Kulava 10 - Livulu lya Shukulu Kalunga

Malupembo a siliva

¹ Shukulu Kalunga wendekele kuli Mosesa ngwendi,

² “Fula malupembo avali akupameyeya na siliva akewo akusanesa mbunga amolika nakujalwisa cilombo.

³ Omo vakaimba malupembo simbu yakama manene, co mbunga yoshe vakakungulukile kuli yove ku cikolo ca Mbalaka Mwakuliwanena.

⁴ Oloni nga lupembo valwimba lumolika, co vantwama na vakulunu va vikota vya va Isalele vakakungulukile kuli yove.

⁵ Oloni omo lwimba kashashutwiya, co miyati ije vatungilile mu ngangela vakakatuke mu cilombo.

⁶ Omo lwimba kashashutwiya simbu yamucivali, co miyati ije vatungilile mu mbwela vakakatuke mu cilombo. Ngecivene, akwimba kashashutwiya cikeco cikapwa cimweso cakujaluka mu cilombo.

⁷ Akukungulula mbunga yoshe amolika, mukaimbe malupembo, oloni kesi mukaimbe kashashutwiya.

⁸ Malupembo vakaembe lika kuli vana va Alone, vaka-kukombelela. “Lishiko eli likapwa lya ku myaka yoshe ku visemwa vyeni vya kulutwe.

⁹ Omo muli mu nzita mu lifuti lyeni, mukalyamena ku vitozi veni vaje valinakumilwisa, mukaimba malupembo kashashutwiya, co vakamyanuka kuli Shukulu Kalunga Njambi yeni, ngeci akamyamene ku vitozi veni.

¹⁰ Co a litangwa lyakujolela a Viwano vyeni vya Kutenama kwa Ngonde na a viwano vikwavo vya vunjambi ku simbu ije ivemika, mukaimba malupembo omo mwana milambu yeni ya kwenyeka na milambu yeni ya kulitombola, eci cikapwa canukiso ceni ku mesho a Njambi yeni. Yange Njapwa Kalunga Njambi yeni.”

VaIsalele vajaluka mu cilombo

¹¹ A litangwa lyamumakumi avali ku ngonde yamucivali mu mwaka wamucivali omo vanu va Isalele vanatundu laja mu Ingito, lishelwa lije lyafwikile akamwa ya Mbalaka Mwakuliwanena lyatundileo,

¹² co vanu va Isalele vashangumukile vungenzi vwavo vwakutunda mu mambo ya Sinai. Co lishelwa lyemanene mu mambo ya Palane.

¹³ Co vashangumukile kuya omo Shukulu Kalunga washikile Mosesa.

¹⁴ Vaje vakele mwisi ya pandelo ya vuntwama vwa muyati wa Yunda valivangele kukatuka, mu mbunga yavo, co Nashone muna Aminandave wapwile ntwama.

¹⁵ Co mbunga ya muyati wa Isakale ntwama yavo wapwile Netanela muna Zuwale.

¹⁶ Co mbunga ya muyati wa Zembuloni ntwama yavo wapwile Elyave muna Helone.

¹⁷ Asinoni vasiwile Mbalaka, co vikota vya Ngeleshone na Melali, vaje vambatele Mbalaka, vakatukile nakuya.

¹⁸ Co kutundoo, vaje vakele mwisi ya pandelo ya vuntwama vwa muyati wa Luvena vakatukile nakuya mu mbunga yavo, co Elizule muna Shendeule ikeye wapwile ntwama.

¹⁹ Co mbunga ya muyati wa Simyoni ntwama yavo wapwile Shelumiyele muna Zulishandai.

²⁰ Co mbunga ya muyati wa Ngande ntwama yavo wapwile Elyasafe muna Ndewele.

²¹ Asinoni cikota ca vaLevi ca Kohate vakatukile nakuya, vambatele vivala vyakujela. Co vaje vatwameneko vashimbikile Mbalaka Mwakuliwanena simbu vaKohate kanda vete.

²² Kutundoo, vaje vakele mwisi ya pandelo ya vuntwama vwa muyati wa Efalime vakatukile nakuya mu mbunga yavo, co Elishama muna Amihunde wapwile ntwama.

²³ Co mbunga ya muyati wa Manase ntwama yavo wapwile Ngamalyele muna Pendazule.

²⁴ Co ku mbunga ya muyati wa Mbenjemani ntwama yavo wapwile Avindane muna Ngilyone.

²⁵ Akukotoka, vaje vakele mwisi ya pandelo ya vuntwama vwa muyati wa Ndani, vakevo vapwile vakumanesela ku vilombo vyoshe. Vakatukile nakuya mu mbunga yavo. Co Ahiyezele muna Amishandai wapwile ntwama yavo.

²⁶ Mbunga ya muyati wa Ashele ntwama yavo wapwile Pangiyele muna Okelane.

²⁷ Co ku mbunga ya muyati wa Nafetali ntwama yavo wapwile Ahila muna Enane.

²⁸ Omu mukemwo muwafwile mangenzi a vanu va Isalele mu vimbunga vyavo, omo vakatukile nakuya.

²⁹ Asinoni Mosesa wendekele kuli nyali yendi Hovave muna Yetolo kaMindyani ngwendi, “Ololo tulinakushangumuka kuya ku mutambela uje watumbwile Shukulu Kalunga ngwendi akatwanawo. Omwo ikeye wakulaesele vanu va Isalele ngeci vakakale mwamuvwa, ngecivene, tuye mumo nove, co yetu tukakulinga mwamuvwa.”

³⁰ Oloni Hovave wamukumbulwile ngwendi, “Embwe, yange njilinakwiluka ku lifuti lyange lya cisemwa ku vavushoko vwange.”

³¹ Co Mosesa wamukumbulwile ngwendi, “Njakulombo kesi utuseze, omwo yove uzivuka kuje kutukatungila cilombo mu mambo, co wasa kututwamenenako ngila.

³² Nga tuya nove, co tukalipangela vyuma vyoshe vyavivwa vije vyakatwana Shukulu Kalunga.”

Vanu vaIsalele vajaluka

³³ Omo vanu va Isalele vatundile ku Sinai, munkinda wa Shukulu Kalunga, vendele matangwa atatu, co Cikasa ca Cikumiiyo ca Shukulu Kalunga cavatwamenenene kulutwe nakuvawanena mutambela wakutungila cilombo cavo.

³⁴ Omo vatundile mu cilombo, co lishelwa lya Shukulu Kalunga lyakele akamwa yavo ku mutanya.

³⁵ Oshe aje acashangumukilile Cikasa ca Cikumiiyo kukatuka, Mosesa wendekele ngwendi, “Katuka, yove Shukulu Kalunga, shandola vitozi vove nakusheka vaje vakuzinda!”

³⁶ Co oshe aje acemanene Cikasa, co Mosesa wendekele ngwendi, “Iluka, yove Shukulu Kalunga ku vinaanga 1,000 vya Isalele”