Kujombolola 9 - Livulu lya Shukulu Kalunga

¹ Asinoni kangelo wamucitanu wembile lupembo lwendi lalo. Co njamwene ngongonosi ije yawililile asi kutunda kwilu, co vayanene sapi ya mbulu ije kuyesi naa masima.

² Ije ngongonosi yashokolwele ije mbulu kuyesi naa masima, co vwisi vwatuukilemo, ngwe vwisi vwakutunda mu lutengo lwakama, co misha ya litangwa na lihunzi vyazivalele na vwisi vuje vwatundile muje mu mbulu ije kujesi naa masima.

³ Vimbimba mikumbi vatuukile muje mu vwisi nakushandokela ano asi, co vavaanene nzili ngwe manyewe.

⁴ Vavashikile ngeci kesi vaviise mwila nambe miti nambe cuma cimo cakumena, vanapande kuvulumuna lika vanu vaje kuvesi na cizivukiso ca kasateso ka Njambi a maholo avo.

⁵ Vaje vimbimba mikumbi kuvavatavesele kutsiya vanu ava embwe, oloni kuvayandesa lika vingonde vitanu. Co kuvavala kwakuyandesa kwavo kunapu ngwe munu nashumuwa ku linyewe.

⁶ Co mu vingonde vije vitanu vanu ava vakashaka kutsa oloni kuvakaciwana, vakashaka ngeci vatse, oloni kutsa cikavatewa.

⁷ Vaje vimbimba vafwile ngwe tuvalu vaje vanavavwaesela nzita, co a mitwe yavo akele vyuma vyakufwa ngwe vilongo vya ngolinde na vihanga vyavo ngwe vihanga vya vanu.

⁸ Co vin̄ambu vyavo ngwe vin̄ambu vya vanakazi, na mayo avo afwile ngwe mayo a vindumba.

⁹ A vinulo vyavo akele vyakulifwika ngwe vintelo vya vikuvo, co cililimo cakutunda ku mambava avo omo vapulula cafwile ngwe muyoyo wa tuvalu vavangi omo vashatuka na matemba kuya ku nzita.

¹⁰ Vakevo vali na mikila na mambimbo akufwa ngwe aje a manyewe, co na mikila yavo vali na nzili yakuvulumuna nayo vanu a vingonde vitanu.

¹¹ Vali na mwene muka-kuvashika, ikeye kangelo muka-mbulu ije kuyesi naa masima. Lizina lyendi mu ciHevelu lyapwa Ambandoni, co mu ciNgiliki ngwavo Apolyoni (kulumbununa ngwavo “Muka-kunyongesa”).

¹² Kayando kakulivanga kaneti, munima yevi tuyando tuvali lalo tucili nakwija.

¹³ Asinoni kangelo wamucitanu na umo wembile lupembo lwendi. Co njazivile lijwi lyakutunda ku vimbango viwana vya mutula wa ngolinde unemana ku mesho a Njambi.

¹⁴ Co lijwi lyendekele kuli uje kangelo wamucitanu na umo ngwalyo, “Zitula tungelo vawana vaje vavanakutu ku Ndonga yakama ya Yufuleti!”

¹⁵ Ngecivene, vaje tungelo vawana vavazitwile, vanavavwaesela cimweja ku simbu ino ya litangwa lino lya ngonde ino ku mwaka uno mukutsiya litambelo lyamucitatu lya vanu voshe.

¹⁶ Vanjilekele vungi vwa mashwalale va nzita vaje valondele a tuvalu, vapwile 200,000,000.

¹⁷ Co mu cimona cange njamwene tuvalu na vaje valondeleo. Vakele na vintelo vyakuvenga ngwe tuhya, vyakuzivuluka ngwe safile, vyavusela ngwe sulufa. Co mitwe ya vaje tuvalu yalifwile ngwe mitwe ya vindumba, co mu tunwa twavo mwatuukile tuhya na vwisi na sulufa.

¹⁸ Co litambelo lyamucitatu lya vanu vavatsiile na tuyando tuje tutatu, tuhya na vwisi na sulufa vije vyatuukile mu tunwa twa vaje tuvalu.

¹⁹ Omwo nzili ya vaje tuvalu yakele mu tunwa twavo na ku mikila yavo lalo. Mikila yavo inafu ngwe manyoka vali na mitwe, co vaipangesa mukuvulumuna vanu.

²⁰ Vaje vanu vasaleleo, voshe vaje kuvatsile na tuyando otu, kuvatengulukile kutunda ku vije vivalingile vakevo vavenya. Kuvalikelele kulemesa minzinzime yakujwala nambe tumponya twa ngolinde, siliva, vunengu, mamanya na viti, vije kuvyasa kumona nambe kuziva nambe kwenda.

²¹ Nambe kutenguluka kutunda ku kutsiya nambe ku manseno avo nambe ku vupangala vwavo nambe ku vwizi vwavo.