Kulava 1 - Livulu lya Shukulu Kalunga

Kulava kwakulivanga kwa vaIsalele

¹ A litangwa lyakulivanga ku ngonde yamucivali ku mwaka wamucivali omo vanu va Isalele vanatundu laja mu Ingito, Shukulu Kalunga wendekele kuli Mosesa mu Mbalaka Mwakuliwanena mu Mambo ya Sinai ngwendi,

² “Nove na Alone laveni vanu va Isalele ngwe ku vikota vyavo na ku naanga yavo. Laveni mazina a vanalume voshe

³ vaje vali na myaka makumi avali nambe kutuvakana, vaje vasa kuya ku nzita.

⁴ Anguleni ku cikota na cikota mukulunu wa ku muyati umo na umo amikwase.”

⁵ Awa akewo mazina a vanalume vaje vavaangwile mu mbunga mu miyati yavo kukwasa ku vipangi evi. Ku muyati wa Luvena muka-kukwasa wapwile Elizule muna Shendeule.

⁶ Ku muyati wa Simyoni muka-kukwasa wapwile Shelumiyele muna Zulishandai.

⁷ Ku muyati wa Yunda muka-kukwasa wapwile Nashone muna Aminandave.

⁸ Ku muyati wa Isakale muka-kukwasa wapwile Netanela muna Zuwale.

⁹ Ku muyati wa Zembuloni muka-kukwasa wapwile Elyave muna Helone.

¹⁰ Ku vana va Yosefa, muyati wa Efalime muka-kukwasa wapwile Elishama muna Amihunde, ku muyati wa Manase muka-kukwasa wapwile Ngamalyele muna Pendazule.

¹¹ Ku muyati wa Mbenjemani muka-kukwasa wapwile Avindane muna Ngilyone.

¹² Ku muyati wa Ndani muka-kukwasa wapwile Ahiyezele muna Amishandai.

¹³ Ku muyati wa Ashele muka-kukwasa wapwile Pangiyele muna Okelane.

¹⁴ Ku muyati wa Ngande muka-kukwasa wapwile Elyasafe muna Ndewele.

¹⁵ Ku muyati wa Nafetali muka-kukwasa wapwile Ahila muna Enane.

¹⁶ Ava vakevo vanalume vaje vavaangwile mu mbunga, vakevo vakulunu va miyati ya vakukulwila vavo, vakevo vantwama va vikota vya vanu va Isalele.

¹⁷ Akukwasa kwa ava vanalume likumi na vavali, Mosesa na Alone

¹⁸ vakungulwile mbunga yoshe a litangwa lyakulivanga ku ngonde yamucivali, nakulava vanu voshe ngwe ku vikota vyavo na ku naanga yavo. Mazina oshe a vanalume vakweta ku myaka makumi avali nambe kutuvakana vawalavele,

¹⁹ ngwe muje mwashikile Shukulu Kalunga. Ngecivene, Mosesa wavalavelele mu Mambo ya Sinai.

²⁰ Ku cikota ca Luvena ntwatwa ya Isalele, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

²¹ Co vungi vwa vanu va ku muyati wa Luvena vapwile 46,500.

²² Ku cikota ca Simyoni, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

²³ Co vungi vwa vanu va ku muyati wa Simyoni vapwile 59,300.

²⁴ Ku cikota ca Ngande, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

²⁵ Co vungi vwa vanu va ku muyati wa Ngande vapwile 45,650.

²⁶ Ku cikota ca Yunda, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

²⁷ Co vungi vwa vanu va ku muyati wa Yunda vapwile 74,600.

²⁸ Ku cikota ca Isakale, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

²⁹ Co vungi vwa vanu va ku muyati wa Isakale vapwile 54,400.

³⁰ Ku cikota ca Zembuloni, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

³¹ Co vungi vwa vanu va ku muyati wa Zembuloni vapwile 57,400.

³² Vana va Yosefa va vanalume, ku cikota ca Efalime, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

³³ Co vungi vwa vanu va ku muyati wa Efalime vapwile 40,500.

³⁴ Ku cikota ca Manase, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

³⁵ Co vungi vwa vanu va ku muyati wa Manase vapwile 32,200.

³⁶ Ku cikota ca Mbenjemani, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

³⁷ Co vungi vwa vanu va ku muyati wa Mbenjemani vapwile 35,400.

³⁸ Ku cikota ca Ndani, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

³⁹ Co vungi vwa vanu va ku muyati wa Ndani vapwile 62,700.

⁴⁰ Ku cikota ca Ashele, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

⁴¹ Co vungi vwa vanu va ku muyati wa Ashele vapwile 41,500.

⁴² Ku cikota ca Nafetali, vanalume voshe vaje vakele na myaka makumi avali nambe kutuvakana, vaje vasele kuya ku nzita, vavalavele a mazina avo, ngwe ku cikota cavo na ku naanga yavo.

⁴³ Co vungi vwa vanu va ku muyati wa Nafetali vapwile 53,400.

⁴⁴ Mosesa na Alone valavele vanalume ava voshe akukwasa kwa vaje vakulunu likumi na vavali, vaje vemanenene miyati yavo.

⁴⁵ Vanu va Isalele voshe vaje vakele na myaka makumi avali nambe kutuvakana, vaje vasele kuya ku nzita, vavalavele ngwe ku naanga yavo.

⁴⁶ Vungi vwavo vapwile 603,550.

⁴⁷ Oloni vaLevi kuvavalavelele kumo na miyati ikwavo,

⁴⁸ omwo Shukulu Kalunga wendekele kuli Mosesa ngwendi,

⁴⁹ “Omo ukalava vanalume vaje vasa kuya ku nzita, kesi ukalaveko na muyati wa Levi.

⁵⁰ Oloni vaLevi vapwe vaka-kunyunga lika ku Mbalaka Mwakuliwanena na vivala vyamwo vyoshe. Vakevo vakayambata na vivala vyayo, nakuyinyunga, co vakashimbike vimbalaka vyavo kuzengeleka Mbalaka Mwakuliwanena.

⁵¹ Kwoshe kuje kumukajalwisila cilombo ceni, vaLevi vakevo vakasiwula Mbalaka, co vakaishimbika lalo ku cilombo na cilombo ceka caciha mu mwela wayo. Nga munu weka akashwenya kuyehi na Mbalaka vakamutsiye.

⁵² Co vanu va Isalele vakashimbike vimbalaka vyavo, munu na munu na mbunga yendi, mwisi ya pandelo yendi.

⁵³ Oloni vaLevi vakashimbike vimbalaka vyavo kuzengeleka Mbalaka Mwakuliwanena nakuyinyunga. Co naumo wai akashwenyako ngeci akashangumune vukalu vwange kutewa njikanyanyamesa mbunga ya vanu va Isalele.”

⁵⁴ Ngecivene, vanu va Isalele valingile vyuma vyoshe vije vyashikile Shukulu Kalunga kuli Mosesa.