Shukulu Kalunga wendekele kuli Mosesa ngwendi,

² “Ku miyati eyi likumi na ivali angula ku muyati umo na umo ntwama umolika ngeci uvatume vakanenge lifuti lya Kanana, eli njilinakulyana kuli vanu va Isalele.”

³ Co Mosesa wavatumine oku vacili mu mambo ya Palane ngwe ku lishiko lya Shukulu Kalunga. Co voshe ava vapwile vantwama va Isalele.

⁴ Ku muyati wa Luvena ntwama wapwile Shamwa muna Zakale,

⁵ ku muyati wa Simyoni ntwama wapwile Shafete muna Holi,

⁶ ku muyati wa Yunda ntwama wapwile Kalembi muna Njefune,

⁷ ku muyati wa Isakale ntwama wapwile Ingale muna Yosefa,

⁸ ku muyati wa Efalime ntwama wapwile Hosheya muna Nune,

⁹ ku muyati wa Mbenjemani ntwama wapwile Paliti muna Lafu,

¹⁰ ku muyati wa Zembuloni ntwama wapwile Ngandiyele muna Sondi,

¹¹ ku muyati wa Manase ntwama wapwile Ngandi muna Susi,

¹² ku muyati wa Ndani ntwama wapwile Amiyele muna Ngemali,

¹³ ku muyati wa Ashele ntwama wapwile Sesule muna Mikaele,

¹⁴ ku muyati wa Nafetali ntwama wapwile Nambi muna Vofesi,

¹⁵ ku muyati wa Ngande ntwama wapwile Ngewele muna Maki.

¹⁶ Ava vakevo vantwama vaje Mosesa wavatumine nakunenga lifuti lya Kanana. Co Mosesa watengulwile lizina lya Hosheya muna Nune kupwa Yoshwa.

¹⁷ Omo Mosesa wavatumine nakunenga lifuti lya Kanana, co wendekele kuli vakevo ngwendi, “Lamateni ngila ya ku kunto ije iya ku mutambela wa lifuti lya ku mbwela ya Kanana, co lamateni ku lifuti lya malundu.

¹⁸ Ngecivene, mukamone lifuti lyafwa vati, na vanu vakalamo vali na nzili nambe vakuzeya, nambe vavandondo nambe vavangi.

¹⁹ Co mukamone vati lifuti mulyafwa, nga lyalivwa nambe lyalivi, nambe vanu vamwo vatunga membo avo mu vilombo nambe mu vimpaka.

²⁰ Co mukamone ngeci nga livu lyamwo lyapwa lya vwilo nambe kulyesi na vwilo, nambe nga mwakala shwata nambe yaimo. Co mukambate vushuka vuje vwakalamo.” Eyi ikeyo yapwile simbu yakushangumuka kuhya kwa mikolovozi ya vushuka vwa vinyu.

²¹ Ngecivene, vaje vanu vaile, co vakanengele lifuti kutunda mu Mambo ya Zine mu mbwela kweta na ku Lehombe, kuyehi na Cikolo ca Hamate ku kunto.

²² Akulivanga vaile ku lifuti lya mu mbwela, co vetele ku Hevelone, kuje kwakele cikota ca Ahimane, na Sheshai, na Talemai, vatekulwila va makisi-kisi vaje vavatumbwile ngwavo va Anakime. Co limbo lya Hevelone likelyo lyapwile lyakulivanga kulitunga, omo kwetile myaka itanu na ivali asinoni vatungile Zoane mu Ingito.

²³ Co vetele mu Cana ca Eshekole vajokwele munango uje wakele na likasha-kasha limolika lya vwa mikolovozi ya vushuka vwa vinyu, co likelyo lyalemene manene ngeci valyambatele vanu vavali a muweti. Co vakevo lalo vezile na mapomingilanete, amo na mikuyu.

²⁴ Mutambela uje vautumbwile ngwavo Cana ca Eshekole omwo yalije likasha-kasha lya mukolovozi wa vushuka vya vinyu livajokwele vanu va Isalele kuje.

²⁵ Co omo matangwa makumi awana ahwile, velukile kutunda kukunenga lifuti.

²⁶ Vezile kuli Mosesa na Alone, na ku mbunga yoshe ya vanu va Isalele ku Kandeshe mu mambo ya Palane. Co vambulwile vukaleo vwoshe kuli Mosesa na Alone na ku mbunga ya vanu va Isalele nakuvasholwela vushuka vwa mu lifuti lije.

²⁷ Co valekele Mosesa ngwavo, “Tunakanengele mu lifuti muje muwatutumine, tunakawana ngeci likelyo linapu lya vufuko na vwilo nevi vyakujenekamo vyai, co ovu vukevwo vushuka vwamwo.

²⁸ Oloni vaje vanu vakalamo vapwa vaka-nzili manene, na vinganda vyavo vyakama manene, vyakala mu vimpaka vyakukola manene. Vunene, twakamwene lalo vatekulwila va Anakime vakevo makisi-kisi vakala muje.

²⁹ VaAmaleke vakala mu mbwela ya lifuti lya Kanana, co vaHiti, na vaNjevushi, na vaAmoli vakala mu lifuti lya malundu, co vaKanana vakala ku Mema a kalunga a Menditelenyani na ku ngenge ya Ndonga ya Yondau.”

³⁰ Asinoni Kalembi wolwesele vanu vakele nakulinyenyetela kuli Mosesa, co wendekele ngwendi, “Tuyeni tujaluke ano tukatambule lifuti likapwe lyetu, omwo tuli na nzili yakuvafungulula.”

³¹ Oloni vaje vanu vaile na Kalembi vendekele ngwavo, “Embwe! Yetu kutwasa kuya nakulwa omwo vaje vanu vali muje vali na nzili manene kutuvakana yetu.”

³² Ngecivene, vashandwele vukaleo vwavuvi vwa makuli akati ka vanu va Isalele a lifuti lije livakanengele. Co vakevo vendekele ngwavo, “Lifuti lije litunakanengele kulyesi na vwilo vwakumenesa vyakulya vyakuyoyesa vaje vatungamo. Vanu voshe twakawanene muje vapwa vakutunuka lika.

³³ Twamwene lalo makisi-kisi kuje, vatekulwila va Anake. Co twalimwene vundondo ngwe tu vimbimba ku mesho avo.”