Kujombolola 6 - Livulu lya Shukulu Kalunga

Tusateso

¹ Asinoni njamwene Muna Manga atavula kasateso kakulivanga ka tuje tusateso tutanu na tuvali, co njazivile umo wa vaje vikashama vawana vakuyoya endeka na lijwi lyakulifwa ngwe cililimo ngwendi, “Ija!”

² Njakengele, co kwakele kavalu wakutoka. Uje walondeleo wakwatele vuta vwa lusipa, co vamwanene cilongo. Wakatukile ngwe muka-kuhyana aya mukuhyana.

³ Asinoni Muna Manga wavatwile kasateso kamucivali, co njazivile cikashama wakuyoya wamucivali endekele ngwendi, “Ija!”

⁴ Co kavalu mukwavo lalo watuukile, wapwile wakuvenga. Uje walondeleo vamwanene nzili yakunena nzita ano asi, ngeci vanu valitsiye umo na mukwavo. Vamwanene moko yakama ya mukwale.

⁵ Asinoni Muna Manga wavatwile lalo kasateso kamucitatu, co njazivile cikashama wakuyoya wamucitatu endeka ngwendi, “Ija!” Njakengele, co kuje kwakele kavalu wakuzivala. Uje walondeleo wakwatele cipeseleso mu livoko lyendi.

⁶ Co njazivile lijwi litunda mukati ka vaje vikashama vawana vakuyoya ngwalyo, “Lita ya tiliku inapu ngwe fweto ya litangwa lyoshe lyamutunu, co lalo malita atatu a mbale ya maumwa anapu fweto ya litangwa lyoshe lyamutunu. Oloni kesi uviise mazi a olive na mikolovozi ya vushuka vya vinyu!”

⁷ Asinoni Muna Manga wavatwile lalo kasateso kamuciwana, co njazivile cikashama wakuyoya wamuciwana andeka ngwendi, “Ija!”

⁸ Njakengele, co kwasholokele kavalu wakutokoloka. Uje walondeleo vamulukile lizina ngwavo Kutsa, co Vukalo vwa Vatsi vwamukavele kuyehi munima. Vavaanene nzili akamwa ya mutambela umo wa mitambela iwana ya ano asi, ngeci vatsiye na moko ya mukwale na njala ya lyangengela na mishongo na vikashama.

⁹ Asinoni Muna Manga wavatwile kasateso kamucitanu. Co njamwene mwisi ya mutula myonyo ya vaje vavatsiile omwo vambulwile lijwi lya Njambi, co vapwile vaka-kulongwa mu vukaleo vwavo.

¹⁰ Co vatambekele na lijwi lyakama ngwavo, “Shukulu Kalunga Muka-nzili yoshe, wakujela na vushunga! Simbu mukajo ukakala ngeci ukasompe vanu va asi nakuvanyanyamesa omwo vatutsiile?”

¹¹ Co umo na umo wavo vamwanene cikoveyo cakutoka, vavalekele ngeci vahwime kasimbu lika nakututumwisa, noo nambala yoshe ya vavushoko vwavo na vasamba vavo vanavatsii ngwe muvavatsiile vakevo.

¹² Co njamwene Muna Manga avatula kasateso kamucitanu na kamo. Co kenga, kwakele mandunduma akama manene, litangwa lyazivalele ngwe cikeleya cakuzivala na ngonde yemukile lalo yakuvenga ngwe maninga.

¹³ Co vingongonosi vyawililile asi kutunda mwilu ngwe vushuka vwa mukuyu vwakwekwiya vulundumukila asi kutunda ku muti omo lihunzi lyakama lihuwa nakuningangesa uje muti.

¹⁴ Lilu lyatundile ngwe livulu lyakuzenga valinakulizengela amo, co minkinda yoshe na man̄anda oshe atundile ku mitambela yawo.

¹⁵ Asinoni vimyene va ano asi, na vaka-kushwana na vakulunu va nzita, vaka-kufuka na vaka-nzili, na vanu voshe veka lalo, ndungo na muka-kupatuka, vavandele mu manzenzengoma na mwisi ya mamanya a minkinda.

¹⁶ Co vasanene minkinda na mamanya ngwavo, “Ijeni mutuwile nakutufwika kutunda ku mesho a uje natumbama a litanda na ku vukalu vwa Muna Manga!

¹⁷ Omwo litangwa lyakama lya vukalu vwavo linete, co iyajo asa kwimana?”