Kulava 11 - Livulu lya Shukulu Kalunga

Mutambela uvatumbwile Tambela

¹ Vanu va Isalele vashangumukile kulinyenyetela kuli Shukulu Kalunga a vukalu vwavo. Co omo Shukulu Kalunga wazivileko, waluvalele, co watumine tuhya ali vanu. Co twashukumine mukati kavo twenyekele mutambela umo wa cilombo cavo nakweta ku shongo yaco.

² Asinoni vanu va Isalele vatambekele kuli Mosesa ngeci avakwase, co Mosesa walombelele kuli Shukulu Kalunga, co tuhya twazimine.

³ Ngecivene, mwela uje vaulukile ngwavo “kwenyeka” omwo kuje vene tuhya twa Kalunga twashukumine mukati kavo.

Mosesa aangula vantwama makumi atanu na avali

⁴ Co kwakele vanu vamo veka vaje vendele amo na vanu va Isalele. Vakevo vashungwiiye kulya situ, co vanu va Isalele navo vashangumukile kulinyenyeta ngwavo, “Tawe! Nga kutwawanako situ tai tulye!

⁵ Tunanuka visi twakele nakulya ngoco mu Ingito va kulanda, na vinende vya ngulu, na malasiya, na sapola ya mavundungulu, na sapola yeka na yeka yakunika mwamuvwa!

⁶ Oloni ololo nzili yetu inahu. Kukwesi vyeka vitulya vyai kuvanga maana lika a litangwa na litangwa!”

⁷ Maana afwile ngwe vimbuto vya kasaku vyakutokoloka, cifwa cawo afwile ngwe lemba.

⁸ Vanu vaile nakuwakungulula nakuwalola a mamanya, nambe kuwatwa mu vin̄unju, co vawatelekele mu vindeo, nambe kuwalinga makende a kuhima. Co kuwamakela alifwile ngwe makende a kuhima akukumbasana na mazi a olive.

⁹ Omo lime lyawililile mu cilombo a simbu ya vutsiki, co na maana lalo awile amolika na lime.

¹⁰ Co Mosesa wazivile kulinyenyeta kwa vanu va Isalele mu naanga yavo yoshe, munu na munu wemanene ku cikolo ca mbalaka yendi. Co Shukulu Kalunga waluvalele manene navo, na Mosesa lalo waluvalele.

¹¹ Mosesa wendekele kuli Kalunga ngwendi, “Omwo vikajo walingila mwamuvi na ngamba yove? Omwo vikajo wanjanena moko yakwendesa vanu ava voshe?

¹² Kesi yange njavatangele nambe kuvakita! Omwo vikajo wendekele ngwove vambate a nulo yove ngwe ndezi akambata mbututu a mavoko endi, uvatwale ku lifuti lije liwakulaesele kwana kuli vakukulwila vavo?

¹³ Kulijo njasa kuwana situ yakwana kuli vanu voshe ava? Omwo valinakulinyenyetela kuli yange ngwavo twane situ ngeci tulye.

¹⁴ Kunjasa kwendesa vanu voshe ava ange lika omwo citele eci cilema kutuvakana nzili yange!

¹⁵ Nga unjipangesa na cifwa cangacije, nga omu mukemwo muunjipangesela, omwo vikajo kuunjitsiila cimweja, ngeci kesi njimone tuyando?”

¹⁶ Co Shukulu Kalunga wendekele kuli Mosesa ngwendi, “Njikungulwile vakulunu va vanu va Isalele makumi atanu na avali vaje vanapumo mukupwa vantwama na vamyata akati ka vanu va Isalele, co ukavatwale kuli yange ku Mbalaka Mwakuliwanena ngeci vakemane amo nove kuje.

¹⁷ Co njikashelumuka nakwendeka nove kuje vene, njikavana moko ngeci mukalikwase kwendesa vanu vange kuukavanyungu ove lika embwe.

¹⁸ Co leka vanu va Isalele ngwove, ‘Lijeleseni nakulivwaesela cimweja omwo imene mukalya situ. Shukulu Kalunga nazivi kulinyenyeta kweni ngweni mushaka kulya situ ngwe omo mwakele nakuyilya ku Ingito. Ngecivene, Shukulu Kalunga akamyana situ, co mukailya vene.

¹⁹ Kumukali situ litangwa limo, nambe matangwa avali, nambe matangwa atanu, nambe matangwa likumi, nambe matangwa makumi avali embwe,

²⁰ oloni mukailya ngonde yoshe yamutunu, noo mukayenukwa. Eci cikalingiwa omwo yeni munavyana Shukulu Kalunga ou ali akati keni, co munalinyenyetelele kuli ikeye ngweni omwo vikajo twatundilile mu Ingito!’ ”

²¹ Oloni Mosesa wendekele kuli Shukulu Kalunga ngwendi, “Vanu ava njilinakutwamenena vanapu 600,000, co yove unendeka ngwove ukavana situ yakulya ngonde yoshe yamutunu.

²² Kuma vakavatsiila matanga a vingombe na vimanga ngeci vapwisemo, nambe vakavakungulwile visi voshe va mu mema a kalunga ngeci vakapwisemo ndi?”

²³ Co Shukulu Kalunga wamukumbulwile ngwendi, “Kuma nzili yange yakala naa ayahwila ndi? Cooni ololo ukamona nga evi njinendeka vikalingiwa nambe kuvikalingiwa!”

²⁴ Ngecivene, Mosesa waile nakuleka vanu majwi aje endekele Shukulu Kalunga. Co wakungulwile vantwama makumi atanu na avali, wavemikile kuzengeleka Mbalaka.

²⁵ Asinoni Shukulu Kalunga washulukile asi mu lishelwa nakwendeka na Mosesa. Co Shukulu Kalunga wanonele ku Munzinzime uje wakele ali Mosesa nakuupangezela ali vaje vantwama makumi atanu na avali. Omo Munzinzime wakele ali vakevo, vambulwile ngwe vaka-kwimanena, oloni kuyapwile simbu yakama.

²⁶ Oloni vantwama vavali, Elendande na Mendande, vasalele mu cilombo, na vakevo vakele akati ka vaje vantwama vakevo kuvaile ku Mbalaka, oloni Munzinzime wakele ali vakevo, vambulwile vuka-kwimanena, omwo na vakevo lalo vakele akati ka vaje vantwama vavalavele.

²⁷ Co mukwenje umo washatukilile kuli Mosesa nakumuleka ngwendi, “Elendande na Mendande valinakwambulula vuka-kwimanena mu cilombo.”

²⁸ Ngecivene, Yoshwa muna Nune, uje wapwile mukwasi wa Mosesa wakwangula tunde ku vukwenje vwendi, wendekele kuli Mosesa ngwendi, “Shukulu, vavindike!”

²⁹ Oloni Mosesa wamukumbulwile ngwendi, “Kuma yove unjizivila lifuwa ndi? Capandele ngeci Shukulu Kalunga aake Munzinzime wendi ali vanu vendi voshe ngeci voshe vapwe ngwe vaka-kwimanena!”

³⁰ Asinoni Mosesa na vaje vantwama va Isalele velukile mu cilombo.

Shukulu Kalunga atuma makokwa

³¹ Vwasi-vwasi Shukulu Kalunga watumine lihunzi lyanenele makokwa kutunda mu mema a kalunga, co vakele nakupululwila kuzengeleka cilombo na ku mitambela yoshe nomu-nomu.

³² Ngecivene, vanu vakatukile nakukwata makokwa litangwa lyoshe lije na vutsiki vwoshe, na alikaki lalo. Naumo wai wakwatele amandondo kuvanga makilo likulukazi a munu na munu. Co vavativile nakuvashanda kuzengulwisa cilombo coshe.

³³ Oloni omo simbu kanda vacimanese kulya situ, co Shukulu Kalunga waluvalele na vanu nakutuma mushongo wakulitambwisa akati kavo.

³⁴ Ngecivene, mutambela uje vautumbwile ngwavo, Kimbelote-hatova “Vimbumbo vya Mashungu,” omwo kukekwo kuvatsindile vanu vaje vakele na lishungu lya situ.

³⁵ Co vanu vajalukile nakuya ku Hazelote kuje vatungile cilombo cavo.